ఇటీవల హైదరాబాద్‌ నగరంలో సంచలనం సృష్టించిన 'రిచ్ కిడ్' కేసు మరువకముందే..అలాంటి తరహాలో మరో షాకింగ్ ఘటన వెలుగులోకి వచ్చింది. ఇన్‌స్టాగ్రామ్‌లో బాలికలు, యువతులతో పరిచయం పెంచుకుని... కొద్ది రోజుల్లోనే ప్రేమ పేరుతో దగ్గరవడం... పెళ్లి చేసుకుంటానంటూ నమ్మించడం... అనంతరం లైంగికంగా దోపిడీ చేసి... చివరకు వారిని మోసం చేసి పరారవడం ఇది నిందితుడి నేర శైలి...పలు ఫిర్యాదులు రావడంతో పోలీసులు కేసు నమోదు చేసుకొని రంగంలోకి దిగారు. ఈ కేసులో నిందితుడిగా ఉన్న పవన్ అలియాస్ తరుణ్ కోసం పోలీసులు మూడు నెలలుగా గాలింపు చేపట్టారు. 

చివరకు అతడు సోషల్ మీడియాలో చేసిన ఓ ఇన్‌స్టాగ్రామ్ పోస్ట్ పోలీసులకు కీలక ఆధారంగా మారింది. సాంకేతిక ఆధారాలతో అతని కదలికలను గుర్తించిన బంజారాహిల్స్ పోలీసులు చాకచక్యంగా నిందితుడిని అదుపులోకి తీసుకున్నారు. దర్యాప్తులో వెలుగులోకి వచ్చిన వివరాలు మరింత సంచలనంగా ఉన్నాయి. నిందితుడిపై ఇప్పటికే ఆరు నెలల వ్యవధిలో రెండు పోక్సో కేసులు నమోదైనట్లు పోలీసులు తెలిపారు. అంతేకాదు, ఐదుగురు యువతులతో ప్రేమ వ్యవహారాలు కొనసాగించినట్లు, మరో యువతి ని పెళ్లి చేసుకుంటానని నమ్మించి మోసం చేసినట్లు విచారణలో వెల్లడైంది. పవన్ సోషల్ మీడియానే తన వేటకు వేదికగా మార్చుకున్నాడు. 

ముందుగా ఇన్‌స్టాగ్రామ్‌లో పరిచయం... ఆ తర్వాత ప్రేమ పేరుతో భావోద్వేగాలకు దగ్గరవడం... నమ్మకం పెంచుకుని వ్యక్తిగతంగా కలవడం... చివరకు లైంగిక దాడికి పాల్పడటం... అనంతరం ఫోన్ నంబర్లు మార్చి, సోషల్ మీడియా అకౌంట్లను నిలిపివేసి పరారవడం అతని విధానంగా గుర్తించారు. ఇది మాత్రమే కాకుండా, పవన్‌పై చోరీలు, స్నాచింగ్ వంటి పలు క్రిమినల్ కేసులు కూడా నమోదై ఉన్నట్లు పోలీసులు వెల్లడించారు. 

దీంతో అతని నేరచరిత్రపై ప్రత్యేక దృష్టి సారించిన పోలీసులు, ఇదే తరహాలో మరికొందరు బాధితులు ఉండే అవకాశం ఉందని అనుమానిస్తున్నారు. ఇటీవల వెలుగులోకి వచ్చిన 'రిచ్ కిడ్' కేసు తరహాలోనే ఈ ఘటన లోనూ సోషల్ మీడియాను ఉచ్చుగా మార్చుకుని యువతులను లక్ష్యంగా చేసుకున్న తీరు తీవ్ర ఆందోళన కలిగిస్తోంది. బాధితుల ఫిర్యాదులు, డిజిటల్ ఆధారాలు, నిందితుడి కాల్ డేటా, సోషల్ మీడియా కార్యకలాపాలపై పోలీసులు మరింత లోతుగా దర్యాప్తు కొనసాగిస్తున్నారు.

Insta cheating, Instagram Love, Banjara Hills Police, Social media, Pawan, Tarun, Rich Kid case, Hyderabad police, CP Sajjanar, DGP C.V. Anand