ఆర్టిఫిషియల్ ఇంటెలిజెన్స్ (AI) ప్రపంచంలో గ్లోబల్ టెక్ దిగ్గజం ఇంటెల్ సరికొత్త విప్లవానికి తెరలేపింది. ప్రస్తుతం తైపీలో జరుగుతున్న ప్రఖ్యాత కంప్యూటెక్స్ (Compute 2026) సదస్సులో ఇంటెల్ తన సరికొత్త డేటా సెంటర్ ప్రాసెసర్‌లు, ఎఐ చిప్‌లను అధికారికంగా లాంచ్ చేసింది. మార్కెట్‌లో రారాజుగా వెలుగుతున్న ఎన్విడియా (NVIDIA), అలాగే గట్టి పోటీ ఇస్తున్న ఏఎండీ (AMD) సంస్థల కంటే తమ రాబోయే ఎఐ హార్డ్‌వేర్ ఎంతో చౌకగా లభిస్తుందని, అంతేకాకుండా చాలా తక్కువ వేడిని విడుదల చేస్తూ అద్భుతమైన కూలింగ్ సామర్థ్యంతో రన్ అవుతుందని ఇంటెల్ సగర్వంగా ప్రకటించింది. దీనితో ఎఐ చిప్‌ల మార్కెట్‌లో సరికొత్త ధరల యుద్ధం ప్రారంభమైంది.

ఇంటెల్ కంపెనీ తాజాగా తన Xeon 6+ (జీయాన్ 6 ప్లస్) ప్రాసెసర్ సిరీస్‌ను మార్కెట్లోకి పరిచయం చేసింది. ఆధునిక ఎఐ డేటా సెంటర్లు ఎదుర్కొంటున్న భారీ విద్యుత్ బిల్లుల సమస్యలను, అధిక ఉష్ణోగ్రతలను అదుపు చేయడమే లక్ష్యంగా ఇంటెల్ ఈ చిప్‌లను డిజైన్ చేసింది. ఇంటెల్ చరిత్రలోనే మొట్టమొదటిసారిగా అత్యంత అధునాతనమైన Intel 18A మ్యానుఫ్యాక్చరింగ్ ప్రాసెస్ టెక్నాలజీని ఉపయోగించి ఈ డేటా సెంటర్ చిప్‌ను తయారు చేయడం విశేషం. ఈ సరికొత్త ఆర్కిటెక్చర్ వల్ల సర్వర్‌లు మునుపెన్నడూ లేని విధంగా అత్యంత వేగంగా, సమర్థవంతంగా పనిచేస్తాయని టెక్ నిపుణులు చెబుతున్నారు.

ఈ కొత్త చిప్స్ యొక్క సాంకేతిక వివరాలు మరియు గణాంకాలు చూస్తే మైండ్ బ్లాక్ అవ్వాల్సిందే. ఈ సరికొత్త జియాన్ 6+ ప్రాసెసర్‌ ఏకంగా 288 ఎఫిషియంట్-కోర్స్ (Efficient-cores) తో వస్తోంది. ఇది పాత మోడళ్లతో పోలిస్తే ఏకంగా 2.5 రెట్లు మెరుగైన పనితీరును (Performance) అందిస్తుంది. అంతేకాకుండా, ప్రత్యర్థి చిప్‌లతో పోల్చితే ప్రతి త్రెడ్‌కు దాదాపు 45 శాతం మెరుగైన పవర్ ఎఫిషియన్సీని (Power Efficiency) ఇది కలిగి ఉంటుంది. అంటే అతి తక్కువ కరెంట్ వినియోగంతో అత్యధిక వేగాన్ని ఈ చిప్ అందిస్తుంది. దీనివల్ల వ్యాపార సంస్థలు తమ పాత 9 సర్వర్‌ల స్థానంలో కేవలం ఒకే ఒక్క కొత్త జియాన్ 6+ సర్వర్‌ను రీప్లేస్ చేసుకోవచ్చు. దీనివల్ల డేటా సెంటర్ల భౌతిక స్థలం ఆదా అవ్వడమే కాకుండా ఎనర్జీ ఖర్చులు భారీగా తగ్గుతాయి.

అంతేకాకుండా, ఇంటెల్ తన తదుపరి తరం డేటా సెంటర్ GPU క్రిసెంట్ ఐలాండ్ (Crescent Island) గురించి కూడా కీలక వివరాలను వెల్లడించింది. ఎన్విడియా మరియు ఏఎండీ చిప్‌లు భారీగా వేడెక్కుతూ వేల డాలర్ల కూలింగ్ సిస్టమ్స్ డిమాండ్ చేస్తుంటే, ఇంటెల్ క్రిసెంట్ ఐలాండ్ మాత్రం కేవలం 350 వాట్ల (350W) ఎయిర్-కూల్డ్ PCIe డిజైన్‌తో రన్ అవుతుంది. అంటే దీనికి ప్రత్యేకంగా లిక్విడ్ కూలింగ్ అవసరం లేదు, సాధారణ గాలితోనే ఇది చల్లబడుతుంది. ఇందులో ఏకంగా 480GB సామర్థ్యం గల LPDDR5X మెమరీని చేర్చారు. ఇది చాట్‌బాట్‌ల స్థాయిని దాటి స్వయంచాలకంగా నిర్ణయాలు తీసుకునే ఏజెంటిక్ ఎఐ (Agentic AI) సిస్టమ్స్ కోసం ప్రత్యేకంగా ఆప్టిమైజ్ చేయబడింది.

మార్కెట్ ధరల పరంగా చూస్తే, ఎన్విడియా యొక్క ఫ్లాగ్‌షిప్ ఎఐ గ్రాఫిక్స్ కార్డ్ (ఉదాహరణకు H100) ధర మార్కెట్లో సుమారు 25,000 నుండి 40,000 డాలర్ల వరకు పలుకుతోంది. కానీ ఇంటెల్ అందించే ఎఐ యాక్సిలరేటర్ కిట్లు (గౌడీ సిరీస్ మరియు రాబోయే ఆప్షన్లు) ప్రత్యర్థుల ధరలతో పోలిస్తే సగం లేదా మూడో వంతు తక్కువ ధరకే లభిస్తాయని ఇంటెల్ స్పష్టం చేసింది. ఇప్పటికే డెల్ (Dell), లెనోవో (Lenovo), హెచ్‌పీఈ (HPE), అసుస్ (Asus), మరియు సూపర్‌మైక్రో వంటి గ్లోబల్ టెక్ దిగ్గజాలు ఇంటెల్ యొక్క ఈ సరికొత్త తక్కువ ధర, ఎక్కువ కూలింగ్ చిప్‌లను తమ సిస్టమ్స్‌లో అమర్చడానికి పరీక్షలు కూడా ప్రారంభించేశాయి. నిశ్చయంగా ఈ అడుగు ఎఐ హార్డ్‌వేర్ రంగంలో ఇంటెల్‌ను సూపర్ పవర్‌గా మార్చబోతోంది.