తెలంగాణలో ఉన్నత విద్యా కోర్సుల్లో ప్రవేశాల కోసం విద్యార్థులు ఎంతగానో ఎదురుచూస్తున్న క్షణాలు రానే వచ్చాయి. తెలంగాణ ఎప్‌సెట్‌  ఫలితాలు అధికారికంగా విడుదలయ్యాయి. జేఎన్‌టీయూ హైదరాబాద్ ఆధ్వర్యంలో నిర్వహించిన ఈ ప్రవేశ పరీక్ష ఫలితాలను ఉన్నత విద్యామండలి శరవేగంగా కేవలం పరీక్షలు ముగిసిన ఆరో రోజే విడుదల చేయడం ఒక రికార్డుగా నిలిచింది. హైదరాబాద్‌లోని జేఎన్‌టీయూ క్యాంపస్‌లో జరిగిన విలేకరుల సమావేశంలో ప్రభుత్వ సలహాదారు కె. కేశవరావు, ఉన్నత విద్యామండలి ఛైర్మన్ ఆచార్య వి. బాలకిష్టారెడ్డి, విద్యాశాఖ కార్యదర్శి యోగితా రాణా తదితర ప్రముఖులు ఈ ఫలితాలను అధికారికంగా విడుదల చేశారు. ఈ ఏడాది ఎప్‌సెట్ పరీక్ష ముగిసిన వెంటనే కంప్యూటర్ స్క్రీన్‌పై మార్కులు కనిపించే సరికొత్త విధానాన్ని ప్రవేశపెట్టడం విశేషం.

ఈ సంవత్సరం ఎప్‌సెట్ ఫలితాల్లో విద్యార్థులు అద్భుతమైన ప్రతిభను కనబరిచారు. ఇంజినీరింగ్ విభాగంలో మొత్తం 1,97,241 మంది విద్యార్థులు పరీక్షకు హాజరుకాగా.. అందులో 1,44,704 మంది అర్హత సాధించి, 73.36 శాతం  ఉత్తీర్ణత నమోదు చేశారు. ఇక అగ్రికల్చర్, ఫార్మసీ విభాగంలో చూసుకుంటే 84,954 మంది విద్యార్థులు పరీక్ష రాయగా, ఏకంగా 73,294 మంది క్వాలిఫై అయ్యారు. ఈ విభాగంలో 86.27 శాతం రికార్డు స్థాయి ఉత్తీర్ణత నమోదైంది. గత ఏడాదితో పోలిస్తే ఈసారి రెండు విభాగాల్లోనూ పోటీ విపరీతంగా పెరిగినట్లు స్పష్టమవుతోంది. ముఖ్యంగా ప్రైవేట్ కళాశాలల్లో సీట్ల కోసం ఈసారి గట్టి పోటీ ఉండే అవకాశాలు కనిపిస్తున్నాయి.

ఈ ఏడాది టాప్ ర్యాంకర్ల వివరాలను పరిశీలిస్తే, ఇంజినీరింగ్ విభాగంలో హైదరాబాద్‌ ఉప్పల్‌కు చెందిన ఎం. రుషి 156.63 మార్కులతో స్టేట్ ఫస్ట్ ర్యాంక్ సాధించి సంచలనం సృష్టించాడు. మూసాపేటకు చెందిన బేజుగమ అన్షుల్ రెండో ర్యాంకు సాధించగా, ఆంధ్రప్రదేశ్‌లోని పులివెందులకు చెందిన ఎం. వంశీధర్‌రెడ్డి మూడో ర్యాంకును కైవసం చేసుకున్నారు.

అదేవిధంగా అగ్రికల్చర్, ఫార్మసీ విభాగంలో హైదరాబాద్‌కు చెందిన ముక్కారమ్ అహ్మద్ 150.17 మార్కులతో అగ్రస్థానంలో నిలిచారు. హైదరాబాద్‌కే చెందిన తాదూరి నివృత్ సాయికిరణ్ రెండో ర్యాంకు, రంగారెడ్డి జిల్లాకు చెందిన జి. సాహితి గీతిక మూడో ర్యాంకును సొంతం చేసుకున్నారు. విజేతల ఇళ్లలో ఇప్పుడు పండుగ వాతావరణం నెలకొంది. ఫలితాలు విడుదలైన నేపథ్యంలో విద్యార్థులు తమ ర్యాంక్ కార్డులను అధికారిక వెబ్‌సైట్ eapcet.tgche.ac.in ద్వారా డౌన్‌లోడ్ చేసుకోవచ్చు.