ఏపీ అసెంబ్లీ సమావేశాలు ఈరోజు ప్రారంభమయ్యాయి. గవర్నర్ నరసింహన్ ఉభయసభలను ఉద్దేశించి ప్రసంగించారు. ప్రసంగం తదుపరి సభ వాయిదా పడింది. అనంతరం సమావేశాల నిర్వహణపై సభాపతి కోడెల శివప్రసాదరావు అధ్యక్షతన శాసనసభా సలహా కమిటీ (బీఏసీ) సమావేశం జరిగింది. ఈ సమావేశంలో ఫిబ్రవరి 8వతేదీ వరకు ఏపీ శాసనసభ బడ్జెట్ సమావేశాలు నిర్వహించాలని బీఏసీ నిర్ణయించినట్లు సమాచార శాఖ మంత్రి కాల్వ శ్రీనివాసులు తెలిపారు. తాజాగా ఆయన మీడియాతో మాట్లాడారు. బీఏసీ సమావేశం వివరాలను మీడియాకు వెల్లడించారు. "5న శాసనసభలో ఓట్‌ ఆన్‌ అకౌంట్ బడ్జెట్‌ను ఆర్థిక మంత్రి యనమల రామకృష్ణుడు ప్రవేశపెట్టనున్నారు. మొత్తం ఏడు రోజులపాటు సభ జరుగనుంది. ఫిబ్రవరి ఒకటో తేదీన విభజన సమస్యలపై సభలో చర్చించి అదే రోజు బ్లాక్ డేగా ప్రకటించనున్నారు. ఫిబ్రవరి 2, 3, 4 తేదీల్లో అసెంబ్లీ సమావేశాలకు సెలవుగా నిర్ణయించారు. ఫిబ్రవరి ఆరో తేదీన గవర్నర్‌ ప్రసంగం ధన్యవాదాల తీర్మానంపై చర్చ జరగనుంది. 8వతేదీన ద్రవ్య వినిమయ బిల్లుకు ఆమోదం తెలిపిన అనంతరం శాసనసభను నిరవధికంగా వాయిదా వేయనున్నారు" అని మంత్రి వివరించారు.