అక్రమాస్తుల కేసులో ఆరోపణలు ఎదుర్కొంటూ చంచల్‌గూడ జైల్లో ఉన్న వైఎస్సార్ కాంగ్రెస్ పార్టీ అధ్యక్షుడు జగన్మోహన్‌రెడ్డికి తాత్కాలిక బెయిల్ ఇచ్చేందుకు సుప్రీంకోర్టు సోమవారం నిరాకరించింది. జగన్ బెయిల్‌పై కౌంటర్ పిటిషన్ దాఖలు చేయాలని సీబీఐకి సుప్రీం కోర్టు నోటీసులు జారీ చేసింది. తదుపరి విచారణను మే 6వ తేదీకి కోర్టు వాయిదా వేసింది. జగన్ కేసుకు సంబంధించి సోమవారం సుప్రీంకోర్టులో విచారణ జరుగుతున్నప్పుడు సీబీఐ తరఫున న్యాయవాదులు ఎవరూ హాజరుకాలేదు. కేసు ఇన్వేష్టిగేషన్ చేస్తున్న ఎస్.పి. వెంకటేష్ మాత్రమే హాజరయ్యారు. విజిటర్స్ హాలులో కూర్చుని వాదనలు విన్నారు. జగన్ తరఫున న్యాయవాది హరీష్ సాల్వే వాదనలు వినిపించారు.