తెలంగాణ ఎన్నికల్లో ఈవీఎంల టాంపరింగ్ జరిగిందని కాంగ్రెస్ నేతలు ఆరోపిస్తున్న సంగతి తెలిసిందే. కాగా ఈ వ్యాఖ్యలను రాష్ట్ర ప్రధాన ఎన్నికల అధికారి రజత్‌కుమార్ ఖండించారు. జాతీయ ఓటర్ల దినోత్సవాన్ని పురస్కరించుకుని హైదరాబాద్ రవీంద్ర భారతిలో ఏర్పాటు చేసిన అవగాహన కార్యక్రమంలో తెలుగు రాష్ట్రాల గవర్నర్‌ ఈఎస్‌ఎల్‌ నరసింహన్‌తో కలిసి ఆయన పాల్గొన్నారు. అనంతరం ఆయన మీడియాతో మాట్లాడారు. 1982 నుంచే ఈవీఎంలను వాడుతున్నారన్న రజత్ కుమార్..వాటి పనితీరుపై అపోహలు అవాస్తవమని తోసిపుచ్చారు. సుప్రీంకోర్టు కూడా ఇదే విషయాన్ని తేల్చి చెప్పిందని గుర్తు చేశారు.

ఇటీవల రాష్ట్రంలో జరిగిన అసెంబ్లీ ఎన్నికల్లో ఈవీఎంల ట్యాంపరింగ్ జరిగిందనడం పూర్తిగా అవాస్తమని, దీనిపై వివాదం అనవసరమని తేల్చిచెప్పారు. ట్యాంపరింగ్ జరిగిందని, ఆధారాలతో నిర్ధరణ చేస్తామని ఎవరైనా ముందుకు వస్తే స్వాగతిస్తామని ప్రకటించారు. తనపై కాంగ్రెస్ పార్టీ చేసిన వ్యాఖ్యలపై స్పందించనని రజత్‌ కుమార్‌ అన్నారు. ప్రస్తుతం తాము పార్లమెంట్‌ ఎన్నికల కోసం సిద్ధమవుతున్నట్లు ప్రకటించారు. పార్లమెంట్‌ ఎన్నికల దృష్ట్యా ఇప్పటి వరకు 16 లక్షల ఓటరు దరఖాస్తులు వచ్చాయని రజత్‌కుమార్ చెప్పారు. ఓటర్ల కోసం 1950 హెల్ప్‌లైన్‌ను లాంచ్‌ చేశామని,ఆ నంబరుకు ఫోన్ చేసి సమస్యలు, అభ్యంతరాలు, ఫిర్యాదులు చేయవచ్చన్నారు. ఎన్నికల సందర్భంగా సోషల్‌ మీడియాపై కూడా ఆంక్షలుంటాయని ఆయన స్పష్టం చేశారు.