Home  
Analytical

టీడీపీలో ట్విస్ట్ లే ట్విస్ట్ లు.. భూమా ఔట్, శిల్పా ఇన్!!

  'కుడి ఎడమైతే పొరపాటు లేదోయ్' అనే పాట గుర్తుండే ఉంటుంది. ఇప్పుడిదే పాటని కాస్త మార్చి పాడుకుంటున్నారు మన పొలిటీషియన్స్. 'ఏడాదికో పార్టీ మారితే పొరపాటు కాదోయ్' అని పాడుతున్నారు. ఈరోజుల్లో నాయకులు పార్టీలు మారడం చాలా కామన్ అయిపోయింది. ఇప్పుడు ఏ నాయకుడు ఏ పార్టీలో ఉన్నాడో.. ఎప్పుడు ఏ నాయకుడు ఏ పార్టీలో చేరతాడో తెలుసుకోవడం చాలా కష్టమైపోతుంది. ప్రస్తుతం నంద్యాల రాజకీయం కూడా అలాగే ఉంది. మంత్రి భూమా అఖిల ప్రియ టీడీపీని వీడి జనసేనలో చేరడానికి సిద్దమయ్యారంటూ కొద్ది రోజులుగా వార్తలొస్తున్నాయి. అఖిల ప్రియ ఈ వార్తలను ఖండించినప్పటికీ.. ఆమె టీడీపీని వీడుతున్నారనే ప్రచారం మాత్రం ఆగట్లేదు. ఇప్పుడు నంద్యాలలో మరో వార్త కూడా చక్కర్లు కొడుతోంది. అదేంటంటే అఖిల ప్రియ టీడీపీని వీడటానికి సిద్ధమయ్యారని వార్తలు రావడంతో.. శిల్పా బ్రదర్స్ టీడీపీలో చేరడానికి సిద్దమయ్యారట. 2014 ఎన్నికల సమయంలో భూమా ఫ్యామిలీ వైసీపీలో ఉంటే.. శిల్పా ఫ్యామిలీ టీడీపీలో ఉన్నారు. 2014 లో నంద్యాల అసెంబ్లీ నుంచి వైసీపీ తరుపున భూమా నాగిరెడ్డి, టీడీపీ తరుపున శిల్పా మోహన్ రెడ్డి బరిలోకి దిగారు. ఆ ఎన్నికల్లో భూమా నాగిరెడ్డి విజయం సాధించారు. తరువాత భూమా ఫ్యామిలీ వైసీపీని వీడి టీడీపీలో చేరింది. భూమా నాగిరెడ్డి ఆకస్మిక మరణంతో నంద్యాలలో 2017 లో ఉపఎన్నికలు జరిగాయి. ఆ ఎన్నికల్లో చంద్రబాబు శిల్పాని కాదని భూమా ఫ్యామిలీకే టికెట్ ఇవ్వడానికి మొగ్గుచూపారు. భూమా బ్రహ్మానంద రెడ్డికి టికెట్ ఇచ్చారు. దీంతో శిల్పా టీడీపీని వీడి వైసీపీలో చేరి.. వైసీపీ తరుపున బరిలోకి దిగారు. అయితే ఉపఎన్నికల్లో కూడా శిల్పా ఓడిపోయారు. ప్రస్తుతం వైసీపీలో కూడా శిల్పా పరిస్థితి బాగాలేదని తెలుస్తోంది. ఎంఐఎం రాబోయే ఎన్నికల్లో వైసీపీకి మద్దతిస్తామని ప్రకటించిన విషయం తెలిసిందే. మైనార్టీలు అధికంగా ఉండే నంద్యాల అసెంబ్లీ సీటును ఎంఐఎం ఆశిస్తున్నట్లు తెలుస్తోంది. ఇప్పటికే ఈ విషయంపై చర్చలు జరగగా వైఎస్ జగన్ కూడా సానుకూలంగా స్పందించినట్లు తెలుస్తోంది. దీంతో శిల్పా సందిగ్ధంలో పడ్డారు. నంద్యాల టికెట్ ఎంఐఎంకి ఇస్తే తన పరిస్థితి ఏంటని ఆలోచనలో పడ్డ శిల్పాకి.. భూమా కుటుంబం టీడీపీని వీడనుందనే వార్త కొత్త ఆశ తీసుకొచ్చిందట. నంద్యాల టికెట్ ఇస్తానంటే టీడీపీలో చేరడానికి సిద్దమనే సంకేతాలు కూడా ఇచ్చినట్లు తెలుస్తోంది. మరి భూమా ఫ్యామిలీ.. అఖిల ప్రియ చెప్పినట్లు టీడీపీలోనే ఉంటుందా? లేక టీడీపీని వీడి శిల్పా ఫ్యామిలీకి రూట్ క్లియర్ చేస్తుందో చూడాలి.

సంక్రాంతి తరువాత టీడీపీలోకి చేరికలే చేరికలు!!

  ఏపీలో ఎన్నికల సమయం దగ్గర పడుతుండటంతో ప్రధాన పార్టీలన్నీ పార్టీలో చేరికలపై దృష్టి పెట్టాయి. ముఖ్యంగా అధికార పార్టీ టీడీపీ ప్రత్యేక దృష్టి పెట్టింది. ఇన్నిరోజులు ప్రభుత్వ కార్యక్రమాలు, అభివృద్ధి పనులపైనే ఎక్కువ దృష్టి పెట్టిన చంద్రబాబు.. ఎన్నికల సమయం దగ్గరపడుతుండటంతో ఇక నుంచి పార్టీ కార్యకలాపాలపైన ప్రత్యేక దృష్టి సారించనున్నట్లు తెలుస్తోంది. ముఖ్యంగా పార్టీలో చేరికలపై దృష్టి పెట్టినట్లు తెలుస్తోంది. అభ్యర్థుల ఎంపిక, పార్టీ బలోపేతం వంటి అంశాలపై చంద్రబాబు క్షుణ్ణంగా అధ్యయనం చేస్తున్నారు. పార్టీ ఎక్కడ బలహీనంగా ఉంది. వైసీపీ, జనసేన పార్టీల ప్రభావం ఉన్నచోట ప్రత్యామ్నాయంగా ఎవరిని తెరపైకి తీసుకురావాలి అనే అంశాలపై ఇప్పటికే చంద్రబాబు ఫోకస్ పెట్టారు. మాజీ ఎమ్మెల్యే కాండ్రు కమల, సూపర్ స్టార్ కృష్ణ సోదరుడు ఘట్టమనేని ఆది శేషగిరిరావు, మాజీమంత్రి అహ్మదుల్లా, మాజీమంత్రి కొణతాల రామకృష్ణ, మాజీ ఎంపీ సబ్బం హరిలను పార్టీలోకి రావాలంటూ ఆహ్వానం పలికారు. అందులో భాగంగా మాజీ ఎమ్మెల్యే కాండ్రు కమల టీడీపీలో చేరతానని చంద్రబాబుకు స్పష్టం చేశారు. టీడీపీ సముచిత స్థానం కల్పిస్తానని చంద్రబాబు సైతం ఆమెకు హామీ ఇచ్చారు. అదేవిధంగా సూపర్ స్టార్ కృష్ణ సోదరుడు ఘట్టమనేని ఆది శేషగిరిరావు సైతం త్వరలోనే టీడీపీలో చేరనున్నారు. ఇటీవలే వైసీపీకి రాజీనామా చేసిన ఆయన సంక్రాంతి తర్వాత టీడీపీలో చేరతారని ప్రచారం జరుగుతుంది. మాజీమంత్రి అహ్మదుల్లా సైతం అధికార టీడీపీలో చేరేందుకు రంగం సిద్ధం చేసుకుంటున్నట్లు తెలుస్తోంది. కడప జిల్లాకు చెందిన అహ్మదుల్లా వైఎస్ రాజశేఖర్ రెడ్డి హయాంలో మైనారిటీ సంక్షేమ శాఖ మంత్రిగా పనిచేశారు. ముస్లిం సామాజిక వర్గంలో మంచి పట్టున్న నేపథ్యంలో ఆయన్ను టీడీపీలోకి ఆహ్వానించినట్లు సమాచారం. త్వరలోనే అహ్మదుల్లా టీడీపీలో చేరనున్నారని జోరుగా ప్రచారం సాగుతోంది. అనకాపల్లి మాజీ ఎంపీ సబ్బం హరి సైతం టీడీపీలో చేరేందుకు ఆసక్తి  చూపుతున్నారు. ఆయన టీడీపీలో చేరడానికి సిద్ధంగా ఉన్నారని ఎప్పటి నుంచో వార్తలొస్తున్నాయి. ఇప్పటికే పలు అంశాల్లో చంద్రబాబును సబ్బం హరి ప్రశంసిస్తూ వస్తున్నారు. పలుమార్లు కలిసి అభినందించారు కూడా. ఇటీవలే డిసెంబర్ 31న చంద్రబాబును ఆయన నివాసంలో సబ్బం హరి కలిశారు. తాను టీడీపీలో చేరతానని స్పష్టం చేసినట్లు తెలుస్తోంది. ఇకపోతే మాజీ మంత్రి కొణతాల రామకృష్ణ సైతం టీడీపీలో చేరాలని భావిస్తున్నట్లు సమాచారం. ఇప్పటికే పలుమార్లు చంద్రబాబు పని తీరును మెచ్చుకున్న కొణతాల.. జనవరి 18న టీడీపీలో చేరుతున్నారని ప్రచారం జరుగుతోంది. అదేవిధంగా కమెడియన్ అలీ కూడా త్వరలోనే టీడీపీ తీర్థం పుచ్చుకోబోతున్నట్లు తెలుస్తోంది. మొత్తానికి సంక్రాంతి తరువాత టీడీపీలోకి భారీగానే చేరికలు ఉండేలా ఉన్నాయి.

జేసీకి వార్నింగ్ ఇచ్చిన సీఐకి వైసీపీ ఎంపీ టికెట్!!

  సీఐ గోరంట్ల మాధవ్. కొద్ది రోజుల క్రితం ఈ పేరు వార్తల్లో మారుమోగిపోయింది. ఏకంగా అధికార పార్టీ ఎంపీకే మీసం మెలేసి వార్నింగ్ ఇవ్వడంతో ఈయన పేరు వార్తల్లో బాగా వినిపించింది. అనంతపురం జిల్లాలో ప్రబోధానంద స్వామి గొడవలో ఎంపీ జేసీ దివాకర్‌రెడ్డి పోలీసులపై చేసిన అనుచిత వ్యాఖ్యలతో సీఐ మాధవ్ తెరపైకి వచ్చారు. పోలీసులపై జేసీ చేసిన వ్యాఖ్యలని మాధవ్ తీవ్రంగా తప్పుబట్టారు. పోలీసుల జోలికి వస్తే నాలుక కోస్తానంటూ మీసం మెలేసి మరీ వార్నింగ్ ఇచ్చారు. ఈ విషయం అప్పట్లో పెద్ద హాట్ టాపిక్ అయింది. అయితే సీఐ మాధవ్ పేరు ఇప్పుడు మళ్ళీ వార్తల్లో వినిపిస్తుంది. ఆయన రాబోయే ఎన్నికల్లో ఎంపీగా పోటీ చేస్తున్నారట. జేసీలాంటి వ్యక్తికే సవాల్ విసిరిన మాధవ్‌పై వైసీపీ కన్నేసింది. కదిరి సీఐగా ఉన్న ఆయనతో వైసీపీ పెద్దలు రహస్యంగా మంతనాలు జరిపారట. హిందూపురం ఎంపీగా మాధవ్‌ను పోటీచేసేలా ఒప్పించాలన్నది ఆ సంప్రదింపుల సారాంశం. అందుకు మాధవ్ సైతం ‍ఒప్పుకున్నారని తెలుస్తోంది. సీఐ పదవికి రాజీనామా చేసి రావాలని వైసీపీ హైకమాండ్ కోరడంతో మాధవ్ అదే పనిలో ఉన్నారు. తన రాజీనామా లేఖను జిల్లా ఎస్పీ ద్వారా డీఐజీకి పంపారట కూడా!   మాధవ్ కురబ సామాజికవర్గానికి చెందినవారు. హిందూపురం పార్లమెంట్ పరిధిలో కురబ, యాదవ ఓటర్లు గణనీయంగా ఉన్నారు. అందుకే మాధవ్‌ను బరిలోకి దింపడం ద్వారా టీడీపీకి గట్టిపోటీ ఇవ్వవచ్చని పార్టీ పెద్దలు అంచనా వేస్తున్నారు. పార్లమెంట్ పరిధిలో బీసీ ఓటర్ల సంఖ్యే ఎక్కువ. బీసీల అండతోనే టీడీపీ తరఫున నిమ్మల కిష్టప్ప రెండుసార్లు గెలిచారు. దీంతో టీడీపీ వెంట ఉన్న బీసీలకు గాలం వేయడానికే మాధవ్ పేరును వైసీపీకి తెరపైకి తీసుకువచ్చిందని పరిశీలకులు అంటున్నారు. అయితే మాధవ్‌ను పార్టీలోకి చేర్చుకుని టికెట్ ఇవ్వకుండా ఆయనను బలిపశువును చేస్తారమోనన్న అనుమానాలు కూడా వ్యక్తమవుతున్నాయి. ఇప్పటికే పలువురిని టికెట్ ఇస్తామని చెప్పి పార్టీలో చేర్చుకున్న తర్వాత వారికి హ్యాండ్‌ ఇచ్చిన ఘటనలున్నాయి. అందుకే మాధవ్ విషయంలో ఇలా జరుగుతుందేమో అనే సందేహాలు వ్యక్తమవుతున్నాయి. చూడాలి మరి మాధవ్‌ వ్యవహారం వచ్చే రోజుల్లో ఏ మలుపు తిరుగుతుందో!

టీడీపీ కి బిగ్ షాక్.. జనసేనలోకి మంత్రి అఖిల ప్రియ?

  ఏపీలో ఎన్నికల సమయం దగ్గరపడుతున్న వేళ అధికార పార్టీ టీడీపీకి షాక్ ఇచ్చే వార్త ఒకటి చక్కర్లు కొడుతోంది. మంత్రి అఖిల ప్రియ టీడీపీకి గుడ్ బై చెప్పి.. త్వరలో జనసేన తీర్థం పుచ్చుకోవడానికి సిద్దమైనట్లు వార్తలు వినిపిస్తున్నాయి. త‌ల్లి శోభా నాగిరెడ్డి మ‌ర‌ణంతో ఉపఎన్నిక‌ల ద్వారా వైసీపీ తరుపున అఖిల ప్రియ ఆళ్ల‌గ‌డ్డ ఎమ్మెల్యే అయ్యారు. తరువాత తండ్రి భూమా నాగిరెడ్డితో క‌లిసి వైసీపీ నుండి టీడీపీలోకి చేరారు. ఆ త‌రువాత తండ్రి ఆకస్మికంగా మ‌ర‌ణించారు. కొద్ది కాలానికి అఖిల ప్రియ మంత్రి అయ్యారు. అయితే మంత్రిగా ఉన్న అఖిల ప్రియ అంద‌రినీ కలుపుకొని పోవడంలో స‌క్సెస్ కాలేక పోయార‌నే భావ‌న ఉంది. దీంతో జిల్లాలోని టీడీపీ నేతలే అఖిలకు వ్య‌తిరేకంగా పావులు క‌దుపుతున్నారు. దీంతో అఖిల ప్రియ సైతం పార్టీ నేత‌ల తీరుపై అస‌హ‌నంతో ఉన్నారు. ఈ నేపథ్యంలో అఖిల ప్రియ పార్టీ మారుతారంటూ కర్నూల్ జిల్లాలో జోరుగా ప్రచారం జ‌రుగుతోంది. టీడీపీలో త‌నకు వ్య‌తిరేకంగా నేత‌లు ప‌ని చేస్తున్నా.. అధినాయ‌క‌త్వం వారికి ప్రాధాన్య‌త ఇవ్వ‌టం పై అఖిల ప్రియ అసంతృప్తితో ఉన్న‌ట్లు సమాచారం. దీనికి తోడు వ‌చ్చే ఎన్నిక‌ల్లో భూమా బ్ర‌హ్మానంద‌రెడ్డిని ఆళ్ల‌గ‌డ్డ నుండి టీడీపీ బ‌రిలోకి దింపుతోంద‌ని పార్టీ వ‌ర్గాల స‌మాచారం. నంద్యాల నుండి మైనార్టీ అభ్యర్దికి అవ‌కాశం ఇస్తార‌ని చెబుతున్నారు. క‌ర్నూలు ఎమ్మెల్యేగా అఖిల ప్రియ మేన‌మామ సిట్టింగ్ ఎమ్మెల్యేగా ఉన్నారు. దీంతో భూమా కుటుంబం నుండి బ్ర‌హ్మానంద‌రెడ్డికి మాత్ర‌మే టిక్కెట్ ద‌క్కుతుందంటూ పార్టీలో ప్రచారం జరుగుతోంది. పార్టీలో జ‌రుగుతున్న ప‌రిణామాలపై అగ్ర‌హంతో ఉన్న అఖిల ప్రియ.. కర్నూల్ జిల్లా ప‌ర్య‌ట‌నకు సీఎం చంద్రబాబు వ‌చ్చినా దూరంగా ఉన్నారు. అయితే వ్య‌క్తిగ‌త కార‌ణాల‌తోనే అఖిల ప్రియ సీఎం ప‌ర్య‌ట‌న‌కు దూరంగా ఉన్నార‌ని.. సీఎంకు స‌మాచారం కూడా ఇచ్చార‌ని సన్నిహితులు చెబుతున్నారు. అయినా అఖిల ప్రియ టీడీపీని వీడుతున్నారనే ప్రచారానికి మాత్రం ఫుల్ స్టాప్ పడట్లేదు. అఖిల ప్రియ త్వ‌రలోనే టీడీపీని వీడి.. ఎన్నిక‌ల ముందు జనసేనలో చేరతారని పెద్ద ఎత్తున ప్రచారం జరుగుతుంది. భూమా కుటుంబానికి పవన్ కళ్యాణ్ కుటుంబంతో సన్నిహిత సంబంధాలున్నాయి. శోభా నాగిరెడ్డి 2004 ఎన్నిక‌ల్లో ప్ర‌జారాజ్యం నుండి ఆళ్ల‌గ‌డ్డ ఎమ్మెల్యేగా పోటీ చేసి గెలిచారు. ఆ త‌రువాత వైసీపీలో చేరారు. భూమా దంప‌తుల మ‌ర‌ణం త‌రువాత పవన్ కళ్యాణ్.. వారి పిల్ల‌ల గురించి ప‌లు మార్లు ఆరా తీసేవారట. ఇప్పుడు కర్నూల్ జిల్లా టీడీపీలో జరుగుతున్న పరిణామాల నేపథ్యంలో జనసేన పార్టీలో చేరటం కరెక్ట్ అని అఖిల ప్రియ భావిస్తున్నారట. జనసేనలో అయితే తనకు తగిన గౌరవం, గుర్తింపు దక్కుతాయని.. అందుకే వీలైనంత త్వరగా టీడీపీని వీడి జనసేనలో చేరాలని అఖిల ప్రియ అనుకుంటున్నట్లు తెలుస్తోంది. మరి అఖిల ప్రియ నిజంగా జనసేనలో చేరతారో లేక టీడీపీలోనే ఉంటారో చూడాలి.

జగన్, పవన్ నై నై.. చంద్రబాబుకే అలీ జై!!

  గత కొద్దిరోజులుగా ఏపీ రాజకీయాల్లో బాగా నానుతున్న పేరు అలీ. బాలనటుడిగా సినీరంగ ప్రవేశం చేసిన అలీ.. కమెడియన్ గా ఆకట్టుకొని ప్రేక్షకుల్లో తనకంటూ ప్రత్యేక గుర్తింపు తెచ్చుకున్నారు. అయితే రాజకీయాల్లో మాత్రం అలీ జనాల్ని తెగ కన్ఫ్యూజ్ చేస్తున్నారు. అలీ ఏ పార్టీలో చేరతారో తెలియక ప్రజలు తలలు పట్టుకుంటున్నారు. వైసీపీ, జనసేన, టీడీపీ ఈ మూడు దారుల్లో అలీ పయనం ఎటువైపో అర్ధంగాక ప్రజలు క్వశ్చన్ మార్క్ ఫేస్ లతో చూస్తున్నారు. సినీ ప్రయాణంలో అలీ.. పవన్ కళ్యాణ్ కి అత్యంత సన్నిహితుడు. పవన్ చేసిన మెజారిటీ సినిమాల్లో అలీ నటించాడు. వీరిద్దరూ మంచి స్నేహితులని సాధారణ ప్రేక్షకులకు కూడా తెలుసు. దీంతో అలీ.. పవన్ స్థాపించిన జనసేన పార్టీలో చేరతారని భావించారంతా. కానీ అలీ ఎందుకో జనసేనకు దూరం పాటిస్తూ వచ్చారు. సర్లే అలీ రాజకీయాలకు దూరంగా ఉండాలని భావిస్తున్నారేమో అనుకున్నారు. కానీ అనూహ్యంగా అలీ వైసీపీ అధినేత జగన్ తో భేటీ అయ్యారు. దీంతో అలీ వైసీపీలో చేరుతున్నారంటూ వార్తలు మొదలయ్యాయి. ఇదేంటి పవన్ జనసేన ఉండగా.. అలీ వైసీపీ వైపు ఎందుకు చూస్తున్నారు? అంటూ ఒకటే చర్చలు. ఒకవైపు అలా చర్చలు జరుగుతుండగానే మరోవార్త బయటికి వచ్చింది. అదే పవన్ తో అలీ భేటీ. ఇంకేముంది అలీ 'స్నేహమేరా జీవితం.. స్నేహమేరా శాశ్వతం' అంటూ పవన్ వైపు వచ్చారు. త్వరలో జనసేనలో చేరతారు అంటూ చర్చలు మొదలయ్యాయి. అబ్బే.. ఇంతటితో ఆగితే ఏం మజా ఉంటుంది. సస్పెన్స్ థ్రిల్లర్ సినిమాలో లాగా ఇంకో పెద్ద ట్విస్ట్ వచ్చింది. ప్రొడ్యూసర్ అశ్వనీదత్ తో కలిసి అలీ.. చంద్రబాబుతో భేటీ అయ్యారు. ఇప్పుడు అలీ టీడీపీలో చేరుతున్నారంటూ వార్తలు. ఇలా ఈ మూడు పార్టీలలో అలీ ఏ పార్టీకి జై కొడతారో అర్థంగాక జనాలు జుట్టు పీక్కుంటున్నారు. అయితే ప్రస్తుత పరిస్థితులు చూస్తుంటే అలీ టీడీపీ వైపే మొగ్గుచూపే అవకాశాలు కనిపిస్తున్నాయి. జనసేన మొదటిసారి ఎన్నికల బరిలో నిలుస్తుంది. రాబోయే ఎన్నికల్లో జనసేన అధికారంలోకి వచ్చే అవకాశాలు చాలా తక్కువున్నాయి. ఇక వైసీపీ విషయానికొస్తే.. టికెట్ విషయంలో అలీకి ఆ పార్టీ నుంచి స్పష్టమైన హామీ రాలేదని తెలుస్తోంది. అసలు ప్రస్తుతం అలీ రాజకీయాల్లోకి రావాలనుకునేది ఎన్నికల బరిలోకి దిగడానికి. నిజానికి అలీ గతంలోనే టీడీపీ తరుపున పోటీ చేయాలనుకున్నారు. కానీ కేవలం ప్రచారానికే పరిమితమయ్యారు. కానీ ఈసారి ఎన్నికల బరిలోకి దిగాలని ఫిక్స్ అయ్యారు. అందుకే ఆయనికి గతంలో ఉన్న టీడీపీ సత్సంబంధాలతో చంద్రబాబుతో భేటీ అయ్యారు. అంతేకాదు ఆయనికి టీడీపీ నుంచి టికెట్ హామీ కూడా వచ్చినట్లు సమాచారం. అలీ టీడీపీ తరుపున మైనార్టీలు ఎక్కువగా ఉండే గుంటూరు 1 నుంచి పోటీ చేసే అవకాశముందని తెలుస్తోంది. మరి అలీ టీడీపీలో చేరతారో లేక ఇంకేమైనా ట్విస్ట్ ఇస్తారో చూడాలి.

ఏపీ ఎన్నికలు.. 50 కోట్లు ఖర్చు పెట్టేవారికే ఎమ్మెల్యే టికెట్

  ఒకప్పుడు ఎమ్మెల్యే టికెట్ ఇవ్వాలంటే.. ఆ వ్యక్తికి ప్రజల్లో మంచి పేరుందా? ప్రజలకు సేవ చేస్తాడా? అని పార్టీలు ఆలోచించేవి. కానిప్పుడు పరిస్థితి పూర్తిగా మారిపోయింది. ప్రత్యర్థి పార్టీ అభ్యర్థి కంటే ఎక్కువ ఖర్చు చేయగలడా? లేదా? అని పార్టీలు ఆలోచిస్తున్నాయి. ఆలోచించడం ఏంటి.. అలా ఖర్చు చేయగలిగిన వారికే టిక్కెట్లు ఇస్తున్నాయి. మరో నాలుగు నెలల్లో ఏపీలో ఎన్నికలు జరుగనున్న విషయం తెలిసిందే. ప్రస్తుతం ఏపీలో కూడా ఎమ్మెల్యే టిక్కెట్లు కోట్ల రూపాయలు ఖర్చు పెట్టగల వారికే దక్కేలా కనిపిస్తున్నాయి. రాబోయే ఎన్నికల్లో ఏపీలో టీడీపీ, వైసీపీ మధ్య ప్రధాన పోటీ జరిగే అవకాశాలున్నాయి. ప్రస్తుతం అధికారంలో ఉన్న టీడీపీ ఎలాగైనా అధికారం నిలబెట్టుకోవాలని చూస్తుంది. మరోవైపు ప్రతిపక్ష వైసీపీ కూడా ఎలాగైనా అధికారం దక్కించుకోవాలని చూస్తోంది. ఈసారి ఎన్నికల్లో ఓడిపోతే పార్టీ భవిష్యత్తుకే ప్రమాదమని వైసీపీ భావిస్తోంది. అందుకే రాబోయే ఎన్నికలను వైసీపీ చాలా సీరియస్ గా తీసుకుంది. అందుకే టీడీపీకి ధీటుగా ఆర్థికంగా బలమైన అభ్యర్థులను నిలబెట్టాలని చూస్తోంది. మొన్నామధ్య వైసీపీ అధినేత జగన్.. పార్టీలో కష్టపడేవారి కంటే ఎన్నికల్లో ఖర్చుపెట్టగలిగే వారికే టిక్కెట్లు ఇవ్వాలని భావిస్తున్నట్లు వార్తలొచ్చిన విషయం తెలిసిందే. 'నిప్పు లేనిదే పొగ రాదు' అన్నట్టు ప్రస్తుత పరిస్థితులు చూస్తుంటే ఆ వార్తలు నిజమే అనిపిస్తోంది. టీడీపీకి దాదాపు అన్ని నియోజకవర్గాల్లో బలమైన అభ్యర్థులు ఉంటారు. వారిని ఓడించాలంటే అంతకన్నా బలమైన అభ్యర్థులను బరిలోకి దింపాలి. అందుకే వైసీపీ నియోజకవర్గాన్ని బట్టి 25 నుంచి 50 కోట్ల వరకు ఖర్చు పెట్టగలిగే వారికే టిక్కెట్లు ఇవ్వాలని భావిస్తోందట. అయితే ఇలా పార్టీలు పోటాపోటీగా ఖర్చు పెట్టగలిగే అభ్యర్థులను బరిలోకి దింపాలి అనుకోవడం.. నిజంగా పార్టీ కోసం కష్టపడే, ప్రజలకు సేవ చేసే మధ్యతరగతి నాయకులకు బాధ కలిగించే విషయమనే చెప్పాలి. బడాబాబులకు టికెట్ ఇస్తే ఖర్చు చేస్తారు. గెలిస్తే సంబరాలు చేసుకుంటారు. తరువాత అవకాశాన్ని బట్టి పార్టీ కూడా మారుతారు. కానీ పార్టీనే నమ్ముకున్న మధ్యతరగతి నాయకులు అలా కాదు. టికెట్ వచ్చినా రాకపోయినా.. పార్టీ అధికారంలో ఉన్నా లేకపోయినా పార్టీలోనే ఉంటారు. పార్టీకోసం కష్టపడతారు. ఇప్పుడు ఏపీలో ప్రధాన పార్టీలు డబ్బు ఖర్చు పెట్టగలిగే వారికే టిక్కెట్లు ఇవ్వాలని చూస్తున్నాయని వార్తలొస్తున్న నేపథ్యంలో.. పార్టీని నమ్ముకొని ఇన్నాళ్లు పార్టీ కోసం పనిచేసిన మధ్యతరగతి నేతలు టికెట్ రాదని తెలిసి బాధపడుతున్నప్పటికీ.. పార్టీని వీడే ఆలోచనలో లేరు. మరి ఇప్పటికైనా ప్రధాన పార్టీలు ఖర్చు పెట్టేవారికి కాదు.. కష్టపడి పనిచేసేవారికి టిక్కెట్లు ఇవ్వాలని మనసు మార్చుకుంటాయేమో చూడాలి.

కేసీఆర్ బాటలో జగన్.. టార్గెట్ వందసీట్లు.. వ్యూహం ఫలిస్తుందా?

  తెలంగాణలో కేసీఆర్ అనుసరించిన వ్యూహాన్నే ఏపీలో ప్రతిపక్ష నేత వైఎస్ జగన్ అనుసరించాలని చూస్తున్నారు. కేసీఆర్ అసెంబ్లీ రద్దు చేసి ముందస్తుకు వెళ్లారు. అంతేకాదు అందరికంటే ముందుగా ఒకేసారి ఏకంగా 105 మంది అభ్యర్థులను ప్రకటించారు. దీనివల్ల అసంతృప్తి నేతలను బుజ్జగించడానికి ఎక్కువ సమయం దొరికింది. అలాగే మిగతా పార్టీలకంటే ముందుగా ప్రచారం మొదలు పెట్టి ప్రజల్లోకి త్వరగా వెళ్లే అవకాశం దొరికింది. మొత్తానికి కేసీఆర్ వ్యూహం ఫలించి తెలంగాణ అసెంబ్లీ ఎన్నికల్లో టీఆర్ఎస్ ఘన విజయం సాధించింది. ఇప్పుడు ఇదే వ్యూహాన్ని ఏపీలో అమలు చేయాలని జగన్ భావిస్తున్నారు.   ఏప్రిల్-మే నెలల్లో జరగనున్న అసెంబ్లీ ఎన్నికలకు సంబంధించి వైసీపీ ఈ సారి ఒకే దఫా వంద సీట్లలో అభ్యర్ధులను ప్రకటించాలని టార్గెట్ పెట్టుకున్నట్లు తెలుస్తోంది. ఈ ప్రకటన కూడా అతి త్వరలోనే ఉండే అవకాశం ఉందని సమాచారం. 'ప్రజా సంకల్ప యాత్ర' పేరుతో జగన్ చేప్పట్టిన పాదయాత్ర ఈ నెల 9 తేదీన శ్రీకాకుళం జిల్లాలోని ఇచ్చాపురంలో ముగియనుంది. అదేరోజు జగన్ అభ్యర్థులను ప్రకటించే అవకాశం ఉన్నట్లు తెలుస్తోంది. 175 సీట్లు ఉన్న ఏపీలో ఒకేసారి వంద సీట్లలో అభ్యర్ధులను ప్రకటించటం ద్వారా జగన్ ఎన్నికలకు ముందస్తు ఏర్పాట్లు చేసుకోవాలని నిర్ణయించుకున్నట్లు సమాచారం. ఇలా ముందుగా అభ్యర్ధుల ప్రకటన పార్టీకి లాభిస్తుందని.. ప్రచారానికి కావాల్సినంత సమయం ఇచ్చినట్లు అవుతుందనే అభిప్రాయంతో జగన్ ఉన్నారు. మిగిలిన 75 సీట్లకు సంబంధించి అభ్యర్ధుల ఎంపిక విషయంలో ఆచితూచి అడుగు వేయాలని.. పరిస్థితులకు అనుగుణంగా ఈ సీట్లలో నిర్ణయం తెసుకోవాలని చూస్తున్నట్లు తెలుస్తోంది. అయితే తెలంగాణ ఫార్ములా ఏపీలో పనిచేస్తుందని చెప్పటానికి లేకపోయినా.. అభ్యర్ధి ప్రజల్లోకి వెళ్ళటానికి, తమ ప్రత్యర్ధుల కంటే ముందుగా ప్రచారం చేసుకోవటానికి ఇది పనికొస్తుందన్న విషయంలో ఎలాంటి సందేహం లేదు. ఈ సారి వైసీపీలో టిక్కెట్ల కేటాయింపు కూడా పక్కాగా గెలుపు అవకాశాలు ఉన్నవారికే ఇవ్వాలని చూస్తున్నట్లు తెలుస్తోంది. అలాగే ఏదైనా కారణంగా టిక్కెట్ నిరాకరించాల్సి వస్తే.. అలాంటి నేతలతో జగన్ స్వయంగా మాట్లాడి బుజ్జగింపులు కూడా చేయటానికి ప్లాన్ రెడీ చేసుకుంటున్నారని తెలుస్తోంది. చూద్దాం మరి జగన్ వ్యూహం ఎంతవరకు ఫలిస్తుందో.

మళ్ళీ నువ్వే రావాలి.. నిజంగా ప్రజలు కోరుకుంటున్నారా?

  గత ఎన్నికల్లో ఏపీ ప్రజల్లోకి.. ముఖ్యంగా యువతలోకి బలంగా దూసుకుపోయిన స్లోగన్ 'బాబు రావాలి.. జాబు రావాలి'. టీడీపీ కార్యకర్తల నుంచి సామాన్య ఓటర్ల వరకు అందరి నోట ఈ మాట బాగా వినిపించింది. ఏపీ ప్రజలు చంద్రబాబుని నమ్మారు.. దానికి తగ్గట్లే అధికారం కట్టబెట్టారు. చంద్రబాబు కూడా ప్రజల నమ్మకాన్ని నిజం చేస్తూ ఈ నాలుగున్నరేళ్లలో చాలా సాధించారు. ప్రపంచ స్థాయిలో రాజధాని నిర్మాణానికి పూనుకున్నారు. అలాగే పోలవరం పనులు పరుగులు పెట్టిస్తున్నారు. కియా మోటార్స్, టిసిఎల్ కంపెనీలు తీస్కోచ్చారు. రాయలసీమకు నీళ్లిచ్చారు. రీసెంట్ గా కడప స్టీల్ ప్లాంట్ కి శంకుస్థాపన కూడా చేసారు. గొప్ప రాజధాని నిర్మాణం కావాలన్నా, పెద్ద కంపెనీలు రావాలన్నా మళ్ళీ బాబే రావాలని టీడీపీ కార్యకర్తలు నమ్ముతున్నారు. అందుకే గతంలో 'బాబు రావాలి.. జాబు రావాలి' అనే స్లోగన్ లాగా ఇప్పుడు 'మళ్ళీ నువ్వే రావాలి' అనే స్లోగన్ ప్రజల్లోకి తీసుకెళ్లే ప్రయత్నం చేస్తున్నారు. మరి ఏపీ ప్రజలు నిజంగా మళ్ళీ చంద్రబాబే రావాలని కోరుకుంటున్నారా? అంటే దాదాపు 64 శాతం మంది మళ్ళీ బాబు రావాలని కోరుకుంటున్నారట. ఏపీలో కొద్ది నెలల్లో ఎన్నికలు జరగనున్నాయి. ఇప్పటికే ప్రధాన పార్టీలన్నీ ఎన్నికల మీద దృష్టి పెట్టడంతో ఏపీలో రాజకీయ వాతావరణం వేడెక్కింది. చంద్రబాబు కూడా ఓ వైపు ప్రభుత్వ కార్యక్రమాలు చూసుకుంటూనే.. మరోవైపు పార్టీ కార్యక్రమాల మీద దృష్టి పెడుతున్నారు. అదే విధంగా ఎమ్మెల్యేల పనితీరు మీద ఎప్పటికప్పుడు సర్వేలు చేపిస్తూ గెలుపు గుర్రాలను వెతుకుతున్నారు. అయితే రీసెంట్ గా చంద్రబాబు నేతృత్వంలో టీడీపీ పెద్దలు ఒక సర్వే నిర్వహించారట. ఈ సర్వేలో డొంక తిరుగుడు లేకుండా ఒకే ఒక ప్రశ్న అడిగారట. అదేంటంటే మళ్ళీ చంద్రబాబు సీఎం కావాలా? వద్దా?. ప్రతిజిల్లాలో దాదాపు నాలుగు వేల మందిని ఈ ప్రశ్న అడిగినట్లు తెలుస్తోంది. వివిధ వర్గాలు, మతాలు, కులాలకు చెందిన వారు ఈ నాలుగు వేల మందిలో ఉన్నారట. మళ్ళీ చంద్రబాబు సీఎం కావాలా? వద్దా? అన్న ప్రశ్నకు దాదాపు 64 శాతం మంది మళ్ళీ చంద్రబాబే సీఎం కావాలని చెప్పారట. 15 శాతం మంది చంద్రబాబు పనితీరు పర్వాలేదని చెప్పగా.. 21 శాతం మంది మాత్రం ఈ ప్రభుత్వం మారిపోవాలని కోరుకున్నారట. మొత్తానికి ఈ సర్వేతో టీడీపీ నేతలు ఫుల్ హ్యాపీగా ఉన్నారట. అయితే చంద్రబాబు సీఎం కావాలని కోరుకునే వారి శాతం ఇంకా పెరగాలని.. అప్పుడు టీడీపీ విజయావకాశాలు మరింత పెరుగుతాయని నేతలు భావిస్తున్నారట. చూద్దాం మరి ఏం జరుగుతుందో.

పవన్ ఒంటరి పోరు.. వైసీపీకి నష్టమేనా?

  రానున్న ఎన్నికల్లో పవన్ కళ్యాణ్ ఒంటరిగా పోటీ చేస్తే టీడీపీకి నష్టమని వైసీపీ శ్రేణులు భావిస్తున్నారు. కానీ లాజిక్ గా ఆలోచిస్తే పవన్ ఒంటరిగా పోటీ చేయడం వల్ల టీడీపీకి ఎంత నష్టమో వైసీపీకి కూడా అంతే నష్టమనే అభిప్రాయం వ్యక్తమవుతోంది. గత ఎన్నికల్లో పవన్ కళ్యాణ్ ప్రత్యక్షంగా ఎన్నికల్లో పోటీ చేయకుండా టీడీపీకి మద్దతిచ్చారు. టీడీపీ విజయం సాధించి అధికారం చేపట్టింది. అయితే ఆ తరువాత పవన్ టీడీపీకి దూరమయ్యారు. టీడీపీ మీద విమర్శల దాడి కూడా చేస్తున్నారు. అంతేనా గత ఎన్నికల్లో టీడీపీ గెలుపుకి తానే కారణమని కూడా చెప్పుకున్నారు. ఇక కొందరు పవన్ అభిమానులు, జన సైనికులు అయితే అసలు పవన్ లేకపోతే టీడీపీ గెలిచేది కాదని అంటున్నారు. మరికొందరైతే పవన్ వల్లే పవన్ సామాజికవర్గానికి చెందిన ఓట్లన్నీ గంప గుత్తుగా టీడీపీకి పడ్డాయని అభిప్రాయపడ్డారు. కానీ వారు చేస్తున్న వ్యాఖ్యల్లో వాస్తవమెంత?. పవన్ టీడీపీకి మద్దతు ఇవ్వడం వల్ల ఖచ్చితంగా టీడీపీకి ప్లస్సే. అది వాస్తవం. కానీ పవన్ వల్లే టీడీపీ గెలిచిందని మాత్రం అనలేం. ఎందుకంటే సాధారణ ఎన్నికలకు ముందు జరిగిన మున్సిపల్, పంచాయితీ ఎన్నికల్లో టీడీపీ దాదాపు స్వీప్ చేసింది. ఆ ఎన్నికల్లో పవన్, బీజేపీలతో దోస్తీ చేయకుండానే మెజారిటీ స్థానాల్లో టీడీపీ జెండా ఎగురవేసింది. ఇక సాధారణ ఎన్నికల్లో టీడీపీకి.. పవన్, బీజేపీ తోడవడంతో టీడీపీ ఘన విజయం సాధిస్తుందని అంతా భావించారు. అయితే టీడీపీ విజయం సాధించింది కానీ అంచనాలను అందుకంటూ ఘన విజయమైతే సాధించలేదనే చెప్పాలి. మున్సిపల్, పంచాయితీ ఎన్నికల్లో ఒంటరిగా పోటీచేసి స్వీప్ చేసిన టీడీపీ.. మరి సాధారణ ఎన్నికల్లో పవన్ బలం తోడైనా వైసీపీని ఎందుకు చిత్తుగా ఓడించలేకపోయింది?. దీన్నిబట్టే అర్థం చేసుకోవచ్చు. పవన్ గెలుపుని డిసైడ్ చేయలేదని. అదేవిధంగా పవన్ చెప్పాడని ఆయన సామాజికవర్గ ఓట్లన్నీ గంప గుత్తుగా టీడీపీకి పడ్డాయనే అభిప్రాయం కూడా సరైనది కాదు. తమ సామాజికవర్గానికి చెందిన వ్యక్తి చెప్పాడని.. ఆ సామాజికవర్గమంతా ఒకే పార్టీకి ఓటేస్తుందా? అంటే డౌటే. గత ఎన్నికల్లో కూడా పవన్ సామాజికవర్గం ఓట్లన్నీ కేవలం టీడీపీకే పడలేదు. టీడీపీ, వైసీపీలకు దాదాపు సమానంగానే పడ్డాయి. అంతెందుకు పవన్ సామాజికవర్గం బలంగా ఉన్న ఒక నియోజకవర్గంలో ఇండిపెండెంట్ విజయం సాధించాడు. మరి పవన్ సామాజికవర్గం ఓట్లన్నీ టీడీపీకి పడితే అక్కడ ఇండిపెండెంట్ ఎలా గెలిచాడు?. దీన్నిబట్టే అర్థంచేసుకోవచ్చు. పవన్ చెప్పాడని వారంతా ఏకపక్షంగా టీడీపీ వైపు చూడలేదని. మరి ఇప్పుడు పవన్ ఒంటరిగా అన్ని స్థానాల్లో బరిలోకి దిగుతాం అంటున్నారు. పవన్ వెంట ఆయన సామాజికవర్గమంతా ఉండకపోవొచ్చు. కానీ దాదాపు 60 శాతం ఉండే అవకాశముంది. అంటే మిగిలిన 40 శాతం ఓట్లను టీడీపీ, వైసీపీ పంచుకోవాలి. గత ఎన్నికల్లో చెరి 50 శాతం పంచుకున్న టీడీపీ,వైసీపీ.. ఈసారి చెరి 20 శాతం పంచుకోవాలి. అంటే పవన్ ఒంటరిగా పోటీ చేయడం వల్ల ఆయన సామాజికవర్గం ఓట్లు రెండు పార్టీలకు సమానంగా దూరమయ్యే అవకాశముంది. దీనివల్ల టీడీపీకి ఎంత నష్టమో వైసీపీకి కూడా అంతే నష్టం జరుగుతుంది.

టీఆర్ఎస్ లో కొత్త డౌట్స్.. హరీష్ రావుని పక్కన పెడుతున్నారా?

  టీఆర్ఎస్ పార్టీలో హరీష్ రావుకి ట్రబుల్ షూటర్ గా ఎంత పేరుందో.. పార్టీలో ట్రబుల్స్ ఫేస్ చేస్తున్నారని కూడా అంతే వార్తలు వినిపిస్తాయి. అసెంబ్లీ ఎన్నికలకు ముందు.. హరీష్ రావు టీఆర్ఎస్ లో ఇమడలేకపోతున్నారని, ఏ క్షణంలోనైనా ఆయన టీఆర్ఎస్ ని వీడతారని విపక్షాలు ఆరోపణలు చేసాయి. కానీ అలాంటిదేం జరగలేదు. టీఆర్ఎస్ లోనే ఉన్నారు. సిద్ధిపేట నుంచి లక్షకు పైగా మెజారిటీతో గెలిచి రికార్డు సృష్టించారు. అంతేనా రేవంత్ రెడ్డి, డి.కె అరుణ వంటి ఎందరో కాంగ్రెస్ సీనియర్ నేతలను హరీష్ రావు తన వ్యూహ చతురతతో మట్టి కరిపించారు. ఇంతవరకు బాగానే ఉంది కానీ ఎన్నికల ఫలితాలు వచ్చిన కొద్దిరోజుల తరువాత మళ్ళీ కొత్త అనుమానాలు మొదలయ్యాయి. ఎన్నికల్లో టీఆర్ఎస్ ఘన విజయం సాధించి అధికారం నిలిబెట్టుకుంది. కేసీఆర్ రెండోసారి సీఎం గా ప్రమాణ స్వీకారం చేసారు. అంతేనా జాతీయ రాజకీయాల మీద దృష్టి పెడుతున్న కేసీఆర్.. టీఆర్ఎస్ పార్టీ వర్కింగ్ ప్రెసిడెంట్ గా కేటీఆర్ ని నియమించి పార్టీ బాధ్యతలు అప్పగించారు. మరి హరీష్ రావు పరిస్థితి ఏంటి? ఆయనకు మంత్రివర్గంలోనైనా చోటు దక్కుతుందా? అంటూ హరీష్ వర్గంలో ఆందోళన మొదలైంది. దీనికి తగ్గట్టే కేసీఆర్.. హరీష్ రావుని పార్లమెంట్ కి పంపాలని చూస్తున్నారంటూ వార్తలు మొదలయ్యాయి. అయితే ప్రస్తుత పరిస్థితి చూస్తుంటే హరీష్ రావుని నిజంగానే రాష్ట్ర రాజకీయాలకు దూరం చేస్తున్నారా? అనే అనుమానాలు వ్యక్తమవుతున్నాయి. ప్రస్తుతం కేసిఆర్ ప్రాజెక్టుల బాట పట్టారు. ప్రాజెక్టు పనులు మరింత వేగవంతం చేసేందుకు సమీక్షలతో వేగం పెంచుతున్నారు. రెండు రోజులపాటు హెలిక్యాప్టర్ మీద కాళేశ్వరం సహా గోదావరిపై నిర్మిస్తున్న ప్రాజెక్టులన్నీ కలియదిరిగారు. ఈ టూర్ లో కేసిఆర్ తో పాటు పలువురు అధికారులు, నేతలు ఉన్నారు. అయితే హరీష్ రావు మాత్రం మిస్ అయ్యారు. హరీష్ రావు మిస్ అవడం వెనుక కారణాలేంటని పార్టీలో చర్చలు జరుగుతున్నాయి. కొందరైతే కావాలనే హరీష్ రావుని పక్కన పెడుతున్నారనే అనుమానాలు కూడా వ్యక్తం చేస్తున్నారు. ‘హరీష్ రావు మొన్నటి వరకు తెలంగాణ ఇరిగేషన్ శాఖకు మంత్రిగా పనిచేశారు. ఆయన రాత్రింబవళ్లు ప్రాజెక్టుల నిర్మాణాన్ని పరుగులు పెట్టించారు. రాత్రిపూట ప్రాజెక్టుల వద్దే నిద్రించి మంత్రుల పని తీరులో కొత్త ఒరవడి సృష్టించారు. ఆయన మంత్రిగా ఉన్న కాలంలో ఎక్కువ సమయం ప్రాజెక్టుల వద్దే ఉన్నారు. మరి అటువంటి నాయకుడు, సీఎం కేసిఆర్ ప్రాజెక్టుల టూర్ లో ఉండకపోవడం పెద్ద వెలితి కాదా? ’ అని కొందరు నేతలు అభిప్రాయపడుతున్నారు. ప్రాజెక్టుల నిర్మాణ బాధ్యతలు ఇంతకాలం భుజాన మోసినందున ఆయనను కూడా ఈ టూర్ లో ఇన్వాల్వ్ చేసి ఉంటే మరింత ఉపయోగకరంగా ఉండేది కదా? అని కొందరు పార్టీ నేతలు చర్చించుకుంటున్నారు. మరి హరీష్ రావును కేసిఆర్ ఈ టూర్ కు పిలవలేదా? లేదంటే పిలిచినా ఆయన రాలేదా అన్నది తేలాల్సి ఉంది. అయితే ఈ వ్యవహారంపై సోషల్ మీడియాలో మాత్రం విమర్శలు వెల్లువెత్తుతున్నాయి. 'కాళేశ్వరం ప్రాజెక్ట్ ని నిర్మిస్తున్న వేగం కంటే హరీష్ రావుని పక్కన పెడుతున్న వేగమే ఎక్కువ' అంటూ ఛలోక్తులు వినిపిస్తున్నాయి. మరి ఈ అనుమానాలకు టీఆర్ఎస్ ఎలా చెక్ పెడుతుందో చూడాలి.

కాంగ్రెస్ కి తలపోటు తెప్పిస్తున్న సినిమా.. బీజేపీ ఫుల్ హ్యాపీ

  లోక్ సభ ఎన్నికలకు ముందు సెమీఫైనల్స్ గా భావించిన ఐదు రాష్ట్రాల అసెంబ్లీ ఎన్నికల్లో కాంగ్రెస్ పార్టీ మూడు రాష్ట్రాల్లో విజయం సాధించి అధికారం దక్కించుకుంది. ఇదే ఉత్సాహంతో లోక్ సభ ఎన్నికల్లో బీజేపీని ఢీ కొట్టేందుకు సిద్ధమవుతోంది. అయితే ఇప్పుడు ఒక్క సినిమా ఒకేఒక్క సినిమా కాంగ్రెస్ పార్టీని బాగా ఇబ్బంది పెడుతోంది. అదే ‘ది యాక్సిడెంటల్‌ ప్రైమ్‌ మినిస్టర్‌’. ప్రధానమంత్రి మీడియా సలహాదారుగా పనిచేసిన సంజయ్ బారు రాసిన 'యాక్సిడెంటల్ ప్రైమ్ మినిస్టర్' పుస్తకం ఆధారంగా ఈ సినిమా తెరకెక్కింది. తాజాగా ఈ సినిమా ట్రైలర్ రిలీజ్ అయింది. ఈ ట్రైలర్ మన్మోహన్ సింగ్ కు, కాంగ్రెస్ పార్టీకి మచ్చ తెచ్చేలా ఉంది. మన్మోహన్ సింగ్ ని ప్రధాని కుర్చీలో కూర్చోబెట్టి తెరవెనుక సోనియా గాంధీ ప్రధానిగా వ్యవహరించినట్లు చూపించారు. మన్మోహన్ తను నిర్ణయాలు తీసుకోవాల్సిన సందర్భాల్లో కూడా ఆయన నిర్ణయాలు తీసుకోవడానికి ఇష్టపడలేదని.. సోనియా చెప్పినట్టు చేయడానికే ప్రాధాన్యత ఇచ్చారని ట్రైలర్ లో చూపించారు. ఇవన్నీ సంజయ్ బారు రాసిన పుస్తకంలో ఉన్నవే. అయితే పుస్తకం చదివినవారు తక్కువుంటారు. కానీ ఇప్పుడు ఈ సినిమా లక్షలు, కోట్ల మందికి చేరే అవకాశముంది. దీనివల్ల మన్మోహన్ కి, కాంగ్రెస్ పార్టీకి దెబ్బే. అందుకే కాంగ్రెస్ ఈ సినిమాను చాలా సీరియస్ గా తీసుకుంది. సినిమాను విడుదలకు ముందే తమకు చూపించాలంటూ కాంగ్రెస్‌ నేతలు డిమాండ్‌ చేస్తున్నారు. ‘ట్రైలర్‌ను చూస్తుంటే నిజాన్ని వక్రీకరించినట్లు అనిపిస్తోంది. దీని వల్ల మా పార్టీ ప్రతిష్ఠకు భంగం కలుగుతోంది. అందుకే సినిమాను ముందే ప్రదర్శించాలి. అభ్యంతరకర దృశ్యాలుంటే వాటిని తొలగించాలి. లేదంటే దేశవ్యాప్తంగా విడుదలను అడ్డుకుంటాం’ అని కాంగ్రెస్‌ నేతలు హెచ్చరిస్తున్నారు. మరోవైపు బీజేపీ మాత్రం పండగ చేసుకుంటుంది. ఈ సినిమా ట్రైలర్‌ను బీజేపీ తన ట్విట్టర్ ఖాతాలో పోస్టు చేస్తూ కాంగ్రెస్‌పై విమర్శలు గుప్పించింది. ‘10 ఏళ్ల సుదీర్ఘకాలం పాటు ఓ కుటుంబం చేతిలో దేశం ఎలా దోపిడీకి గురైందో చూపించే కథ ఇది. వారసుడు సిద్ధమయ్యేంతవరకు ఓ ప్రతినిధిలా మన్మోహన్‌ సింగ్‌ ప్రధాని కుర్చీలో కూర్చున్నారా? ‘ది యాక్సిడెంటల్‌ ప్రైమ్‌ మినిస్టర్‌’ ట్రైలర్‌ను చూడండి. జనవరి 11న సినిమా విడుదలవబోతోంది’ అని ట్వీట్ లో పేర్కొంది. లోక్ సభ ఎన్నికల ముందు ఈ సినిమా కీలక పాత్ర పోషించేలా ఉంది. ఈ సినిమా రీలీజ్ అయితే కాంగ్రెస్ కి ఎంత మైనస్సో, బీజేపీ అంత మైలేజ్ వచ్చేలా కనిపిస్తోంది. అసలు ఈ సినిమా వెనుక బీజేపీ హస్తం ఉందనే ఆరోపణలు కూడా వినిపిస్తున్నాయి. మరి కాంగ్రెస్ ఈ సినిమా నుంచి ఎలా తప్పించుకుంటుందో చూడాలి.

కేసీఆర్ కే నా ఓటు.. షాక్ లో కాంగ్రెస్, చంద్రబాబు

  ఓ వైపు చంద్రబాబు బీజేపీయేతర ఫ్రంట్‌ అంటూ కాంగ్రెస్ తో కలిసి నడుస్తూ మిగతా పార్టీలను ఏకం చేయాలని చూస్తుంటే.. మరోవైపు కేసీఆర్ బీజేపీయేతర, కాంగ్రెసేతర ఫ్రంట్ అంటూ ప్రాంతీయ పార్టీలను ఏకం చేయాలని చూస్తున్నారు. కేసీఆర్‌ ఫెడరల్‌ ఫ్రంట్‌ ప్రయత్నాల్లో భాగంగా ఇప్పటికే నవీన్‌ పట్నాయక్‌, మమతా బెనర్జీలను కలిశారు. వారు ఇంకా తమ వైఖరిపై స్పష్టత ఇవ్వలేదు కానీ.. సమాజ్‌వాదీ పార్టీ అధినేత అఖిలేశ్‌ యాదవ్‌ మాత్రం ఇంకా కేసీఆర్ తో భేటీ కూడా కాకుండానే కేసీఆర్‌ ఫ్రంట్‌ కు మద్దతు ప్రకటించారు. తాజాగా అఖిలేశ్‌ యాదవ్‌ విలేకరుల సమావేశంలో మాట్లాడుతూ.. ‘బీజేపీని ఢీకొనేందుకు ఫెడరల్‌ ఫ్రంట్‌ ఏర్పాటు దిశగా కృషి చేస్తున్న కేసీఆర్‌కు అభినందనలు. కేసీఆర్‌ను కలిసేందుకు త్వరలో హైదరాబాద్‌ వెళుతున్నా. ఆయన దేశంలోని ప్రాంతీయ పార్టీలన్నింటినీ ఒక వేదిక మీదకు తీసుకొచ్చేందుకు తీవ్రంగా కృషి చేస్తున్నారు’ అని కొనియాడారు. తాను కేసీఆర్‌తో ఫోన్లో మాట్లాడానని, 25-26 తేదీల్లో ఢిల్లీలో ఆయనతో భేటీ కావాల్సి ఉందని, వివిధ కారణాల వల్ల ఢిల్లీకి రాలేకపోయానని అఖిలేశ్‌ యాదవ్‌ చెప్పారు. గతంలో కాంగ్రెస్ పార్టీతో దోస్తీ చేసిన అఖిలేశ్ యాదవ్ ఈ మధ్య కాంగ్రెస్ కు దూరం జరుగుతూ వస్తున్నారు. యూపీలో బీఎస్పీ తో కలిసి పోటీ చేసి.. కాంగ్రెస్‌ను యూపీలో అమేథీ, రాయ్‌బరేలీ సీట్లకే పరిమితం చేయాలని చూస్తున్నారు. కానీ కాంగ్రెస్ మాత్రం ఎస్పీ, బీఎస్పీ లతో కలిసి పనిచేయాలనుకుంటుంది. దేశ రాజకీయాల్లో క్రియాశీల పాత్ర పోషించాలని చూస్తున్న అఖిలేశ్ యాదవ్, మాయావతి.. కాంగ్రెస్ ను దూరం పెడుతున్నారు. అందుకేనేమో రాజస్థాన్‌, మధ్యప్రదేశ్‌, ఛత్తీస్‌గఢ్‌లలో కాంగ్రెస్‌ ప్రభుత్వాల ప్రమాణ స్వీకార కార్యక్రమానికి ఆహ్వానించినా ఎస్పీ, బీఎస్పీల అధినేతలు హాజరు కాలేదు. ఇప్పుడు అఖిలేశ్ యాదవ్ అనూహ్యంగా కేసీఆర్ ఫ్రంట్ కు మద్దతు ప్రకటించి అటు కాంగ్రెస్ కు, ఇటు చంద్రబాబుకి బిగ్ షాక్ ఇచ్చారు.

కేసీఆర్.. హరీష్ రావుని రాష్ట్ర రాజకీయాలకు దూరం చేస్తున్నారా?

  కేసీఆర్ వ్యూహాలు రచించడంలో దిట్ట. ప్రత్యర్థుల ఊహలకు అందకుండా ఎత్తులు పైఎత్తులు వేస్తారు. విజయం సాధిస్తారు. ఇప్పటికే ఈ విషయం పలు సందర్భాల్లో రుజువైంది. ఎన్నికలకు కొన్ని నెలల ముందే అసెంబ్లీ రద్దు చేసి ముందస్తుకు వెళ్లి విపక్షాలకు షాక్ ఇచ్చారు. భారీ విజయం సాధించి అంతకన్నా పెద్ద షాక్ ఇచ్చారు. అంతకముందు నుంచే జాతీయస్థాయిలో బీజేపీ, కాంగ్రెస్ పార్టీలకు ప్రత్యాన్మాయంగా ఫెడరల్ ఫ్రంట్ అంటూ హడావుడి చేసిన కేసీఆర్.. అసెంబ్లీ ఎన్నికల సందర్భంగా కాస్త సైలెంట్ అయ్యారు. ఇప్పుడు ఎన్నికలు అయిపోయాయి, పార్టీ కూడా ఘన విజయం సాధించింది. దీంతో ఉత్సాహంగా జాతీయ రాజకీయాలవైపు మళ్ళీ అడుగులు మొదలు పెట్టారు. దానిలో భాగంగానే తనయుడు కేటీఆర్ ని పార్టీ వర్కింగ్ ప్రెసిడెంట్ గా నియమించి పార్టీ బాధ్యతలు అప్పగించారు. అయితే ఇక్కడినుంచే కేసీఆర్ మార్క్ వ్యూహాలు మొదలు కాబోతున్నట్లు తెలుస్తోంది. ఎన్నికల తరువాత కేటీఆర్ ని సీఎం చేసి.. కేసీఆర్ జాతీయ రాజకీయాల్లోకి వెళ్తారంటూ ఎప్పటినుంచే వార్తలు వినిపించాయి. దానికి తగ్గట్టే ఎన్నికల్లో విజయం సాధించిన వెంటనే కేటీఆర్ ని పార్టీ వర్కింగ్ ప్రెసిడెంట్ గా కేసీఆర్ నియమించారు. అంతా అనుకున్నట్లు జరిగితే త్వరలో సీఎంని చేసే అవకాశం కూడా ఉందనే అభిప్రాయం వ్యక్తమవుతోంది. కేసీఆర్ నిర్ణయాన్ని పార్టీ నేతలు ఎవరూ వ్యతిరేకించే అవకాశం లేదు. కానీ హరీష్ రావు వర్గం మాత్రం అసంతృప్తి వ్యక్తం చేసే అవకాశముంది. హరీష్ రావు మొదటి నుంచి పార్టీ కోసం కష్టపడి పనిచేసారు. పార్టీలో బలమైన నేతగా ఎదిగారు. ఆయన రాష్ట్రవ్యాప్తంగా అభిమానులను సంపాదించుకున్నారు. అంతేకాకుండా మొన్న జరిగిన ఎన్నికల్లో లక్షకు పైగా మెజారిటీ సాధించి చరిత్ర సృష్టించారు. మరి ఇలాంటి బలమైన నేత వర్గం అసంతృప్తిలో ఉంటే పార్టీకి నష్టం తప్పదు. ఆ అసంతృప్తి తారాస్థాయికి చేరితే పార్టీలో చీలిక వచ్చే ప్రమాదం కూడా ఉంది. అందుకే కేసీఆర్ తనతో పాటు హరీష్ రావుని కూడా జాతీయ రాజకీయాల్లోకి తీసుకెళ్లాలి అనుకుంటున్నారట. ఇలా చేస్తే కేటీఆర్ కు లైన్ క్లియర్ అయినట్లు ఉంటుంది. అలాగే జాతీయస్థాయిలో రాజకీయం చేయడానికి హరీష్ రావు లాంటి బలమైన నేత తనకి తోడు ఉన్నట్లు ఉంటుందని కేసీఆర్ భావిస్తున్నారట. నాలుగు నెలల్లో లోక్ సభ ఎన్నికలు జరగనున్నాయి. ఆ ఎన్నికల్లో కేసీఆర్ ఎంపీ గా పోటీ చేయనున్నారు. ఆయనతో హరీష్ రావుని కూడా ఎంపీగా బరిలోకి దించాలని చూస్తున్నారట. చూద్దాం మరి రాబోయే రోజుల్లో కేసీఆర్ ఎలాంటి వ్యూహాలతో మందికి వెళ్తారో.

'చంద్రగిరి' పై చంద్రన్న కన్ను

  ఏపీ సీఎం చంద్రబాబు స్వంతగ్రామం నారావారి పల్లె ఉన్న చంద్రగిరి నియోజకవర్గంలో ఈసారి ఎలాగైనా టీడీపీ జెండా ఎగరెయ్యాలని ప్రయత్నాలు మొదలుపెట్టారు. చిత్తూరు జిల్లాలో చంద్రగిరికి ప్రత్యేక గుర్తింపు ఉంది. హేమాహేమీలైన నేతలు ఈ నియోజకవర్గానికి ప్రాతినిధ్యం వహించారు. ఈ నియోజకవర్గం నుంచి చంద్రబాబు 1978లో కాంగ్రెస్ పార్టీ పక్షాన పోటీచేసి గెలిచారు. ఎమ్మెల్యేగా చట్టసభలోకి అడుగుపెట్టారు. తెలుగుదేశం పార్టీని ఎన్‌టీఆర్ స్థాపించిన తర్వాత జరిగిన 1983, 1985, 1994 ఎన్నికల్లో టీడీపీ అభ్యర్ధులు చంద్రగిరిలో విజయం సాధించారు. 1989, 1999, 2004, 2009 ఎన్నికల్లో కాంగ్రెస్‌పార్టీ తరఫున గల్లా అరుణకుమారి నాలుగుసార్లు గెలుపొందారు. 2014లో ఎన్నికల్లో వైసీపీ నుంచి పోటీచేసిన చెవిరెడ్డి బాస్కర్‌రెడ్డి చంద్రగిరిని కైవసం చేసుకున్నారు. నాటి ఎన్నికల్లో కాంగ్రెస్‌కి గుడ్‌బై చెప్పి టీడీపీలో చేరి పోటీచేసిన గల్లా అరుణకుమారిని ఆయన ఓడించారు. గల్లా అరుణకుమారి కాంగ్రెస్ పార్టీ నుంచి టీడీపీలో చేరటంతో స్థానికనేతలు ఆమెకు సహకరించలేదనే అభిప్రాయం అప్పట్లో వ్యక్తమయ్యింది. దీంతో గత ఎన్నికల్లో ఆమె ఓటమి పాలయ్యారు.   ఈ నేపథ్యంలో చంద్రబాబు ఈ దఫా ఎన్నికలపై సీరియస్‌గా దృష్టిపెట్టారు. గత అనుభవం పునరావృతం కాకూడదని భావించారు. అందుకే చంద్రగిరిలో ముందస్తుగా టీడీపీ అభ్యర్థిని ప్రకటించారు.  గల్లా అరుణకుమారి కూడా వచ్చేఎన్నికల్లో చంద్రగిరి నుంచి పోటీచేయడానికి ససేమిరా అనటంతో కొత్త అభ్యర్థిని పోటీకి దింపాల్సిన పరిస్థితి ఏర్పడింది. ఈ తరుణంలో అనేక కోణాల్లో బాబు ఆలోచించారు. చివరికి జిల్లాలో యువనేత, టీడీపీ జిల్లా అధ్యక్షుడయిన పులివర్తి నానిని చంద్రగిరి అభ్యర్థిగా బాబు ప్రకటించారు. రాజకీయ కుటుంబానికి చెందిన నాని వార్డు మెంబరు స్థాయినుంచి ఎదిగారు. 2001లో పులివర్తివారిపల్లెకు సర్పంచ్‌గా ఎన్నికయ్యారు. టీడీపీ తెలుగు యువత జిల్లా అధ్యక్షుడిగా పనిచేశారు. పార్టీ అధికారంలో ఉన్నా లేకున్నా టీడీపీ బలోపేతానికి అలుపెరుగని కృషిచేశారు. ఈ తరుణంలోనే ఆయనపై చంద్రబాబు దృష్టిపడింది. పైగా మంత్రి నారా లోకేశ్‌కు నాని వీరవిధేయుడు. పార్టీ కార్యాలయంలోనే పులివర్తి నాని ఎక్కువ సమయం గడుపుతారు. పార్టీ కార్యకర్తలకు, ప్రజలకు నిత్యం అందుబాటులో ఉంటారు. సమస్యల పరిష్కారం కోసం పాటుపడతారు. ఈ అర్హతల రీత్యా చంద్రబాబుకు నానిపై నమ్మకం పెరిగింది. ఆయన అయితేనే చెవిరెడ్డిపై పోటీచేసి గెలవగల అభ్యర్థి అని చంద్రబాబు భావించారు. చంద్రగిరి అభ్యర్థిగా బాబు తన పేరు ప్రకటించటంతో నాని తన మార్క్‌ రాజకీయం ప్రారంభించారు. నియోజకవర్గంలో చిన్నాచితకగా ఉన్న అసంతృప్తులను కూడగడుతున్నారు. వారిని ఒక తాటిపైకి తీసుకువస్తున్నారు. నియోజకవర్గంలోని ప్రతి గ్రామంలో తిరుగుతున్నారు. ప్రజాసమస్యలను అడిగి తెలుసుకుంటున్నారు. సూటిగా చెప్పాలంటే ఎన్నికల ప్రచారంలోకే ఆయన దిగేశారు. సందర్భం దొరికినప్పుడల్లా వైసీపీ ఎమ్మెల్యే చెవిరెడ్డి వ్యవహారశైలిపై విమర్శనాస్త్రాలు సంధిస్తున్నారు. మరి చెవిరెడ్డి బాస్కర్‌రెడ్డి వ్యూహాత్మక రాజకీయాలకు పెట్టింది పేరు. ఈ నేపథ్యంలో చంద్రగిరిలో చంద్రన్న నిర్ణయం వర్కౌట్ అవుతుందో లేదో వేచి చూద్దాం...!!

'జనసేన'కు మెగా మద్దతు!?

  'జనసేన'కు మద్దతుగా మెగా హీరోలు రంగంలోకి దిగుతున్నారా? తమ మాటల ద్వారా జనసేనాని పవన్ కల్యాణ్ వెనుక తాము ఉన్నామని మెగా ఫ్యామిలీలో యువ హీరోలందరూ చెప్పదలుచుకున్నారా? తాజా పరిణామాలు చూస్తుంటే అవునక తప్పదు. అయితే... ఇక్కడ ఓ విషయం గమనించాలి. మెగా వారసులు నేరుగా రాజకీయ ప్రసంగాలు చేయడం లేదు. సినిమా వేడుకలకు వచ్చినప్పుడు తమ ప్రసంగాల్లో రాజకీయాలను ప్రస్తావించకుండా వదలడం లేదు. ఎవరిపై విమర్శలు చేయడకుండా.. పవన్ 'జనసేన'కు మద్దతుగా మాట్లాడటమో లేదా పవన్‌ని విమ‌ర్శించేవారిపై సుత్తిమెత్తగా విరుచుకు పడటమో జరుగుతుంది. 'పడి పడి లేచె మనసు' ప్రీ రిలీజ్ ఈవెంట్ సోమవారం రాత్రి జరిగింది. దానికి స్టయిలిష్ స్టార్ అల్లు అర్జున్ అతిథిగా వచ్చారు. చంద్రబాబునాయుడు, కేసీఆర్, చిరంజీవి, పవన్ కల్యాణ్... ఎవరినైనా 'గారు' అని సంభోదించాలని చెప్పారు. ఒకరికి గౌరవం ఇవ్వడం తప్పేం కాదన్నారు. అల్లు అర్జున్ స్పీచ్ గమనిస్తే "రాజకీయాల్లోకి వచ్చినంత మాత్రానా గౌరవం ఇవ్వకూడదని ఎవరూ హక్కు ఇవ్వలేదు" అన్నారు. చంద్రబాబునాయుడు, కేసీఆర్ ఎప్పట్నుంచో రాజకీయాల్లో ఉన్నారు. వారితో పోలిస్తే కొత్తగా రాజకీయాల్లోకి వచ్చినది పవన్ కల్యాణే. రాజకీయాల్లో విమర్శలు సహజం. పవన్‌ని ఎంతోమంది విమర్శిస్తున్నారు. కొందరు మాత్రం అసభ్య పదజాలంతో వ్యక్తిగత విమర్శలకు దిగుతున్నారు. అటువంటి వాళ్లకు బన్నీ కౌంటర్ ఇచ్చాడని మెగా టాక్. మెగా ప్రిన్స్ వరుణ్ తేజ్ హీరోగా నటించిన 'అంతరిక్షం' ప్రీ రిలీజ్ ఈవెంట్ మంగళవారం రాత్రి జరిగింది. దీనికి మెగా ప‌వ‌ర్‌స్టార్‌ రామ్‌చ‌ర‌ణ్‌ అతిథిగా వచ్చారు. అమెరికాలో పవన్ ప్రసంగం బావుందని చెప్పారు. వేదిక ముందున్న అభిమానులను ఉద్దేశిస్తూ రామ్ చరణ్ "మీరు వేదికకు అటువైపు ఉన్నారు కాబట్టి అరుస్తున్నారు. నేను ఇటువైపు ఉన్నాను కాబట్టి అరవలేకపోతున్నా. నాకూ మీలా అరవాలని ఉంది" అన్నారు. పవన్ ఏం చెప్పారని కాదు... ఆయన మాటల్లో భావాన్ని ఆదర్శంగా తీసుకోవాలని రామ్ చరణ్ కోరారు. ఫేస్‌బుక్‌లో పవన్ ప్రసంగాన్ని ప్రశంసిస్తూ ఒక పోస్ట్ కూడా పెట్టారు. "నిజమైన ధైర్యం అంటే... భయం లేకపోవడం కాదు. ప్రతిరోజూ భయాన్ని ఎదుర్కోవడం! ఆ భయాన్ని అధిగమించాలంటే... మిమ్మల్ని భయపెట్టే పనినే రోజూ చేయండి. భయంలో మార్పును ఎదుర్కోలేక పోవడమే పెద్ద భయం" అని తాజా అమెరికా పర్యటనలో తన ఉపన్యాసంలో పవన్ చెప్పారు. ఈ మాటలను వదిలేసి కొందరు భగత్ సింగ్ ఆత్మహత్య చేసుకున్నాడని పవన్ చెప్పిన మాటలను హైలైట్ చేస్తూ విమర్శలు చేయడం పట్ల మెగా ఫ్యామిలీ అసంతృప్తిగా ఉందట. ఇంతకు ముందూ పవన్‌ని టార్గెట్ చేస్తూ కొందరు చేసిన టీవీ కార్యక్రమాలపై మెగా ఫ్యామిలీ అసంతృప్తితో ఉంది. త్వరలో ఆంధ్రప్రదేశ్ ఎన్నికలు జరగనున్న నేపథ్యంలో ఇటువంటి విమర్శలకు చెక్ పెడుతూ.. 'జనసేన'కు మద్దతుగా మెగా హీరోలు మాట్లాడే అవకాశాలు ఉన్నాయని సమాచారం.

టీపీసీసీ అధ్యక్షుడిగా రేవంత్ రెడ్డి?

  కాంగ్రెస్ ఈ ఎన్నికల్లో కేసీఆర్ ను ఎలాగైనా ఓడించి అధికారం దక్కించుకోవాలనుకుంది. కేసీఆర్ ను గద్దె దించడమే లక్ష్యంగా టీడీపీ, టీజేఎస్, సీపీఐ పార్టీలతో కలిసి కాంగ్రెస్ ప్రజకూటమి కూడా ఏర్పాటు చేసింది. ఒకానొక దశలో టీఆర్ఎస్, ప్రజకూటమిల మధ్య పోరు నువ్వా నేనా అన్నట్లు సాగుతుంది అనుకున్నారంతా. కానీ ఫలితాలు వార్ వన్ సైడ్ అని తేల్చేశాయి. టీఆర్ఎస్ 88 సీట్లతో ఘన విజయం సాధించి అధికారం నిలబెట్టుకుంది. ప్రజకూటమి మాత్రం కేవలం 21 సీట్లతో సరిపెట్టుకుంది. అందులో కాంగ్రెస్ కి 19 సీట్లు రాగా, టీడీపీకి 2 సీట్లు వచ్చాయి. ఇక టీజెఎస్, సీపీఐ అయితే ఖాతా కూడా తెరవలేదు. ఒకరకంగా చెప్పాలంటే పోటీ ఇస్తుందనుకున్న కూటమి.. టీఆర్ఎస్ చేతిలో చిత్తుగా ఓడిపోయింది. కూటమి ఓటమికి రకరకాల కారణాలు వినిపిస్తున్నాయి. కాంగ్రెస్, టీడీపీల పొత్తుని ప్రజలు స్వాగతించలేదని, అభ్యర్థుల ఎంపిక సరిగా జరగలేదని, అభ్యర్థుల ప్రకటన ఆలస్యమైందని ఇలా ఎవరికీ తోచిన కారణాలు వారు చెప్తున్నారు. అయితే ఈ ఓటమిని కాంగ్రెస్ అధిష్టానం సీరియస్ గా తీసుకున్నట్లు సమాచారం. అవసరమైతే రాష్ట్ర నాయకత్వాన్ని మార్చాలనే ఆలోచనలో కూడా ఉన్నట్లు తెలుస్తోంది. ఎన్నికలకు ముందు.. కూటమి గెలిచినా ఓడినా పూర్తీ బాధ్యత నాదే అని టీపీసీసీ అధ్యక్షుడు ఉత్తమ్ కుమార్ రెడ్డి ప్రకటించారు. అంతేకాదు ఓడిపోతే గాంధీ భవన్ లో అడుగు కూడా పెట్టనని అన్నారు. మరి ఈ మాటలకు ఉత్తమ్ కట్టుబడి ఉన్నారో లేదో తెలీదు కానీ.. పార్టీలోని కొందరు నేతలు మాత్రం నాయకత్వ మార్పు కోరుకుంటున్నట్లు తెలుస్తోంది. ఈ రానున్న ఐదారు నెలల్లో పంచాయతీ, స్థానిక సంస్థలు, సహకార, మున్సిపాల్టీ, పార్లమెంట్ ఇలా వరుసగా ఎన్నికలు ఉన్నాయి. ఓటమి నిరుత్సాహంతో ఉన్న కార్యకర్తలు ఉత్సాహంగా పని చేయాలంటే నాయకత్వ మార్పు జరగాలనే అభిప్రాయం కొందరు నేతలు వ్యక్తం చేస్తున్నారట. ఇప్పటికే అధిష్టానం కూడా ఆ దిశగా ఆలోచిస్తున్నట్లు తెలుస్తోంది. ఒకవేళ టీపీసీసీ అధ్యక్షుడిని మార్చాల్సి వస్తే ఆ పదవి రేవంత్ రెడ్డిని వరించే అవకాశముందనే అభిప్రాయం వ్యక్తమవుతోంది. ఈ ఎన్నికల్లో కాంగ్రెస్ పార్టీ సీనియర్లు దాదాపు ఓడిపోయారు. ఉత్తమ్ కుమార్ రెడ్డి, భట్టి విక్రమార్క వంటి నేతలు మాత్రం తక్కువ మెజారిటీతో బయటపడ్డారు. రేవంత్ రెడ్డి కూడా ఓడిపోయారు. అయితే రేవంత్ రెడ్డికి రాష్ట్రవ్యాప్తంగా పలు నియోజకవర్గాల్లో అభిమానులున్నారు. ప్రభుత్వం మీద ధీటుగా విమర్శలు చేస్తూ ఫైర్ బ్రాండ్ ఇమేజ్ తెచ్చుకున్నారు. అలాంటి దూకుడున్న నేతకి పగ్గాలు అప్పగిస్తే కార్యకర్తల్లో నూతనోత్సాహం వచ్చి చురుగ్గా పనిచేస్తారనే అభిప్రాయం వ్యక్తమవుతోంది. మరి పార్టీలో యువ రక్తం రావాలని కోరుకుంటున్న రాహుల్ గాంధీ.. తెలంగాణ పార్టీ పగ్గాలు రేవంత్ రెడ్డికి అప్పగిస్తారేమో చూడాలి.

బీజేపీ రాహుల్ గాంధీని తక్కువ అంచనా వేస్తుందా?

  లోక్ సభ ఎన్నికలకు ముందు సెమీఫైనల్స్‌గా భావించిన ఐదు రాష్ట్రాల ఎన్నికల ఫలితాలు నిన్న వెలువడిన విషయం తెలిసిందే. అయితే ఈ ఫలితాలు కొన్ని పార్టీల్లో సంతోషాన్ని నింపితే.. కేంద్రంలో అధికారంలో ఉన్న బీజేపీకి మాత్రం షాక్ తగిలేలా చేశాయి. ఏ రాష్ట్రంలోనూ బీజేపీ పూర్తిస్థాయి ఆధిపత్యాన్ని కొనసాగించలేకపోయింది. తెలంగాణలో ఓటర్లు టీఆర్ఎస్ కి బ్రహ్మరధం పట్టి మళ్ళీ అధికారం కట్టబెట్టారు. ఇక్కడ బీజేపీ ఒక్క సీటుతో సరిపెట్టుకుంది. ఇక కాంగ్రెస్ విషయానికొస్తే టీఆర్ఎస్ ని గద్దె దించడమే లక్ష్యంగా టీడీపీ, టీజేఎస్, సీపీఐ వంటి పార్టీలతో కలిసి కూటమిగా ఏర్పడింది. కానీ కూటమికి ఓటమి తప్పలేదు. కూటమి పార్టీలతో కలిసి కాంగ్రెస్ గట్టి పోటీ ఇస్తుంది అనుకుంటే. గత ఎన్నికల్లో చూపిన మాత్రం ప్రభావం కూడా చూపలేక చతికిలపడిపోయింది. కాంగ్రెస్ కి మిజోరంలో కూడా ఇలాంటి ఫలితమే ఏర్పడింది. ఈశాన్య రాష్ట్రాల్లో మిజోరంను కాంగ్రెస్ కంచుకోటగా భావిస్తారు. కానీ ఇక్కడ కాంగ్రెస్ 5 స్థానాలతో సరిపెట్టుకొని అధికారం పోగొట్టుకుంది. అయితే ఈ రెండు రాష్ట్రాల్లో కాంగ్రెస్ కి చేదు ఫలితాలు ఎదురైనా మిగతా మూడు రాష్ట్రాల్లో కాంగ్రెస్ సత్తా చాటింది. సెమీఫైనల్స్‌ లో బీజేపీకి షాక్ ఇచ్చి ఫైనల్స్ కి సిద్ధమైంది. ఛత్తీస్ గఢ్ లో కాంగ్రెస్, బీజేపీ ల మధ్య పోరు నువ్వా నేనా అన్నట్టు సాగుతుంది అనుకున్నారు. కానీ ఫలితాలు మాత్రం వార్ వన్ సైడ్ అని తేల్చేశాయి. ఇక్కడ 90 సీట్లకు గాను కాంగ్రెస్ 68 సీట్లు గెలుచుకొని జెండా ఎగరేసింది. బీజేపీకి కంచుకోటల్లాంటి రాజస్థాన్, మధ్యప్రదేశ్ లలో కూడా కాంగ్రెస్ సత్తా చాటింది. రాజస్థాన్ లో 199 సీట్లకు గాను కాంగ్రెస్ 100 సీట్లు గెలుచుకుంది. ఇక మధ్యప్రదేశ్ విషయానికొస్తే 230 సీట్లకు గాను 114 సీట్లు గెలుచుకుంది. ఈ మూడు రాష్ట్రాల్లోనూ కాంగ్రెస్ తన సత్తా చాటి బీజేపీని అధికారానికి దూరం చేసింది. పేరుకివి రాష్ట్రాల అసెంబ్లీ ఎన్నికలైనా మోదీ, రాహుల్ గాంధీ మధ్య పోరులా సాగింది. ఎందుకంటే పీఎం ఎన్నికలకు ముందు వీటిని సెమీఫైనల్స్‌గా భావించారు. ప్రచారంలో కూడా మోదీ, రాహుల్ పోటాపోటీగా పాల్గొన్నారు. రాహుల్ ని పప్పు అని, రాహుల్ ప్రచారం చేస్తే కాంగ్రెస్ ఓడిపోతుందని బీజేపీ విమర్శలు చేస్తూ వస్తుంది. అయితే ఫలితాలు చూస్తే మాత్రం బీజేపీ రాహుల్ ని తక్కువ అంచనా వేస్తుందనే అభిప్రాయం వ్యక్తమవుతోంది. ముఖ్యంగా ఈ మూడు రాష్ట్రాల ఫలితాలతో రాహుల్ బీజేపీకి బిగ్ షాక్ ఇచ్చినట్లు అయింది. ఇన్ని రోజులు బీజేపీకి తిరుగులేదు, మోదీ లాంటి బలమైన నేత కాంగ్రెస్ లో లేరని బీజేపీ భావించింది. కానీ రాహుల్ రోజురోజుకి పరిణితి చూపిస్తూ పప్పు కాదు నిప్పు అని రుజువు చేసుకుంటున్నాడు. ఇది కాంగ్రెస్ శ్రేణుల్లో ఉత్సాహాన్ని నింపుతుంది. మరి రాహుల్ సెమీఫైనల్స్‌ లో షాక్ ఇచ్చినట్లే ఫైనల్స్ లో కూడా మోదీకి షాక్ ఇస్తారా?. చూద్దాం ఏం జరుగుతుందో.

అయ్యో కాంగ్రెస్.. తెలంగాణలో ఎందుకిలా?

  ఐదు రాష్ట్రాల ఫలితాలు మరి కొద్ది సేపట్లో తేలిపోనున్నాయి. ఇప్పటికే ఏయే రాష్ట్రాల్లో ఏ పార్టీ గెలవబోతుందనే అవగాహన అయితే వచ్చింది. తెలంగాణ, రాజస్థాన్, మధ్యప్రదేశ్, ఛత్తీస్ గఢ్, మిజోరం రాష్ట్రాల్లో ఎన్నికలు జరిగాయి. ఐదు రాష్ట్రాల ఫలితాలూ ఈరోజే తెలుస్తాయి. ప్రస్తుతానికి కాంగ్రెస్ రాజస్థాన్, మధ్యప్రదేశ్, ఛత్తీస్ గఢ్ రాష్ట్రాలలో ఆధిక్యం ఉండి.. అధికారం దిశగా దూసుకుపోతుంది. మరోవైపు మిజోరంలో కూడా కాంగ్రెస్ రెండో స్థానంతో పర్వాలేదు అనిపించుకుంటుంది. అయితే తెలంగాణలో మాత్రం కాంగ్రెస్ పరిస్థితి దారుణంగా ఉంది. గత ఎన్నికల్లో ఒంటరిగా 22 స్థానాలు గెలుచుకున్న కాంగ్రెస్.. ఈసారి కూటమిగా ఏర్పడి కూడా కనీసం 20 స్థానాలైనా గెలుచుకుంటుందా అనిపిస్తోంది. ఎన్నికల ముందు కాంగ్రెస్.. టీడీపీ, టీజేఎస్, సీపీఐ పార్టీలతో కలిసి ప్రజకూటమిగా ఏర్పడటంతో.. టీఆర్ఎస్, ప్రజకూటమి మధ్య పోరు నువ్వా నేనా అన్నట్టుగా సాగుతుంది అనుకున్నారు. కానీ పరిస్థితి పూర్తి భిన్నంగా మారిపోయింది. కూటమి టీఆర్ఎస్ కు కనీస పోటీ కూడా ఇవ్వలేకపోతుంది. రాజస్థాన్, మధ్యప్రదేశ్, ఛత్తీస్ గఢ్ రాష్ట్రాలలో అధికారం దిశగా దూసుకుపోతున్న కాంగ్రెస్ తెలంగాణలో కనీసం 20 సీట్లైనా గెలుస్తుందా అనిపిస్తోంది. రాష్ట్రం ఇచ్చిన పార్టీగా తెలంగాణలో కాంగ్రెస్ దూసుకుపోవాల్సింది పోయి.. ఇలా చతికలు పడటానికి కారణం కూటమేనా అనే అభిప్రాయం వ్యక్తమవుతోంది. కాంగ్రెస్ ఒంటరిగా బరిలోకి దిగితే అధికారంలోకి రాకపోయినా టీఆర్ఎస్ కి గట్టి పోటీ ఇచ్చేదేమో. కానీ కూటమిగా ఏర్పడి అధికారంపై కన్నేసిన కాంగ్రెస్ కి గట్టి దెబ్బ తగిలింది. చివరి వరకు పొత్తులు, సీట్ల పంపకాలు తేలలేదు. చాలా మంది అభ్యర్థులను ఆలస్యంగా ప్రకటించారు.. దీంతో ప్రచారానికి సమయం సరిపోలేదు. అదీగాక కాంగ్రెస్ తెలంగాణ వ్యతిరేక పార్టీ టీడీపీతో పొత్తు పెట్టుకుంది అంటూ టీఆర్ఎస్ జనాల్లోకి బాగా తీసుకెళ్లింది. ఇది కూడా ఒక రకంగా నష్టం కలిగించింది. ఇక కాంగ్రెస్, టీడీపీ మొన్నటి వరకు బద్ధ శత్రువులు. ఇలాంటి పార్టీలు కూటమితో దగ్గరైతే కొందరు ఆహ్వానించారు కానీ కొందరు కార్యకర్తలు వ్యతిరేకించారు. మరి ముఖ్యంగా వైఎస్ అభిమానులు కొందరు కాంగ్రెస్, టీడీపీ పొత్తుని వ్యతిరేకిస్తూ టీఆర్ఎస్ కి వోట్ వేశారు. నిజానికి కూటమిలో చాలా పార్టీలు ఉన్నాయి కానీ బలమైన పార్టీలు ఒకటి రెండు మించి లేవు. కానీ కేసీఆర్ ఓడించడానికి అందరూ కలిశారు అనే అభిప్రాయం మాత్రం టీఆర్ఎస్ ప్రజల్లోకి తీసుకెళ్లింది. కర్ణుడి చావుకు సవాలక్ష కారణాలు అన్నట్టు తెలంగాణలో కాంగ్రెస్ ఓటమికి చాలా కారణాలు కనిపిస్తున్నాయి. మిగతా రాష్ట్రాల్లో ఆధిక్యంలో ఉండటం ఆ పార్టీకి కాస్త కలిసొచ్చే అంశమనే చెప్పాలి.

హంగ్ వస్తే ఎంఐఎం, బీజేపీ అడుగులు ఎటువైపు?

  తెలంగాణ ఎన్నికల ఫలితాలపై నెలకొన్న ఉత్కంఠకు రేపు తెరపడనుంది. ఎగ్జిట్ పోల్స్ చెప్పినట్టు టీఆర్ఎస్ మరోసారి గెలిచి అధికారం నిలబెట్టుకోనుందా? లేక లగడపాటి చెప్పినట్టు కాంగ్రెస్ నేతృత్వంలోని ప్రజకూటమి గెలిచి అధికారంలోకి రానుందా? అని రేపు తేలిపోనుంది. టీఆర్ఎస్, ప్రజకూటమి మధ్య నువ్వా నేనా అన్నట్టు సాగుతున్న ఈ పోరులో ఎవరో ఒకరు గెలిస్తే ఓకే. కానీ ఒకవేళ హంగ్ వస్తే పరిస్థితి ఏంటి?. ఇప్పుడు ఇది అందరిని వేధిస్తున్న ప్రశ్న. టీఆర్ఎస్, ప్రజకూటమి రెండూ అధికారానికి కొద్ది సీట్లు దూరంలో ఆగిపోతే.. ఎంఐఎం, బీజేపీ, ఇండిపెండెంట్లు కీలకం అవుతారు. ఇప్పటికే ఎంఐఎం తాము పోటీ చేయని స్థానాల్లో తమ మద్దతు టీఆర్ఎస్ కే అని ప్రకటించిన విషయం తెలిసిందే. దీంతో ఒకవేళ హంగ్ వస్తే ఎంఐఎం టీఆర్ఎస్ కు మద్దతిచ్చే అవకాశాలు ఎక్కువగా ఉన్నాయి. ఇక బీజేపీ విషయానికి వస్తే ప్రజకూటమికి మద్దతిచ్చే అవకాశమే లేదు. ఎందుకంటే స్టేట్ అయినా, సెంట్రల్ అయినా బీజేపీకి ఎప్పుడూ కాంగ్రెస్ బద్ధ శత్రువే. అందుకే హంగ్ వస్తే బీజేపీ, టీఆర్ఎస్ కు మద్దతిచ్చే అవకాశం పుష్కలంగా ఉంది. ఇప్పటికే కొందరు బీజేపీ నేతలు ఒకవేళ హంగ్ వస్తే కాంగ్రెస్ కి అధికారం దూరం చేయడం కోసం టీఆర్ఎస్ కి మద్దతిస్తామని అంటున్నారు. కర్ణాటక అసెంబ్లీ ఎన్నికలు గుర్తుండే ఉంటాయి. అక్కడ బీజేపీని అధికారానికి దూరం చేయడం కోసం.. కాంగ్రెస్ తక్కువ సీట్లు గెలుచుకున్న జేడీఎస్ కి మద్దతిచ్చి కుమారస్వామిని సీఎం చేసి బీజేపీకి షాక్ ఇచ్చిన విషయం తెలిసిందే. తెలంగాణలో హంగ్ వస్తే బీజేపీ కూడా కాంగ్రెస్ కి అలాంటి షాకే ఇవ్వాలనుకుంటుందట. గత ఎన్నికల్లో కంటే ఇప్పుడు కాస్త ఎక్కువ సీట్లు గెలుస్తామని బీజేపీ భావిస్తోంది. అనుకున్నట్టే 5 నుంచి 10 సీట్లు గెలిస్తే బీజేపీ కీలకం అవుతుంది. అప్పుడు టీఆర్ఎస్ కి మద్దతిస్తే కాంగ్రెస్ కి ఆటోమేటిక్ గా షాక్ తగులుతుంది. అయితే ఇక్కడ ఓ పెద్ద మెలిక ఉంది. ఎంఐఎం మద్దతు టీఆర్ఎస్ కి ఉంటే బీజేపీ టీఆర్ఎస్ కి మద్దతు ఇవ్వలేదు. ఎందుకంటే బీజేపీకి కాంగ్రెస్ ఎంత వ్యతిరేకమో, ఎంఐఎం అంతే వ్యతిరేకం. దీంతో బీజేపీ కాంగ్రెసేతర, మజ్లిసేతర ప్రభుత్వానికి మద్దతిచ్చే అవకాశముంది. ఇక తప్పని పరిస్థితుల్లో ఒకవేళ టీఆర్ఎస్, ఎంఐఎం దోస్తీ విడిపోయే పరిస్థితి లేకపోతే మాత్రం.. టీఆర్ఎస్ ప్రభుత్వానికి బీజేపీ బయటనుంచి మద్దతిచ్చే అవకాశముంది. కానీ బీజేపీ అంత సాహసం చేస్తుందో లేదో చూడాలి. ఒకవేళ హంగ్ వచ్చి ఇంత జరుగుతుంటే.. మరి కాంగ్రెస్ ఊరుకుంటుందా?. తన మార్క్ రాజకీయం మొదలుపెట్టదు. కాంగ్రెస్ నుంచి టికెట్ ఆశించి భంగపడ్డ నేతలు రెబెల్స్ గా బరిలోకి దిగారు. వారిలో కొందరు గెలిచే అవకాశముంది. ఆ గెలిచే అవకాశమున్న రెబెల్స్ తో ఇప్పటికే కాంగ్రెస్ టచ్ లో ఉండుంటుంది. అసలే తెలంగాణ ఎన్నికలను కాంగ్రెస్ ప్రతిష్టాత్మకంగా తీసుకుంది. మరి అలాంటి ఎన్నికల్లో హంగ్ వచ్చి అధికారం దూరం అవుతుంటే కాంగ్రెస్ ఊరుకుంటుందా? ఎంత దూరమైనా వెళ్తుంది. అవసరమైతే కాంగ్రెస్ ఎంఐఎం తో ఉన్న పాత పరిచయాలను తెరమీదకు తెచ్చి మద్దతు కోరే అవకాశముంది. ఇప్పటికే కాంగ్రెస్ ఆ దిశగా అడుగులు కూడా వేస్తున్నట్టు తెలుస్తోంది. ఒకవిధంగా ఇది ఫలించే అవకాశం కూడా ఉంది. ఎందుకంటే ఎంఐఎం కి బీజేపీ బద్ధ శత్రువు. అలాంటి బీజేపీ టీఆర్ఎస్ కి మద్దతిస్తే ఎంఐఎం కాంగ్రెస్ వైపు వచ్చే అవకాశాలు కూడా ఉన్నాయి. ఇప్పటికే అక్బరుద్దీన్ ఓవైసీ లాంటి వారు ఎన్నికలకు ముందు అలాంటి హింట్ కూడా ఇచ్చారు. మరి తెలంగాణలో హంగ్ వస్తే ఎంఐఎం, బీజేపీ అడుగులు ఎలా ఉంటాయో చూడాలి.