హ్యూమన్‌ మెటానిమో వైరస్‌.. హెచ్ఎంపీవీ వ్యాప్తి వేగం ప్రపంచాన్ని గడగడలాడిస్తోంది. చైనాలో మొదలైన ఈ వైరస్ ప్రపంచాన్ని చుట్టేయడం ఖాయమన్న ఆందోళన వ్యక్తం అవుతోంది. మొన్నటి వరకూ ఎవరూ చైనాలో హెచ్ఎంపీవీ వైరస్ ఉద్ధృతిపై వార్తలు వస్తున్నా ఎవరూ పెద్దగా పట్టించుకోలేదు. అయితే సోమవారం (జనవరి 6) ఒక్క రోజే భారత్ లో ఆరు కేసులు వెలుగు చూడటంతో అందరిలో ఆందోళన మొదలైంది. హెచ్ఎంపీవీ వైరస్ ఇప్పుడు దేశాన్ని గడగడలాడిస్తోంది. మరో సారి కరోనా నాటి పరిస్థితులను ఎదుర్కొనక తప్పదన్న భయం అందరినీ వణికించేస్తోంది.  కర్ణాటక, గుజరాత్‌, తమిళనాడు, ఢిల్లీలలో హెచ్ఎంపీవీ కేసులు వెలుగు చూడటంతో జనం భయంతో వణుకుతున్నారు. కేంద్ర ఆరోగ్య మంత్రిత్వ శాఖ హెచ్ఎంపీవీ వైరస్ కొత్తదేం కాదనీ, ఇది ప్రాణాంతకం కాదనీ చెబుతున్నా జనం నమ్మడం లేదు. కరోనా వ్యాప్తి సందర్భంలో కూడా ఇలాగే చెప్పారంటూ నాటి పరిస్థితులను గుర్తు చేసుకుంటున్నారు.

దేశంలో హెచ్ఎంపీవీ వైరస్ వ్యాప్తి వార్తల నేపథ్యంలో ఆంధ్రప్రదేశ్ ప్రభుత్వం అప్రమత్తమైంది.  ఏపీలో ఇప్పటి వరకూ హెచ్ఎంపీవీ వైరస్ కేసులు నమోదు క ానప్పటికీ.. ప్రజలను అప్రమత్తం చేయడమే కాకుండా,  హెచ్‌ఎంపీవీ గురించి, దాని వ్యాప్తి గురించి, తీసుకోవలసిన జాగ్రత్తలు, వైద్య సదుపాయాలు, మందులు అందుబాటు, ఆక్సిజన్ సరఫరా, అత్య వసర పరిస్థితులు వంటి అనేక అంశాలపైన  ముఖ్యమంత్రి చంద్రబాబు అధికారులతో టెలీ కాన్ఫరెన్స్ నిర్వహించారు.  ఈ సందర్భంగా ముఖ్యమంత్రి మాట్లాడుతూ కర్ణాటక, గుజరాత్‌ రాష్ట్రాల్లో హెచ్‌ఎంపీవీ కేసులు నమోదవుతున్న నేపథ్యంలో రాష్ట్రంలో అప్రమత్తతతో వ్యవహరించాలని అధికారులను ఆదేశించారు. ప్రజలు దీనిపైన ఆందోళనలు చెందాల్సిన అవసరం లేదనే విషయాన్ని సీనియర్‌ వైద్య నిపుణులు చెబుతున్నారని చెప్పిన ఆయన అయినా చాన్స్ తీసుకోవద్దనీ, ఎటువంటి పరిస్థితినైనా ఎదుర్కొనేందుకు సిద్ధంగా ఉండాలనీ చంద్రబాబు సూచించారు. 

హెచ్ఎంపీవీ వైరస్ విషయంలో ప్రభుత్వానికి అవసరమైన సాంకేతిక సహకారం అందించేందుకు మైక్రో బయాలజిస్ట్‌లు, పీడియాట్రిషియన్‌లు, పల్మోనాలజిస్ట్‌లు, ప్రివెంటివ్‌ మెడిసిన్‌ ప్రొఫెసర్‌లతో నిపుణుల కమిటీ  ఏర్పాటు చేసినట్లు తెలిపారు.  వైరస్‌ ప్రభావితుల పరీక్ష కోసం, హెచ్‌ఎంపీవీ వైరస్‌ని పరీక్షించడానికి యూనిప్లెక్స్‌ కిట్‌లను సేకరించాలని అధికారులకు సూచించారు. రాష్ట్రంలో ఐసిఎంఆర్‌ గుర్తింపు పొందిన 10 వైరాలజీ ల్యాబ్‌లు అందుబాటులో ఉన్నాయని, వీటిల్లో హెచ్‌ఎంపీవీ పరీక్షలు చేయవచ్చని చెప్పారు. నేషనల్‌ ఇన్‌స్టిట్యూట్‌ ఆఫ్‌ వైరాలజీ పుణేలో హెచ్‌ఎంపీవీ నిర్ధారణ పరీక్ష జరగాలని కేంద్రం సూచించిందన్నారు.

ఐసిఎంఆర్‌ గుర్తింపు పొందిన వీడీఆర్‌ఎల్‌ ల్యాబ్‌లకు అవసరమైన టెస్టింగ్‌ కిట్‌లను సరఫరా చేస్తామని కేంద్రం తెలిపిందన్నారు. జర్మనీ నుండి  గా 3000 టెస్టింగ్‌ కెపాసిటీ కిట్‌లను కొనుగోలు చేయాలని నిర్ణయించారు. అలాగే 4.50 లక్షల 95 మాస్క్‌లు, 13.71 లక్షల ట్రిపుల్‌ లేయర్డ్‌ మాస్క్‌లు, 3.52 లక్షల పీపీఈ కిట్లు తక్షణమే అందుబాటులోకి తీసుకురావాలన్నారు.   చికిత్స కోసం అవసరమైన ఔషధాల లభ్యతపైన కూడా అధికారులతో సమీక్షించారు.  

అన్ని ప్రభుత్వ బోధన, జిల్లా ఆసుపత్రులలో 20 పడకల ఐసోలేషన్‌ వార్డులను  సిద్ధంగా ఉంచాలన్నారు. ప్రభుత్వ ఆసుపత్రులలోని అన్ని ఓపీ ప్రాంతాలలో ఆటో శానిటైజర్‌ డిస్పెన్సర్‌లను ఏర్పాటు చేయాలని ఆదేశించారు. ఎలాంటి అంతరాయం లేని ఆక్సిజన్‌ సరఫరా, ఆక్సిజన్‌ పైపు లైన్లు, లిక్విడ్‌ ఆక్సిజన్‌ సరఫరా, పిఎస్‌ఎ ప్లాంట్ల లభ్యత వంటి అంశాలపై అన్ని ఆసుపత్రులలో మాక్‌ డ్రిల్‌ నిర్వహించాలని ఆదేశించారు. హ్యాండ్‌ వాష్, మాస్క్‌ వాడకం, పరిశుభ్రత నిర్వహణపై ప్రజల్లో అవగాహన కల్పించాలన్నారు. పరిస్థితిని ఎదుర్కొనేందుకు వైద్య ఆరోగ్య, కుటుంబ సంక్షేమ శాఖ పూర్తిగా సిద్ధంగా ఉండాలని సీఎం చంద్రబాబు ఆదేశించారు.  మరో వైపు తెలంగాణ కూడా హెచ్ఎంపీవీ వైరస్ వ్యాప్తిపై అప్రమత్తమైంది. ఎటువంటి పరిస్థితినైనా ఎదుర్కొనేందుకు సన్నద్ధంగా ఉండాలని మంత్రి దామోదర రాజనరసింహ అధికారులను అదేశంచారు.  ఇలా ఉండగా ప్రధాని నరేంద్రమోడీ కూడా అధికారులతో హెచ్ఎంపీవీ వైరస్ వ్యాప్తి నిరోధానికి తీసుకోవలసిన చర్యలపై అధికారులతో సమీక్ష నిర్వహించనున్నారు.