Regional News | TeluguOne

గడ్డం పెంచుకుంటే సీఎం అయిపోతారా.? కేటీఆర్‌కు బీజేపీ ఎంపీ సెటైర్లు.!

కేటీఆర్‌కు ఎవరో తప్పుడు సలహా ఇచ్చారు.. సీఎం మాత్రం కాలేరంటూ ఎద్దేవా.! తెలంగాణ రాజకీయాల్లో మరోసారి నేతల మధ్య మాటల యుద్ధం తారాస్థాయికి చేరింది. అధికార, ప్రతిపక్ష పార్టీల మధ్య విమర్శలు, ప్రతివిమర్శలు జోరుగా సాగుతున్నాయి. ఇదే క్రమంలో బీజేపీ నేత చేసిన వ్యాఖ్యలు ప్రస్తుతం రాష్ట్ర రాజకీయ వర్గాల్లో తీవ్ర చర్చనీయాంశంగా మారాయి. నిజామాబాద్‌లో ఏర్పాటు చేసిన మీడియా సమావేశంలో పాల్గొన్న ఇందూర్ ఎంపీ ధర్మపురి అర్వింద్ ప్రత్యర్థులపై తీవ్ర స్థాయిలో విరుచుకుపడ్డారు. ముఖ్యంగా రాష్ట్రంలో మారుతున్న రాజకీయ సమీకరణాలపై ఆయన తనదైన శైలిలో విశ్లేషణలు అందించారు. ఏ పార్టీతోనూ పొత్తు పెట్టుకునే ప్రసక్తే లేదని స్పష్టం చేశారు. ఈ సందర్భంగా బీఆర్ఎస్ వర్కింగ్ ప్రెసిడెంట్ కేటీఆర్ లక్ష్యంగా అర్వింద్ చేసిన వ్యాఖ్యలు అందరి దృష్టిని ఆకర్షించాయి. కేటీఆర్ తన లుక్ మార్చడంపై వ్యంగ్యాస్త్రాలు సంధిస్తూ ఎద్దేవా చేశారు. గడ్డం పెంచుకుంటే ఎవరైనా ముఖ్యమంత్రి అయిపోతారా అంటూ ఆయన ప్రశ్నించారు. గతంలోనూ కొందరు నేతలు ముఖ్యమంత్రి పదవిని ఆశించి ఇలాంటి ప్రయత్నాలు చేశారని అర్వింద్ గుర్తుచేశారు. అప్పట్లో ఉత్తమ్‌కుమార్ రెడ్డి సైతం గడ్డం పెంచిన విషయాన్ని ప్రస్తావించారు. అయితే అలా చేయడం వల్ల నాయకుల గడ్డం పెరిగింది తప్ప పార్టీలు అధికారంలోకి రాలేదని చురకలంటించారు. ఇదే సమయంలో గత బీఆర్ఎస్ పాలన తీరుపైనా ఆయన విమర్శలు గుప్పించారు. గతంలో సెంటిమెంట్లు, సలహాల పేరుతో తీసుకున్న నిర్ణయాలను ప్రస్తావిస్తూ కేసీఆర్ పై కూడా సెటైర్లు వేశారు. పాత సచివాలయానికి వెళ్తే ముఖ్యమంత్రి పదవి పోతుందనే మూఢనమ్మకంతోనే కొత్త సచివాలయాన్ని నిర్మించారని ఆరోపించారు. ప్రస్తుత కాంగ్రెస్ ప్రభుత్వంపై కూడా ఆయన విమర్శల వర్షం కురిపించారు. రాష్ట్రంలో కాంగ్రెస్, బీఆర్ఎస్ పార్టీలు అంతర్గతంగా కలిసిపోయి రాజకీయాలు నడుపుతున్నాయని ఆరోపించారు. కాంగ్రెస్ హైకమాండ్ ప్రస్తుత ముఖ్యమంత్రి పనితీరుపై తీవ్ర అసంతృప్తితో ఉందని ఆయన పేర్కొన్నారు. రాబోయే అసెంబ్లీ ఎన్నికల్లో రాష్ట్రంలో రాజకీయ సమీకరణాలు పూర్తిగా మారిపోతాయని ఎంపీ అర్వింద్ జోస్యం చెప్పారు. 2028 ఎన్నికల్లో తెలంగాణ గడ్డపై కాషాయ జెండా ఎగరడం ఖాయమని, బీజేపీ అధికారంలోకి రావడం తథ్యమని ధీమా వ్యక్తం చేశారు. డిజిటల్, మీడియా వేదికలుగా రానున్న రోజుల్లో మరింత దూకుడుగా వ్యవహరిస్తామని హెచ్చరించారు. [ MP Dharmapuri Aravind, KTR, BJP Telangana, BRS Party, Telangana Politics, 2028 Assembly Elections, CM Revanth reddy, KCR, Telugu One news, Telugu News ]

Published on: Thu Oct 22, 2026 4:15PM

ప్రియుడి మోజులో పడి భర్త మర్మాంగాన్ని కోసి హత్య చేసిన భార్య.!

జీవితాంతం కలిసుంటామని మూడు ముళ్ల బంధంతో ఒక్కటైన దంపతుల మధ్య వివాహేతర సంబంధం చిచ్చు పెట్టింది. తన సంబంధానికి భర్త అడ్డుగా మారాడని భావించిన ఓ మహిళ.. అతడిపై కక్ష పెంచుకుని చివరకు ప్రాణాలు తీసినట్లు పోలీసుల విచారణలో వెల్లడైంది. మద్యం మత్తులో జరిగిన ఘర్షణ కాస్తా హత్యకు దారితీసిన ఘటన మహబూబ్‌నగర్‌ జిల్లాలో కలకలం రేపింది. నవాబ్‌పేట మండలం తిగులపల్లి గ్రామానికి చెందిన పెద్దమోని శ్రీను (50)కు లక్ష్మమ్మతో 24 ఏళ్ల క్రితం వివాహమైంది. ఈ దంపతులకు ఇద్దరు కుమారులు ఉన్నారు. జీవనోపాధి కోసం మహబూబ్‌నగర్‌కు వచ్చిన వీరు హనుమాన్‌నగర్‌లో నివాసముంటూ కూలి పనులు చేసుకుంటున్నారు. అయితే లక్ష్మమ్మకు మద్యపానం అలవాటుతోపాటు మరో వ్యక్తితో పరిచయం ఏర్పడింది. ఆ పరిచయం వివాహేతర సంబంధానికి దారితీసింది. ఈ విషయం తెలుసుకున్న శ్రీను భార్యను నిలదీయడంతో ఇద్దరి మధ్య తరచూ గొడవలు జరిగేవి. తన వ్యక్తిగత సంబంధానికి భర్త అడ్డుగా ఉన్నాడని భావించిన లక్ష్మమ్మ అతడిపై అసహనం పెంచుకున్నది. ఈ నేపథ్యంలోనే దంపతుల మధ్య విభేదాలు మరింత తీవ్రమయ్యాయి. 19వ తేదీన భార్యాభర్తల మధ్య గొడవ జరిగిన అనంతరం భర్త శీను మరణించాడు.. రంగంలోకి దిగిన పోలీసులు కేసు నమోదు చేసుకుని దర్యాప్తు కొనసాగిస్తుండగా భార్య లక్ష్మమ్మపై అనుమానం వచ్చి ఆమెను అదుపులోకి తీసుకొని విచారణ చేయడంతో విస్సుపోయే విషయాలు వెలుగులోకి వచ్చాయి. ఈ నెల 19వ తేదీ రాత్రి శ్రీను, లక్ష్మమ్మ ఇద్దరూ మద్యం సేవించారు. ఈ క్రమంలో మరోసారి వారి మధ్య వాగ్వాదం చోటుచేసుకుంది. గొడవ తీవ్రం కావడంతో లక్ష్మమ్మ భర్తను బలంగా తోసివేసింది. కిందపడిపోయిన శ్రీనుపై ఆమె దాడికి పాల్పడింది.భర్త మర్మాంగాలపై తీవ్రంగా దాడి చేయడంతోపాటు, సమీపంలో ఉన్న అద్దాన్ని పగలగొట్టి దాని ముక్కతో మర్మంగాన్ని కోసి వేసింది. అంతేకాకుండా అతడి కంటిలో బలంగా పొడిచింది. దీంతో తీవ్ర గాయాలతో శ్రీను అక్కడికక్కడే మృతిచెందాడు. భర్త మరణించిన అనంతరం లక్ష్మమ్మ అక్కడినుంచి వెళ్లిపోయింది. ఈ ఘటన వెలుగులోకి రావడంతో వెంటనే పోలీసులు లక్ష్మమ్మను అరెస్టు చేసి రిమాండ్‌కు తరలించారు. వివాహేతర సంబంధం నేపథ్యంలో చోటుచేసుకున్న ఈ ఘటన స్థానికంగా చర్చనీయాంశమైంది. [ Mahabubnagar Crime, Wife Kills Husband, Extramarital Affair, Illegal Relationship, Husband Murder Case, Telangana Crime News, Nawabpet Mandal, Tigulapalli Village, Lakshmamma, Pedda Moni Srinu, Domestic Dispute, Brutal Murder, Crime News Telugu, Telangana Police ]

Published on: Thu Oct 22, 2026 3:37PM

హైదరాబాద్ లో రియల్ సంక్షోభం: నిర్మాణాలు వేగం.. కొనుగోళ్లు దాదాపు శూన్యం.!

హైదరాబాద్ రియల్ ఎస్టేట్‌ రంగం కనీవినీ ఎరుగనిసంక్షోభాన్ని ఎదుర్కొంటున్నది. నిర్మాణాలు వేగంగా జరుగుతున్నా.. ఇళ్లు అమ్ముడుపోక రియల్ రంగం కుదేలౌతోంది. విశ్వనగరంలో రియల్ ఎస్టేట్ రంగం పెను సవాళ్లు ఎదుర్కొంటోంది. గత కొన్నేళ్లుగా వేగంగా విస్తరించిన నివాస గృహాల నిర్మాణాలు ఇప్పుడు కొనుగోలుదారులు లేక వెతలెలబోతున్నాయి. ప్రజలు ఇళ్లను కొనుగోలు చేసే వేగం కంటే కూడా రియల్ ఎస్టేట్ డెవలపర్లు నూతన ప్రాజెక్టులను నిర్మించే వేగమే ఎక్కువగా కనిపిస్తోంది. ఈ పరిస్థితి బిల్డర్లలోనూ, రియల్టర్లలోనూ తీవ్ర కలకలం రేపుతోంది. గృహాల సరఫరా, డిమాండ్ మధ్య ఏర్పడిన ఈ గ్యాప్ హైదరాబాద్ హౌసింగ్ మార్కెట్‌ను ఒత్తిడిలో పడేస్తోంది. అందుబాటులో ఉన్న గణాంకాలు, నివేదికలు, సమాచారం మేరకు హైదరాబాద్ వ్యాప్తంగా రమారమి 29.6 కోట్ల చదరపు అడుగుల నివాస స్థలం విక్రయాలు జరగకుండా నిలిచిపోయింది. దేశవ్యాప్తంగా ప్రధాన నగరాల్లో అమ్ముడుపోకుండా మిగిలిపోయిన మొత్తం గృహ నిర్మాణ విస్తీర్ణంలో హైదరాబాద్ వాటా దాదాపు 30 శాతాం. ఇది హైదరాబాద్ రియల్ ఎస్టేట్ చరిత్రలోనే ఎన్నడూ లేని పరిణామమని పరిశీలకులు విశ్లేషిస్తున్నారు. నగరంలోని పశ్చిమ భాగంతో పాటు ఐటీ కారిడార్లు, ఔటర్ రింగ్ రోడ్డు పరిసర ప్రాంతాల్లో గడిచిన ఐదేళ్లలో భారీ ఎత్తున హైరైజ్ అపార్ట్‌మెంట్లు, విల్లాలు నిర్మితమయ్యాయి. డెవలపర్లు డిమాండ్‌ను మించి సరికొత్త ప్రాజెక్టులను ప్రారంభించడం.. నిర్మాణ వ్యయాలు పెరగడం వల్ల ఇళ్ల ధరలు విపరీతంగా పెరిగిపోయాయి. ప్రస్తత దయనీయ స్థితికి ఇదే కారణమని అంటున్నారు. సాధారణ, మధ్యతరగతి కొనుగోలుదారుల శక్తికి మించి ప్రాజెక్టుల ధర ఉండటం వల్ల విక్రయాలు మందగించాయని చెబుతున్నారు.మరోవైపు గృహ రుణాలపై వడ్డీ రేట్లు పెరగడం, అంతర్జాతీయ ఆర్థిక పరిస్థితులు కారణంగా ఐటీ ఉద్యోగుల్లో తమ ఉద్యోగాల కొనసాగింపు పట్ల వ్యక్తమౌతున్న అనిశ్చితి కూడా కొత్త కొనుగోళ్లు మందగించడానికి కారణంగా పరిశీలకులు విశ్లేషిస్తున్నారు. నివాస గృహాలను వేగంగా పూర్తి చేయడంపై చూపిన శ్రద్ధ, మార్కెట్ కొనుగోలు సామర్థ్యాన్ని అంచనా వేయడంలో ప్రదర్శించకపోవడంతోనే ఈ స్థాయిలో కోట్ల చదరపు అడుగుల స్థలం ఖాళీగా ఉండిపోయిందంటున్నారు. గతంలో హైదరాబాద్ నగరం తక్కువ ధరలో మెరుగైన మౌలిక వసతులతో కూడిన నివాసాలను అందించే ప్రాంతంగా ప్రత్యేక గుర్తింపు ఉండేది. కానీ ఇటీవల ప్రైమింగ్ వ్యూహాలు, విలాసవంతమైన ప్రాజెక్టులపై రియల్టర్లు, బిల్డర్లు అతిగా దృష్టి సారించడం వల్ల ధరలు విపరీతంగా పెరిగి.. ఇళ్లు కొనుగోలు అంటేనే సాధారణ, మధ్య తరగతి, వేతన జీవులు వణికిపోయే పరిస్థితి ఏర్పడింది. దీంతో ఇప్పటికిప్పుడు ఇళ్లు కొనడం కంటే వేచి చూడటమే మేలన్న అభిప్రాయానికి ప్రజలు వచ్చేశారు. ఈ కారణంగానే రెడీ టు ఆక్యుపై స్థాయిలో ఉన్న గృహాలను కొనడానికి కూడాపెద్దగా ఎవరూ ముందుకు రావడంలేదు. ఈ కారణంగా రియల్ ఎస్టేట్, నిర్మాణ రంగంలో పెట్టుబడులు పెట్టిన బిల్డర్లు, ఆర్థిక సంక్షోభంలో కూరుకుపోతున్న పరిస్థితి నెలకొంది. బ్యాంకుల వద్ద తీసుకున్న రుణాలకు వడ్డీల భారం పెరగడంతో పాటు, రాబోయే రోజుల్లో కొత్త ప్రాజెక్టులు ప్రారంభించేందుకు అవసరమైన మూలధనం కొరతను బిల్డర్లు ఎదుర్కొంటున్నారు. డెవలపర్లు తమ వ్యాపార వ్యూహాలను మార్చుకుంటేనే ఈ పరిస్తితి నుంచి గట్టెక్కే అవకాశం ఉంటుందని పరిశీలకులు అంటున్నారు. గృహాల ధరల్లో సవరణలు చేయడం, కొనుగోలుదారులను ఆకట్టుకునేలా రాయితీలు ప్రకటించడం, అందుబాటు ధరల ప్రాజెక్టులపై దృష్టి సారించడం ద్వారా మాత్రమే ఈ పరిస్థితిని అధిగమించడానికి వీలౌతుందని విశ్లేషిస్తున్నారు. లేకుంటే ముందు ముందు హైదరాబాద్ ప్రాపర్టీ మార్కెట్‌లో ధరల తగ్గుదల అనివార్యమౌతుందంటున్నారు. [Crisis in Hyderabad Real Estate, Unsold Housing, Hyderabad Residential Property, Real Estate Demand Supply, Hyderabad Housing Market, Telugu One]

Published on: Thu Oct 22, 2026 10:35AM

సమ్మక్క, సారక్క గుడి కూల్చివేత: భద్రాద్రి కొత్తగూడెం జిల్లాలో దుండగుల దుశ్చర్య.!

భద్రాద్రి కొత్తగూడెం జిల్లా అనంతోగు గ్రామ పంచాయతీ శివారు ప్రాంతంలో కొలువుదీరిన వనదేవతలు సమ్మక్క-సారక్క గుడిని దుండగులు ధ్వంసం చేయడం కలకలం సృష్టించింది. ఈ సంఘటన స్థానికంగా తీవ్ర ఉద్రిక్తత పరిస్థితికి కారణమైంది. స్థానికంగా తీవ్ర ఆందోళనకు దారి తీసింది. వనదేవతలు పూజలందుకునే గుడిని గుర్తుతెలియని వ్యక్తులు కూల్చివేయడం పట్ల భక్తులు, గిరిజనులు ఆగ్రహం వ్యక్తం చేస్తున్నారు. గ్రామ శివారులో వెలసిన ఈ ఆలయంలో స్థానికులు నిత్యం పూజలు చేస్తుంటారు. అటువంటి సమ్మక్క-సారక్క గద్దెలను, గుడిని కూల్చివేత పట్ల భక్తుు ఆగ్రహం వ్యక్తం చేస్తున్నారు. విషయం తెలుసుకున్న స్థానికులు పెద్ద సంఖ్యలో ఘటనా స్థలికి చేరుకున్నారు. ఈ ఘటనపై క పోలీసులు ఘటనా స్థలాన్ని పరిశీలించి, ఆలయాన్ని ధ్వంసం చేసిన నిందితుల కోసం గాలింపు చర్యలు ముమ్మరం చేశారు. శాంతిభద్రతలకు విఘాతం కలిగించే ఇలాంటి చర్యలకు పాల్పడే వారిపై చట్టపరంగా కఠిన చర్యలు తీసుకోవాలని స్థానికులు, ప్రజా సంఘాల నాయకులు డిమాండ్ చేస్తున్నారు. [Sammakka Sarakka Temple Destroyed Ananthogu, Bhadradri Kothagudem District, Destruction Sammakka Sarakka Temple, Telugu One]

Published on: Wed Oct 21, 2026 9:53AM

సొంతూరులో కుటుంబంతో కలిసి సీఎం రేవంత్ రెడ్డి దసరా సంబురాలు.!

తెలంగాణ ముఖ్యమంత్రి రేవంత్ రెడ్డి దసరా పండుగను తన స్వగ్రామమైన కొండారెడ్డిపల్లిలో కుటుంబ సభ్యులతో కలిసి జరుపుకున్నారు. నాగర్‌కర్నూల్ జిల్లా వంగూరు మండలంలోని ఈ గ్రామానికి సీఎం రాకతో పండుగ సందడి నెలకొంది. కుటుంబ సభ్యులతో కలిసి స్వగ్రామానికి చేరుకున్న ఆయన.. స్థానిక ఆలయాల్లో ప్రత్యేక పూజలు నిర్వహించి, రాష్ట్ర ప్రజల సుఖసంతోషాల కోసం ప్రార్థించారు. ఆలయాల్లో ప్రత్యేక పూజలు.! కొండారెడ్డిపల్లికి హెలికాప్టర్‌లో చేరుకున్న ముఖ్యమంత్రికి స్థానిక ప్రజాప్రతినిధులు, అధికారులు, పార్టీ నాయకులు స్వాగతం పలికారు. అనంతరం రేవంత్ రెడ్డి తన కుటుంబ సభ్యులతో కలిసి స్థానిక ఆంజనేయస్వామి ఆలయాన్ని సందర్శించారు. అక్కడ దంపతులుగా ప్రత్యేక పూజలు నిర్వహించారు. ఆలయానికి చేరుకున్న సీఎం దంపతులకు వేద పండితులు సంప్రదాయబద్ధంగా పూర్ణకుంభ స్వాగతం పలికారు. కోట మైసమ్మ ఆలయంలోనూ ప్రత్యేక పూజలు నిర్వహించి విజయదశమి వేడుకల్లో పాల్గొన్నారు. జమ్మి పూజలో పాల్గొనే ఏర్పాట్లు.! దసరా పండుగలో ప్రత్యేక ప్రాధాన్యం కలిగిన జమ్మి పూజ కార్యక్రమాల కోసం గ్రామంలో ఏర్పాట్లు చేశారు. మైసమ్మ ఆలయం వద్ద జరిగే సంప్రదాయ పూజల్లో సీఎం పాల్గొనేలా ఏర్పాట్లు చేపట్టారు. ముఖ్యమంత్రి పర్యటన నేపథ్యంలో జిల్లా యంత్రాంగం, పోలీసు శాఖ పటిష్ఠమైన భద్రతా చర్యలు చేపట్టాయి. స్వగ్రామ అభివృద్ధికి ప్రత్యేక ప్రాధాన్యం.! పండుగ వేడుకలతో పాటు కొండారెడ్డిపల్లిలో అభివృద్ధి కార్యక్రమాలకూ సీఎం ప్రాధాన్యం ఇచ్చారు. గ్రామంలో ఇప్పటికే రూ.30 కోట్లకు పైగా వ్యయంతో పలు అభివృద్ధి పనులు చేపట్టినట్లు సమాచారం. తాజాగా నూతనంగా నిర్మించిన ఎస్సీ కమ్యూనిటీ హాల్, డ్రైనేజీ పైప్‌లైన్ వ్యవస్థ, సీసీ రోడ్లతో పాటు గ్రామ పంచాయతీ భవనం, లైబ్రరీ, ఇతర కమ్యూనిటీ భవనాలకు సంబంధించిన ప్రారంభోత్సవ కార్యక్రమాలు నిర్వహించారు. గ్రామస్థులతో ఆత్మీయ పలకరింపు.! రాష్ట్ర ముఖ్యమంత్రి హోదాలో ఉన్నప్పటికీ.. తన బాల్యం గడిచిన స్వగ్రామానికి వచ్చిన రేవంత్ రెడ్డి గ్రామస్థులు, బంధుమిత్రులు, గ్రామ పెద్దలు, బాల్య మిత్రులతో ఆప్యాయంగా ముచ్చటించారు. స్థానిక సమస్యలు, మౌలిక వసతుల అవసరాలపై వివరాలు తెలుసుకున్నారు. గ్రామానికి మెరుగైన రహదారులు, మంచినీటి సౌకర్యం వంటి అంశాలపై అధికారులతో చర్చించినట్లు సమాచారం.దసరా పర్వదినాన్ని కుటుంబ సభ్యులతో కలిసి స్వగ్రామంలో జరుపుకోవడంతో కొండారెడ్డిపల్లిలో పండుగ వాతావరణం నెలకొంది. సంప్రదాయాలకు ప్రాధాన్యమిస్తూ, స్వగ్రామ అభివృద్ధి కార్యక్రమాల్లో పాల్గొన్న సీఎం పర్యటన స్థానికంగా ప్రాధాన్యం సంతరించుకుంది. [ CM Revanth Reddy, Dussehra Celebrations, Kondareddypally, Telangana CM, Nagarkurnool District, Dussehra Festival, Revanth Reddy Family, Anjaneya Swamy Temple, Kota Maisamma Temple, Village Development, Telangana News ]

Published on: Tue Oct 20, 2026 6:01PM

అడవిలో కాదు.. హైదరాబాద్‌లో జింక మాంసం కలకలం.!

అడవిలో స్వేచ్ఛగా తిరుగుతూ ప్రకృతి అందాలను పెంచే మూగజీవాలపై తుపాకీ గురిపెట్టారు. జింకల వేట కోసం అడవిలోకి వెళ్లి.. ఏకంగా 12 రౌండ్ల కాల్పులు జరిపినట్లు ఆరోపణలు ఎదుర్కొంటున్నారు. అయితే, వారి వేట గుట్టు అడవిలో కాదు.. హైదరాబాద్‌లో బయటపడింది. మలక్‌పేటలో పోలీసులు నిర్వహించిన వాహన తనిఖీలు.. ఈ వ్యవహారాన్ని వెలుగులోకి తెచ్చాయి. స్కార్పియోలో ఆయుధాలు.. పోలీసులకు అనుమానం.! మలక్‌పేట రేస్‌కోర్స్ రోడ్డులో పోలీసులు వాహన తనిఖీలు నిర్వహిస్తుండగా.. ఓ మహీంద్రా స్కార్పియోను ఆపి తనిఖీ చేశారు. అందులో లైసెన్స్ కలిగిన .30-06 స్పోర్టింగ్ రైఫిల్, ఎనిమిది లైవ్ బుల్లెట్లు, 12 ఖాళీ కార్ట్రిడ్జ్‌లు కనిపించాయి. అంతేకాదు.. రాత్రివేళల్లో వేటకు ఉపయోగించేలా ఉన్న రెండు నైట్ విజన్ టెలిస్కోప్‌లు, బ్యాటరీ కూడా పోలీసుల కంటపడ్డాయి. దీంతో అనుమానం వచ్చిన పోలీసులు లోతుగా విచారణ చేపట్టారు. కర్ణాటక అడవుల్లో ఏం జరిగింది.? విచారణలో కర్ణాటకలోని కలబురగి జిల్లా చించోళి తాలూకా చిమ్మన్‌చోడ్ అటవీ ప్రాంతంలో జింకల వేటకు వెళ్లినట్లు వెలుగులోకి వచ్చింది. ముగ్గురూ కలిసి రైఫిల్‌తో 12 రౌండ్ల కాల్పులు జరిపినట్లు దర్యాప్తులో తేలిందని పోలీసులు వెల్లడించారు. అడవిలో మూగజీవాల ప్రాణాలకు ముప్పుగా మారిన ఈ ఘటనపై మరిన్ని వివరాలు సేకరిస్తున్నారు. వేట వీడియోలున్న ఫోన్ ధ్వంసం చేశారా.? ఈ కేసులో మరో ఆసక్తికర అంశం బయటపడింది. వేటకు సంబంధించిన వీడియోలు ఉన్నట్లు అనుమానిస్తున్న హువావే ఫోల్డబుల్ మొబైల్ ఫోన్‌ను ధ్వంసం చేసినట్లు ఆరోపణలు ఉన్నాయి. ఆ ఫోన్‌లో ఏం ఉంది? వేటకు సంబంధించిన దృశ్యాలను చెరిపేయాలనే ఉద్దేశంతోనే ఫోన్‌ను ధ్వంసం చేశారా? అనే కోణాల్లో పోలీసులు దర్యాప్తు చేస్తున్నారు. ముగ్గురు అరెస్ట్.. వేట గుట్టుపై ఆరా.! ఈ వ్యవహారంలో సయ్యద్ హుస్సేన్, సయ్యద్ ఒమర్, మహమ్మద్ హమీద్‌లను మలక్‌పేట పోలీసులు అరెస్ట్ చేశారు. వారి నుంచి నాలుగు మొబైల్ ఫోన్లు, రైఫిల్, బుల్లెట్లు, ఇతర సామగ్రిని స్వాధీనం చేసుకున్నారు. వేటకు ఉపయోగించినట్లు అనుమానిస్తున్న స్కార్పియోను సీజ్ చేశారు. వన్యప్రాణుల సంరక్షణ చట్టం, ఆర్మ్స్ యాక్ట్ తదితర సంబంధిత చట్టాల కింద కేసు నమోదు చేశారు. క్రైమ్ నంబర్ 391/2026గా కేసు నమోదు చేసి దర్యాప్తు కొనసాగిస్తున్నట్లు మలక్‌పేట ఇన్‌స్పెక్టర్ కె. వెంకట్ రెడ్డి తెలిపారు. తుపాకీ శబ్దాలకు అడవి దద్దరిల్లిందా? మూగజీవాల ప్రాణాలతో చెలగాటమాడిన ఈ వేట వెనుక ఇంకా ఏమైనా రహస్యాలు ఉన్నాయా? పోలీసులు సాగిస్తున్న దర్యాప్తులో మరిన్ని వివరాలు వెలుగులోకి వచ్చే అవకాశం ఉంది. [ Hyderabad Deer Hunting Case, Malakpet Police, Deer Meat Seizure, Illegal Wildlife Hunting, Karnataka Forest Hunting, Chincholi Forest, Syed Hussain, Syed Omar, Mohammed Hameed, .30-06 Sporting Rifle, 12 Rounds Fired, Wildlife Protection Act, Arms Act, Mahindra Scorpio Seized, Hyderabad Crime News, Malakpet News, Deer Hunting Case 2026 ]

Published on: Tue Oct 20, 2026 3:25PM

ఫ్యూచర్‌ సిటీ నూతన పోలీస్‌ కమిషనరేట్‌‌ను ప్రారంభించిన సీఎం రేవంత్.!

తెలంగాణ రాష్ట్రంలో పరిపాలన సౌలభ్యం, శాంతిభద్రతల పటిష్టత దిశగా ప్రభుత్వం మరో కీలక అడుగు వేసింది. అత్యాధునిక హంగులతో రూపుదిద్దుకుంటున్న భారత్‌ ఫ్యూచర్‌ సిటీలో కొత్తగా ఏర్పాటు చేసిన పోలీస్‌ కమిషనరేట్‌ను ముఖ్యమంత్రి రేవంత్‌ రెడ్డి అధికారికంగా ప్రారంభించారు. ఇబ్రహీంపట్నం కేంద్రంగా ఏర్పాటైన ఈ నూతన కమిషనరేట్‌ ప్రారంభోత్సవ కార్యక్రమం అత్యంత వైభవంగా సాగింది. ఈ ప్రారంభ వేడుకలో భాగంగా నూతన పోలీస్‌ కమిషనర్‌గా నియమితులైన తరుణ్‌ జోషిని వేదమంత్రాల ఉచ్ఛారణ మధ్య అధికారులు ప్రత్యేక కుర్చీలో ఆసీనులను చేశారు. నూతన బాధ్యతలు స్వీకరించిన సీపీకి ముఖ్యమంత్రి రేవంత్‌ రెడ్డి స్వయంగా పుష్పగుచ్ఛం అందించి శుభాకాంక్షలు తెలిపారు. ఈ కార్యక్రమంలో రాష్ట్ర డైరెక్టర్ జనరల్ ఆఫ్ పోలీస్ (డీజీపీ) సీవీ ఆనంద్‌తో పాటు పలువురు ఉన్నతాధికారులు కూడా పాల్గొన్నారు. భారత్‌ ఫ్యూచర్‌ సిటీ ప్రాజెక్టును అత్యంత ప్రతిష్టాత్మకంగా భావిస్తున్న రాష్ట్ర ప్రభుత్వం, భవిష్యత్తులో అక్కడ జరగబోయే వేగవంతమైన పారిశ్రామిక, పట్టణ అభివృద్ధిని దృష్టిలో ఉంచుకుని పకడ్బందీ రక్షణ వ్యవస్థను ఏర్పాటు చేస్తోంది. రద్దీ పెరిగే ప్రాంతాల్లో శాంతిభద్రతల నిర్వహణకు ఎలాంటి లోటుపాట్లు లేకుండా ఉండేలా ముందుచూపుతో ఈ కమిషనరేట్‌ను ఏర్పాటు చేసినట్లు తెలుస్తోంది. ఈ కమిషనరేట్‌ ప్రారంభోత్సవం అనంతరం సీఎం రేవంత్‌ రెడ్డి యంగ్‌ ఇండియా స్కిల్‌ యూనివర్సిటీని కూడా సందర్శించనున్నారు. ఫ్యూచర్‌ సిటీ ప్రాంతంలో విద్య, ఉపాధి రంగాలతో పాటు నివాస వసతులు కూడా వేగంగా విస్తరిస్తుండటంతో, స్థానిక ప్రజలకు మెరుగైన భద్రత అందించేందుకు ఈ పోలీసు యంత్రాంగం ఎంతో దోహదపడుతుందని నిపుణులు అభిప్రాయపడుతున్నారు. ఇటీవల కాలంలో రాష్ట్ర ప్రభుత్వం నగర శివారు ప్రాంతాలపై ప్రత్యేక దృష్టి సారించింది. భవిష్యత్తులో కోట్లాది రూపాయల పెట్టుబడులు రానున్న ఈ ప్రాంతంలో ఎటువంటి అవాంఛనీయ సంఘటనలకు తావులేకుండా పటిష్టమైన పోలీసు నిఘా ఉండేలా ప్రణాళికలు రచిస్తున్నారు. రానున్న రోజుల్లో ఈ కమిషనరేట్ పరిధి మరింత విస్తరించే అవకాశం ఉందని అధికార వర్గాలు వెల్లడించాయి. ఈ సరికొత్త రక్షణ వ్యవస్థ ఏర్పాటుతో ఫ్యూచర్‌ సిటీ ప్రాంత వాసులు, పారిశ్రామికవేత్తలు మరింత భద్రతాభావంతో ముందుకు సాగవచ్చని ప్రజలు ఆశాభావం వ్యక్తం చేస్తున్నారు. [ Future City Commissionerate, CM Revanth Reddy, Telangana News, Ibrahimpatnam Police, Tarun Joshi CP, DGP C.V. Anand, C.V. Anand, CP Sajjanar, Telugu One, Telugu News ]

Published on: Mon Oct 19, 2026 7:58PM

ఎల్ నినో పరిస్థితులపై కేబినెట్ సబ్ కమిటీ ఏర్పాటు.!

రాష్ట్రంలో మునుపెన్నడూ లేని విధంగా ముంచుకొస్తున్న వాతావరణ మార్పులు, అసాధారణ వాతావరణ పరిస్థితులపై తెలంగాణ ప్రభుత్వం అత్యంత కీలక నిర్ణయం తీసుకుంది. ఎల్ నినో ప్రభావం తీవ్ర కరవు పరిస్థితులను ఎదుర్కొనేందుకు వీలుగా అధికార యంత్రాంగం వేగంగా కదిలింది. ఈ నేపథ్యంలోనే రాష్ట్రంలోని వివిధ జిల్లాల్లో నెలకొన్న వర్షాభావ పరిస్థితులను, ముప్పును శాస్త్రీయంగా పరిశీలించేందుకు ప్రభుత్వం ఉన్నత స్థాయి కేబినెట్ సబ్ కమిటీని ఏర్పాటు చేసింది. ఈ మేరకు ప్రభుత్వ ప్రధాన కార్యదర్శి సంజయ్ జాజు అధికారిక ఉత్తర్వులు జారీ చేయగా, ఈ ప్రత్యేక కమిటీకి డిప్యూటీ సీఎం మల్లు భట్టి విక్రమార్కను చైర్మన్‌గా నియమించారు. ఈ కీలక కమిటీలో పలు కీలక శాఖల మంత్రులకు చోటు కల్పించారు. మంత్రులు ఉత్తమ్ కుమార్ రెడ్డి, పొంగులేటి శ్రీనివాసరెడ్డి, సీతక్క, తుమ్మల నాగేశ్వరరావు, వాకిటి శ్రీహరి ఈ సబ్ కమిటీలో సభ్యులుగా బాధ్యతలు నిర్వర్తించనున్నారు. అలాగే, ప్రభుత్వ ముఖ్య సలహాదారు కె. రామకృష్ణారావు ఈ కమిటీకి ప్రత్యేక ఆహ్వానితుడిగా వ్యవహరించనున్నారు. మరోవైపు, ప్రణాళికా శాఖ కార్యదర్శి ఈ కమిటీకి కన్వీనర్‌గా ఉంటూ సమన్వయ బాధ్యతలు చేపట్టనున్నారు. ఈ బృందం రాష్ట్రవ్యాప్తంగా కరవు పరిస్థితులను నిరంతరం పర్యవేక్షించనుంది. క్షేత్రస్థాయి నుంచి వచ్చే నివేదికలను విశ్లేషించి, తీసుకోవాల్సిన తక్షణ నివారణ చర్యలపై ప్రభుత్వానికి నిపుణుల సలహాలు, సిఫారసులు అందజేయనుంది. గత నైరుతి రుతుపవనాల కాలంలో ఆశించిన స్థాయిలో వర్షాలు పడకపోవడం, కొన్ని ప్రాంతాల్లో సాధారణం కంటే తక్కువ వర్షపాతం నమోదు కావడం వ్యవసాయ రంగాన్ని కలవరపెట్టింది. ముఖ్యంగా కొన్ని మండలాలు వర్షాభావంతో ఇబ్బందులు ఎదుర్కొంటున్న తరుణంలో, ఈ ముందస్తు ఏర్పాటు రైతాంగానికి కొండంత ధైర్యాన్ని ఇస్తుందని విశ్లేషకులు భావిస్తున్నారు. గ్రామీణ ప్రాంతాల్లో రాబోయే రోజుల్లో తలెత్తే తీవ్రమైన తాగునీటి ఎద్దడిని నివారించడమే ఈ కమిటీ ప్రధాన ధ్యేయంగా ఉండనుంది. బోర్లు ఎండిపోవడం, భూగర్భ జలాలు పడిపోవడం వంటి సమస్యలపై ముందస్తు ప్రణాళికలు రూపొందించాలని అధికార వర్గాలను ఈ బృందం ఆదేశించనుంది. కేంద్ర ప్రభుత్వం నుంచి తక్షణ సాయం లేదా కరవు నిధులు రాబట్టేందుకు అవసరమైన సమగ్ర నివేదికలను కూడా ఈ కమిటీ సిద్ధం చేయనుంది. వాతావరణ మార్పుల వల్ల ఏర్పడే సంక్షోభాన్ని సమర్థవంతంగా ఎదుర్కొని, ప్రజలకు, రైతులకు ఎలాంటి ఇబ్బందులు తలెత్తకుండా ప్రభుత్వం పకడ్బందీ చర్యలు చేపడుతుండటంపై సర్వత్రా హర్షం వ్యక్తమవుతోంది. త్వరలోనే ఈ సబ్ కమిటీ సమావేశమై భవిష్యత్ కార్యాచరణను ఖరారు చేయనుందని సమాచారం. [ Telangana Drought Committee, El Nino Effect Telangana, Deputy cm Mallu Bhatti Vikramarka, Telangana Cabinet Sub Committee, Drinking Water Crisis TS. CM Revanth reddy, Uttam Kumar Reddy, Ponguleti Srinivasa Reddy, Seethakka ]

Published on: Mon Oct 19, 2026 7:13PM

అమ్మాయి పేరుతో వల.. నగ్న ఫొటోలతో బ్లాక్‌మెయిల్‌.!

1,000 మందికి పైగా టార్గెట్‌.. నిందితుడు అరెస్టు.! సోషల్‌ మీడియాలో అమ్మాయి పేరుతో పరిచయం.. చాటింగ్‌తో స్నేహం.. ఆపై వ్యక్తిగత ఫొటోల సేకరణ.. చివరకు పోలీస్‌ కేసుల పేరుతో బెదిరింపులు! ఇలా హనీట్రాప్‌, సైబర్‌ బ్లాక్‌మెయిలింగ్‌కు పాల్పడిన యువకుడిని సైదాబాద్‌ పోలీసులు అరెస్టు చేశారు. నిందితుడు 1,000 మందికి పైగా వ్యక్తులతో చాటింగ్‌ చేసినట్లు, వారిలో 82 మంది తమ నగ్న ఫొటోలు, వీడియోలు పంపినట్లు పోలీసుల దర్యాప్తులో వెల్లడైంది. ఈ వ్యవహారంలో మొత్తం రూ.25.16 లక్షలు వసూలు చేసినట్లు పోలీసులు పేర్కొన్నారు. ఫేక్‌ ఐడీలతో పరిచయం.. ప్రైవేట్‌ ఫొటోలతో వల.!. భద్రాద్రి కొత్తగూడెం జిల్లాకు చెందిన కొండభత్తుల పవన్‌ కుమార్‌ (23) అనే యువకుడు హైదరాబాద్ బాలానగర్ లోని సిఐటీడీ లో డిప్లమా కోర్సును మధ్యలోనే ఆపేశాడు... మల్లారెడ్డి కాలేజీలో బీటెక్ చదువుతున్నట్లుగా తల్లిదండ్రులను నమ్మించాడు.. అనంతరం బషీర్బాగ్లో స్టార్ పవర్ డిజి లోన్స్ ప్రవేట్ కంపెనీలో రెండు నెలలు ఆ తర్వాత నాన్నకు రామగుడాలోని కపిల్ చిట్ ఫండ్స్ లో మూడు నెలలు పని చేశాడు ప్రస్తుతం ఎలాంటి ఉద్యోగం చేయకుండా.. సోషల్ మీడియా వేదికగా చేసుకొని సైబర్ మోసాలకు పాల్పడుతూ పలువురు వద్ద నుండి డబ్బులు వసూలు చేస్తున్నాడు. ఓ ఫిర్యాదు దారుడు ఇచ్చిన ఫిర్యాదుతో రంగంలోకి దిగిన పోలీసులు పవన్ కుమార్ ఆట కట్టించారు.. నిందితుడు పవన్...అమ్మాయిల పేర్లతో నకిలీ ఫేస్‌బుక్‌, ఇన్‌స్టాగ్రామ్‌ ఖాతాలు సృష్టించి పలువురికి ఫ్రెండ్‌ రిక్వెస్ట్‌లు పంపేవాడు. అవతలి వ్యక్తులతో అమ్మాయిలా మాట్లాడుతూ పరిచయం పెంచుకుని, క్రమంగా లైంగిక సంభాషణల వైపు మళ్లించేవాడు. అనంతరం ఇతరుల నగ్న చిత్రాలను పంపిస్తూ, బాధితుల నుంచి కూడా వ్యక్తిగత ఫొటోలు, వీడియోలు సేకరించేవాడని పోలీసులు తెలిపారు. ‘అన్నయ్య’ ఎంట్రీతో అసలు కథ.! బాధితుల నుంచి ఫొటోలు, వీడియోలు సేకరించిన తర్వాత కథలో మరో పాత్ర రంగ ప్రవేశం చేసేది... చాటింగ్‌ చేస్తున్న అమ్మాయికి తానే అన్నయ్యనంటూ నిందితుడు పవన్‌ బాధితులను సంప్రదించేవాడు. ఫోన్‌ కాల్స్‌, వాట్సాప్‌, సోషల్‌ మీడియా ద్వారా వారిని బెదిరిస్తూ.. తన చెల్లెలితో పోలీస్‌ స్టేషన్‌లో ఫిర్యాదు చేయిస్తానని భయపెట్టే వాడు. కొందరిని వ్యక్తిగతంగా కూడా కలుసుకుని డబ్బులు వసూలు చేసినట్లు పోలీసులు గుర్తించారు. ఒక్కొక్కరికి ఒక్కో వల.. లక్షల్లో వసూళ్లు.!. ఈ కేసులో వెలుగులోకి వచ్చిన వివరాలు మరింత విస్తుపోయేలా ఉన్నాయి. నిందితుడి స్నేహితుడొకరు కూడా ఇదే హనీట్రాప్‌లో చిక్కుకోగా, అతడి నుంచి రూ.4 లక్షలు వసూలు చేసినట్లు పోలీసులు తెలిపారు. పెట్టుబడులపై అధిక లాభాలు ఇప్పిస్తానని నమ్మించి ఓ సాఫ్ట్‌వేర్‌ ఉద్యోగి నుంచి రూ.7 లక్షలు మోసం చేసినట్లు పేర్కొన్నారు. మరో ఇద్దరి నుంచి వరుసగా రూ.6.8 లక్షలు, రూ.7 లక్షలు వసూలు చేసినట్లు పోలీసులు గుర్తించారు. వీటికి సంబంధించి మరిన్ని కేసులు నమోదయ్యే అవకాశం ఉందని తెలిపారు. 27 సోషల్‌ మీడియా ఖాతాలు.. మూడు మొబైల్‌ ఫోన్లు.!. నిందితుడు ఉపయోగించినట్లు గుర్తించిన నకిలీ ఖాతాల్లో 13 ఇన్‌స్టాగ్రామ్‌ ఐడీలు, 14 ఫేస్‌బుక్‌ ఐడీలు ఉన్నాయి. మూడు మొబైల్‌ నంబర్లు, రెండు వాట్సాప్‌ ఖాతాలను కూడా ఉపయోగించినట్లు పోలీసులు పేర్కొన్నారు. నకిలీ ఖాతాల్లో కోల్‌కతాకు చెందిన ‘చందన’ అనే యువతి ఫొటోలను ఎక్కువగా వినియోగించినట్లు గుర్తించి, ఆమెను అప్రమత్తం చేసినట్లు తెలిపారు. ఇతర రాష్ట్రాలు, విదేశాల్లోనూ బాధితులు.!. ఈ వ్యవహారంలో ఆంధ్రప్రదేశ్‌, కేరళ, తమిళనాడు, కర్ణాటక, పంజాబ్‌ రాష్ట్రాలకు చెందిన 24 మంది బాధితులు ఉన్నట్లు పోలీసులు వెల్లడించారు. దుబాయ్‌, టర్కీ, పాకిస్తాన్‌, కెనడాకు చెందిన మరో తొమ్మిది మంది బాధితుల వివరాలు కూడా గుర్తించినట్లు పోలీసులు తెలిపారు. వైద్యులు, వ్యాపారవేత్తలు, లెక్చరర్లు, ప్రైవేట్‌ ఉద్యోగులు, డెలివరీ సిబ్బంది, గిగ్‌ డ్రైవర్లు తదితరులు ఈ వలలో చిక్కుకున్నట్లు పేర్కొన్నారు. పోలీసుల లెక్కల ప్రకారం, బెదిరించి వసూలు చేసిన మొత్తం రూ.18 లక్షలు కాగా, మోసం చేసి కాజేసిన మొత్తం రూ.7.16 లక్షలు. మొత్తంగా రూ.25.16 లక్షల మేర వసూలు చేసినట్లుగా పోలీసులు గుర్తించారు. సైదాబాద్ పోలీసులు నిందితుడిపై భారతీయ న్యాయ సంహిత (BNS) సెక్షన్లు 308(7), 351(2), ఐటీ యాక్ట్‌ సెక్షన్లు 66C, 66D, 66E, 67A ప్రకారం కేసు నమోదు చేసి... అరెస్టు చేసి...నిందితుడి నుంచి రెడ్‌మి, వివో వై29, శామ్‌సంగ్‌ గెలాక్సీ మొబైల్‌ ఫోన్లు, హెచ్‌పీ ల్యాప్‌టాప్‌, 16 జీబీ పెన్‌డ్రైవ్‌ను స్వాధీనం చేసుకున్నారు. ఈ వ్యవహారంలో మరిన్ని బాధితులు ఉన్నారా? ఇతర కేసులతో సంబంధాలున్నాయా? అనే కోణాల్లో దర్యాప్తు కొనసాగిస్తున్నారు. పోలీసుల సూచనలు సోషల్‌ మీడియాలో పరిచయమైన అపరిచితులకు వ్యక్తిగత లేదా నగ్న ఫొటోలు, వీడియోలు పంపవద్దు. ఇలాంటి చిత్రాలతో ఎవరైనా బెదిరించి డబ్బులు డిమాండ్‌ చేస్తే భయపడి చెల్లించకుండా, ఆధారాలను భద్రపరచి పోలీసులకు ఫిర్యాదు చేయాలి. సైబర్‌ ఆర్థిక మోసానికి గురైతే వెంటనే 1930 నంబర్‌కు ఫోన్‌ చేయాలి లేదా జాతీయ సైబర్‌ క్రైమ్‌ పోర్టల్‌లో ఫిర్యాదు చేయాలని పోలీసులు ప్రజలకు విజ్ఞప్తి చేస్తున్నారు.. [ Hyderabad honey trap, cyber crime arrest, fake social media accounts, blackmail extortion, Saidabad police, online scams, Pavan, CM Revanth reddy, Hyderabad police, CP Sajjanar, DGP C.V. Anand ]

Published on: Mon Oct 19, 2026 5:22PM

నష్టాల ఊబిలో హైదరాబాద్ మెట్రో.. ఆరు నెలల్లోరూ.405 కోట్లు.. రెండో దశ విస్తరణపై నీలినీడలు.?

మహానగర వాసుల ప్రయాణ కష్టాలను తీరుస్తూ నగరంలో పరుగులు పెడుతున్న హైదరాబాద్ మెట్రో రైలు ప్రాజెక్టు తీవ్ర ఆర్థిక సంక్షోభంలో కూరుకుపోయింది. నష్టాల ఊబిలో ఇరుక్కోవడంతో రెండో దశ మెట్రో విస్తరణపై నీలినీడలు కమ్ముకున్నాయి. మెట్రోలో ప్రయాణీకుల రాకపోకలు రోజు రోజుకూ పెరుగుతున్నా.. విపరీతంగా పెరుగుతున్న నిర్వహణ వ్యయాలు, రుణాలపై చెల్లించాల్సిన భారీ వడ్డీ కారణంగా సంస్థ నష్టాల ఊబిలో కూరుకుపోతోంది. తాజాగా వెలువడిన ఆర్థిక ఫలితాల ప్రకారం, ప్రస్తుత ఆర్థిక సంవత్సరానికి సంబంధించి మెట్రో సంస్థ భారీ మొత్తంలో లోటును చవిచూడాల్సి వచ్చింది. ప్రయాణాల ద్వారా వచ్చే ఆదాయం కంటే, రోజువారీ నిర్వహణ, ఫైనాన్స్ ఖర్చులే అధికంగా ఉండటంతో లోటు 405 కోట్ల రూపాయలు దాటేసింది. ప్రస్తుత ఆర్థిక సంవత్సరంలో సెప్టెంబరు 30తో ముగిసిన తొలి ఆరు నెలల కాలానికి ఎల్‌అండ్‌టీ హైదరాబాద్ మెట్రో రైలు సంస్థ ఏకంగా 405.86 కోట్ల రూపాయల నికర నష్టాన్ని చవి చూసింది. గత ఆర్థిక సంవత్సరం ఇదే కాలంలో నష్టం 380.46 కోట్లరూపాయలతో పోలిస్తే ఈ ఏడాది తొలి అర్ధ సంవత్సరంలో భారీగా పెరిగింది. ఏడాది వ్యవధిలోనే నష్టాల పరిమాణం కోట్లలో పెరగడం ఆందోళన కలిగిస్తున్నది. మెట్రో కార్యకలాపాలు, ఇతరత్రా మార్గాల ద్వారా సంస్థకు సమకూరే ఆదాయం పెరుగుతున్నప్పటికీ, పెరిగిపోతున్న ఖర్చులకు ఆ పెరుగుదల ఇసుమంతైనా సరిపోవడం లేదు. దీనివల్ల నెల నెలా ఆర్థిక భారం పెరిగి పెరిగి తడిసి మోపెడౌతోంది. ప్రస్తుత సంవత్సరం తొలి అర్ధ భాగంలో మెట్రో రైలు కార్యకలాపాలు, ఇతర సేవల ద్వారా 524.78 కోట్ల రూపాయల ఆదాయం వచ్చింది. గత ఏడాది ఇదే కాలంతో వచ్చిన ఆదాయం 497.54 కోట్ల రూపాయలతో పోలిస్తే ఆదాయం మెరుగుపడినప్పటికీ, అంత కంటే వ్యయాల పెరుగుదల ముందు ఇది దిగదుడుపుగా మారింది. ఇంకా స్పష్టంగా చెప్పాలంటే.. మెట్రో నిర్వహణ ఖర్చులు, ఉద్యోగుల వేతనాలు, పరిపాలనా వ్యయాలు, డిప్రిసియేషన్ అన్నీ కలుపుకొని మొత్తం వ్యయం ఏకంగా 930.64 కోట్ల రూపాయలకు చేరింది. గత ఏడాది ఇదే కాలంలో ఈ వ్యయాలు 878 కోట్లరూపాయలుగా ఉంది. మెట్రో ఆర్థిక పరిస్థితిని పూర్తిగా కుంగదీస్తున్న ప్రధాన అంశం భారీ స్థాయిలో ఉన్న రుణాల వడ్డీ భారం. ప్రస్తుత ఆర్థిక సంవత్సరం తొలి ఆరు నెలల కాలంలో కేవలం ఫైనాన్స్, వడ్డీ ఖర్చుల రూపంలోనే మెట్రో 522.61 కోట్ల రూపాయలు చెల్లించాల్సి వచ్చింది. ఈ లెక్కన చూస్తే, మెట్రో సంస్థకు కేవలం వడ్డీల రూపంలోనే రోజువారీగా సుమారు 2.85 కోట్ల రూపాయల భారం పడుతోంది. ప్రాజెక్టు నిర్మాణం కోసం గతంలో తీసుకున్న భారీ రుణాలపై చెల్లించవలసిన వడ్డీలు తడిసిమోపెడవుతుండటంతో, ఎంత ఆదాయం వచ్చినా అది వడ్డీల చెల్లింపులకే సరిపోతున్న పరిస్థితి. ఈ ఆర్థిక సమస్యల నుంచి మెట్రో ప్రాజెక్టును గట్టెక్కించేందుకు ప్రభుత్వాలు పలు ప్రత్యామ్నాయ మార్గాలపై దృష్టి సారించాయి. మొదటి దశ మెట్రో ప్రాజెక్టును పూర్తిగా తమ చేతికి తీసుకుని, తక్కువ వడ్డీకి రుణాలను పునర్వ్యవస్థీకరించే (రీషెడ్యూల్) దిశగా ప్రయత్నాలు జరుగుతున్నాయి. వడ్డీ రేట్లను గణనీయంగా తగ్గించడం ద్వారా రోజువారీ ఆర్థిక భారాన్ని తగ్గించుకోవచ్చని, తద్వారా సంస్థను దీర్ఘకాలికంగా నిలకడైన బాట పట్టించవచ్చని అధికారులు భావిస్తున్నారు. అయితే ఈ స్వాధీన ప్రక్రియ, రుణాల పునర్వ్యవస్థీకరణ చర్చలు ఇంకా తుది దశకు చేరుకోలేదు. మరోవైపు, నగరంలో పెరుగుతున్న రవాణా రద్దీకి తగినట్లుగా మెట్రో రెండో దశ విస్తరణ పనులను వేగవంతం చేయాలన్న డిమాండ్ రోజు రోజుకూ జోరందుకుంటోంది. అయితే ప్రాజెక్టుకు సంబంధించిన ఆర్థిక అవరోధాలు, రుణాల భారం తొలగితేనే.. విస్తరణ పనులకు బాటలు పడతాయి. అంత వరకూ రెండో దశ విస్తరణ కాగితాలకే పరిమితమౌతుంది. [Hyderabad Metro Losses, Metro Rail Financial Results, Hyderabad Metro Loan Restructuring, Second Phase, Telugu One]

Published on: Mon Oct 19, 2026 3:59PM