తెలంగాణలో బీజేపీ ఆర్భాటమంతా పైన పటారం లోన లొటారమేనా? తెలంగాణలో అధికారం ఖాయం అంటూ ఆ పార్టీ రాష్ట్ర నేతలు చేస్తున్న ప్రసంగాలకూ, వారికి వత్తాసుగా గొంతు కలుపుతున్న బీజేపీ అగ్రనేతల ప్రసంగాలకూ అనుగుణంగా రాష్ట్రంలో పరిస్థితులు లేవా? ఆ పార్టీ రాష్ట్రంలో అధికారం మాట అటుంచి కనీసం పది, పన్నెండు అసెంబ్లీ స్థానాలలో విజయం సాధించడమే గొప్ప విషయమా? అన్న ప్రశ్నలకు రాజకీయ వర్గాలే కాదు.. కాషాయ శ్రేణులు కూడా ఔననే అంటున్నాయి.

వాస్తవానికి ఇప్పటికిప్పుడు తెలంగాణ అసెంబ్లీకి ఎన్నికలు జరిగానా బీజేపీ రాష్ట్రంలో పది నుంచి పన్నెండు స్థానాలలో విజయం సాధించడమే గొప్ప విషయంగా ఆ పార్టీ శ్రేణులే ఆఫ్ ది రికార్డ్ చేబుతున్నాయి. ఈ విషయం పార్టీ అధిష్ఘానానికి కూడా తెలుసునని అంటున్నాయి. వాస్తవానికి బీజేపీలో గ్రూపులు అసంఖ్యాకంగా ఉన్నాయనీ, అసంతృప్తి జ్వాలలు ఎగసిపడుతున్నాయనీ అంటున్నారు. పార్టీ రాష్ట్ర నేతలలో ఒకరితో ఒకరికి పడదనీ, ఎవరిదారి వారిదేగా వారి తీరు ఉందనీ పరిశీలకులు సైతం విశ్లేషణలు చేస్తున్నారు.

ఒక విధంగా చెప్పాలంటే, గ్రూపులు, అంతర్గత విభేదాలు, అసమ్మతి విషయంలో రాష్ట్ర బీజేపీ కాంగ్రెస్ కు ఏ మాత్రం తీసుపోదని చెబుతున్నారు. గ్రామీణ స్థాయిలో బీజేపీకి క్యాడరే లేదన్న విషయాన్ని కూడా వారీ సందర్భంగా చెబుతున్నారు.  హైదరాబాద్ వేదికగా జరిగిన పార్టీ జాతీయ కార్యవర్గ సమావేశాలలో అంతా బాగుందన్న బిల్డప్ ఇచ్చినా వాస్తవ పరిస్థితి మాత్రం అందుకు భిన్నంగా ఉందని చెబుతున్నారు.

జాతీయ కార్యవర్గ సమావేశాలలో మాజీ మంత్రి ఈటలకు సముచిత స్థానం ఇచ్చినట్లు కనిపిస్తున్నా, పార్టీ రాష్ట్ర అధ్యక్షుడు బండి సంజయ్ కు ఈటలకు మధ్య పూడ్యలేనంతగా అగాధం ఉందని అంటున్నారు. పేరుకు చేరికల సమన్వయ కమిటీ ఏర్పాటు చేసి దాని బాధ్యతలు ఈటలకు అప్పగించినా.. ఆ దిశగా ఈటల అడుగు ముందుకు వేయడానికి వీల్లేనంతగా పార్టీ రాష్ట్ర అధ్యక్షుడితో విభేదాలు ఉన్నాయని అంటున్నారు. ఇక కేంద్ర మంత్రి కిషన్ రెడ్డి, ఆ పార్టీ సీనియర్ నాయకుడు లక్ష్మణ్ ఇలా ఎవరికి వారు సొంత గ్రూపును మెయిన్ టైన్ చేస్తూ స్వతంత్రంగా వ్యవహరిస్తున్నారని పార్టీ వర్గాలే చెబుతున్నాయి. మరి బీజేపీ అడుగులు తెలంగాణలో గడపదాటే పరిస్థితిలో లేకపోయినా.. మాటలు ఎందుకు కోటలు దాటుతున్నాయి.

రాష్ట్ర నాయకులు చెబుతున్నదానికి పార్టీ అగ్రనాయకత్వం ఎందుకు తందాన అంటోంది అంటే.. ఇదంతా రాజకీయ వ్యూహంలో భాగమేనని అంటున్నారు. వాస్తవానికి టీఆర్ఎస్ అధినేత తన వ్యూహకర్త పీకే బృందంతో చేయించిన సర్వేలలో కానీ, బీజేపీ నాయకత్వం క్షేత్రస్థాయి పరిశీలనలో కానీ తేలిందేమిటంటే... బీజేపీకి తెలంగాణలో అది చెప్పుకుంటున్నంత సీన్ లేదనీ, ఆ పార్టీ పది నుంచి పన్నెండు అసెంబ్లీ స్థానాలలో కూడా విజయం సాధించడం కష్టసాధ్యమేననీ, అదే సమయంలో కాంగ్రెస్ ను టీఆర్ఎస్కు ప్రత్యామ్నాయంగా జనం భావిస్తున్నారని. అదే సమయంలో ఎవరు అంగీకరించినా, అంగీకరించకున్నా రాష్ట్రంలో తెరాస పలుకుబడి పలుచబడింది.

ప్రభుత్వ వ్యతిరేకత ఆ పార్టీ విజయావకాశాలను బాగా దెబ్బ తీసింది.  అదే సమయంలో కాంగ్రెస్ బలంగా పుంజుకుంది. కేసీఆర్ కు రాష్ట్రంలో ముచ్చటగా మూడో సారి అధికారాన్ని చేపట్టడం ఎలా అవసరమో.. కాంగ్రెస్ ముక్త్ భారత్ అన్న తన లక్ష్యం చేరుకోవడానికి బీజేపీకి కాంగ్రెస్ పుంజుకోకుండా చూడటం అంతే అవసరం. ఇక్కడే ఆ రెండు పార్టీలూ కలిసి రసవత్తర రాజకీయ డ్రామాకు తెరతీశాయని పరిశీలకులు విశ్లేషిస్తున్నారు. తెరాస తెలంగాణలో అధికారంలో ఉంది... కేంద్రంలో బీజేపీ అధికారంలో ఉంది. ఈ రెండూ కలిసి పరస్పర విమర్శలతో కాంగ్రెస్ పుంజుకుంటున్నదన్న సమాచారం ప్రజలకు దూరం చేయడంలో భాగంగా పరస్పర విమర్శల పర్వానికి తెరలేపాయని రాజకీయ పరిశీలకులు అంటున్నారు.

అందుకే కేసీఆర్ నేల విడిచి సాము చేస్తున్నట్లు కనిపించినా రాష్ట్ర రాజకీయాల గురించిన ప్రస్తావన మానేసీ జాతీయ అజెండా పాట ఎత్తుకుని నిత్యం మోడీపైనా, మోడీ సర్కార్ పైనా విమర్శలు గుప్పిస్తుంటే.. బీజేపీ ప్రజా సమస్యల మాట వదిలేసి కేసీఆర్ అవినీతి, కుటుంబ పాలన అంటూ విమర్శల పల్లవి ఎతుకుందని వారు వివరిస్తున్నారు. తమ ప్రచారార్భాటం ద్వారా తెలంగాణలో పోటీ కేవలం బీజేపీ, టీఆర్ఎస్ ల మధ్యే తప్ప కాంగ్రెస్ కు అంత సీన్ లేదన్న ప్రచారాన్ని మరో స్థాయికి తీసుకువెళ్లేందుకు శతథా ప్రయత్నిస్తున్నారు.

అందుకే ముందస్తుకు ఎన్నికలకు నేను రెడీయే అంటూ కేసీఆర్ సవాల్ విసురుతూనే... బీజేపీ అందుకు అనుమతించాలన్న షరతు పెడుతున్నారు. అదే సమయంలో బీజేపీ రాష్ట్ర నాయకులు కూడా ఎర్లీ ఎలక్షన్లకు సై అంటూనే కేసీఆర్ కు మా అనుమతెందుకు అంటూ ప్రశ్నలు గుప్పిస్తూ అసలు విషయాన్ని దాటేస్తున్నారు. ఈ మధ్యలో కాంగ్రెస్ మీడియా సమావేశాలు, టీఆర్ఎస్, బీజేపీలపై విమర్శలకు మీడియాలో పెద్ద ప్రాధాన్యత లేని పరిస్థితి. సరిగ్గా ఇదే టీఆర్ఎస్, బీజేపీలు కోరుకుంటున్నది అని పరిశీలకులు అంటున్నారు.