ఆంధ్రప్రదేశ్ రాష్ట్రంలో వివాదాస్పదంగా మారిన 22ఏ  సెక్షన్ కింద రైతుల భూములను ఆంక్షల జాబితాలో పెట్టడంపై ఏపీ ఇంటెలిజెన్స్ మాజీ చీఫ్ ఏబీ వెంకటేశ్వరరావు సమర శంఖారావం పూరించారు.  ప్రభుత్వాలు రాత్రికి రాత్రే లక్షలాది ఎకరాల రైతుల సొంత భూములను ప్రభుత్వ భూములుగా మార్చేస్తూ 22ఏలో బందీ చేశాయని మండిపడ్డారు. మీడియా సమావేశంలో మాట్లాడిన ఆయన తక్షణమే 22 ఏ సెక్షన్‌ను  పూర్తిగా ఉపసంహరించుకోవాలని డిమాండ్ చేశారు. అలా చేయని పక్షంలో  రాష్ట్రవ్యాప్తంగా రైతుల నుంచి  తిరుగుబాటుతప్పదని హెచ్చరించారు. ఆ ప్రజా తిరుగుబాటు.. మరో రామ-రావణ యుద్ధాన్నితలపింప చేయడం ఖాయమన్నారు. రావణుడు సీతను అపహరించి లంకలో దాచిన విధంగా ప్రభుత్వాలు 22ఏ లంకలో పేదల భూములను బందీ చేశాయని తీవ్ర స్థాయిలో విమర్శించారు. 

చరిత్ర కాలం నుంచి ఇప్పటివరకు ఏ ముస్లిం రాజులు కానీ, బ్రిటిష్ పాలకులు కానీ తాకని రైతుల భూ హక్కులను నేటి పాలకులు కాలరాస్తున్నారని ఏబీ వెంకటేశ్వరరావు ఆవేదన వ్యక్తం చేశారు. కష్టపడి రైతులు సాగుచేసుకుంటున్న వంశపారంపర్య భూములను, కంప్యూటరీకరణ పేరుతో ఒకే ఒక్క రోజులో నిషేధిత జాబితాలోకి చేర్చారని విమర్శించారు. నోటీసులు ఇవ్వకుండా, కనీస సమాచారం లేకుండా రైతుల భూములను లాక్కోవడం దారుణమన్నారు.

ముఖ్యమంత్రి చంద్రబాబు నాయుడు ఇటీవల బాపట్ల జిల్లాను 22ఏ విముక్త జిల్లాగా మారుస్తామని చేసిన ప్రకటనలపై ఆయన ఘాటుగా స్పందించారు.  పని చేయాల్సింది కలెక్టర్ అయితే.. క్రెడిట్ తీసుకుని పట్టాలు పంచేది మీరా?  అంటూ మండిపడ్డారు. వచ్చే 5 వారాల్లోగా బాపట్ల జిల్లాను 22ఏ సెక్షన్ నుంచి పూర్తిగా విముక్తం చేయకుంటే అక్కడి కలెక్టర్‌ను బదిలీ చేయాలని డిమాండ్ చేశారు. ఎంఆర్ఓ నుంచి కలెక్టర్, బ్రోకర్ల వరకు ఉన్న భూ విషవలయం ప్రభుత్వానికి తెలియంది కాదని ఏబీ వెంకటేశ్వరరావు అన్నారు. 

రైతులు తమ భూమిని తమదిగా నిరూపించుకోవడానికి కోర్టుల చుట్టూ తిరుగుతూ లక్షలాది రూపాయలు ఖర్చు పెట్టాల్సి రావడం దుర్మార్గమన్నారు. నోటీసు ఇవ్వకుండా 22ఏ జాబితాలో పెట్టిన ప్రతి సెంట్ భూమిని తక్షణమే వెనక్కి ఇవ్వాలని డిమాండ్ చేస్తూ, బాపట్ల కలెక్టరేట్ వేదికగా ఈ ప్రజా ఉద్యమం  మొదలైందని ఏబీ వెంకటేశ్వరరావు అన్నారు. 

ABV, 22A Land Issue AP, Chandrababu Naidu, Bapatla Collector Challenge, Farmers Protest AP, Revenue Department Corruption