ఈమధ్య బ్రిటన్‌లో సార్వత్రిక ఎన్నికలు ముగిసిన విషయం తెలిసిందే. ఈ ఎన్నికలలో భారత సంతతికి చెందిన ప్రధాని రిషి సునాక్ ఓడిపోయారుగానీ, చాలామంది భారత సంతతికి చెందిన వారు మాత్రం పార్లమెంటు సభ్యులుగా విజయం సాధించారు. మొత్తం 27 మంది బ్రిటన్ పార్లమెంట్‌కి ఎన్నికయ్యారు. వారిలో ఒకరైన శివానీ రాజా ఎంపీగా ప్రమాణ స్వీకారం చేశారు. శివానీ రాజా భగవద్గీత మీద ప్రమాణం చేసి ప్రమాణ స్వీకారం చేయడం విశేషం. లైసెస్టర్ ఈస్ట్నియోజకవర్గం నుంచి శివానీ విజయం సాధించారు. ఆమె విజయం తాజాగా అధికారంలోకి వచ్చిన లేబర్ పార్టీకి పెద్ద షాక్ ఇచ్చింది. గత 37 సంవత్సరాలుగా లైసెస్టర్ ఈస్ట్ నియోజకవర్గం లేబర్ పార్టీకి కంచుకోట. ఆ పార్టీ అభ్యర్థి, భారత సంతతి నాయకుడు రాజేష్ అగర్వాల్‌ని ఓడించి శివానీ ఎంపీగా గెలిచారు. శివానీ గుజరాతీ మూలాలున్న యువతి. తాను భగవద్గీత మీద ప్రమాణం చేసి పదవిని చేపట్టిన విషయాన్ని సోషల్ మీడియా ద్వారా శివానీ రాజా తెలియజేశారు. ‘‘లైసెస్టర్ ఈస్ట్ నియోజకవర్గానికి ప్రాతినిధ్యం వహిస్తూ పార్లమెంట్‌లో ప్రమాణ స్వీకారం చేయడం గౌరవంగా భావిస్తున్నాను. రాజుకు విధేయతగా వుంటానని, భగవద్గీత మీద ప్రమాణం చేయడం నాకు గర్వకారణం’’ అని ఆమె పేర్కొన్నారు. 29 ఏళ్ళ శివానీ రాజా వ్యాపారవేత్తగా కూడా రాణిస్తున్నారు.