చిన్మయి శ్రీపాద ఒక యాక్టివిస్ట్‌గా సోషల్ మీడియాలో ఎప్పుడూ పోస్టులు పెడుతూ ఉంటుంది. మహిళా సమస్యల మీద ఎప్పుడూ గొంతెత్తి తన స్వరాన్ని వినిపిస్తూ ఉంటుంది. అలాంటి చిన్మయి రీసెంట్‌గా సంగీత దర్శకుడు దేవా గురించి ఒక పోస్ట్ పెట్టారు. "దేవాగారు గజల్స్‌ను అద్భుతంగా పాడేవారని ఎంతమందికి తెలుసో నాకు తెలియదు. నా టీనేజ్ చివరి రోజుల్లో హిందుస్థానీ శాస్త్రీయ సంగీతం, గజల్స్‌ రెండింటిలోనూ మెడల్స్ సాధించి, ఆల్ ఇండియా రేడియోలో గ్రేడెడ్ ఆర్టిస్ట్‌గా గుర్తింపు పొందాననే విషయం తెలిసినవారిలో దేవాగారు కూడా ఒకరు. ఆయన కోసం కొన్ని రికార్డింగ్ సెషన్లకు వెళ్లినప్పుడు, మెహదీ హసన్‌గారు లేదా గులాం అలీగారు పాడిన గజల్‌ను దేవా గారు స్వయంగా పాడేవారు. ఆ తర్వాత చిరునవ్వుతో, “నాకు అంత హిందీ రాదమ్మా” అని అనేవారు. గజల్స్‌లోని కష్టమైన స్వర ప్రయోగాలను కూడా చిన్న సెలయేరు ప్రవహించినంత సున్నితంగా, అద్భుతంగా పాడేవారు. ఆ తర్వాత, “వాళ్లంతా గొప్ప లెజెండ్స్‌.. మనకంతగా రాదు” అనేవారు.ఆయన ప్రతిభను చూసి నేను ఆశ్చర్యపోయేదాన్ని. అంతటి గొప్ప సంగీత ప్రతిభ ఉన్నప్పటికీ, తన సామర్థ్యాన్ని తక్కువగా అంచనా వేసుకుంటూ ఉండేవారు
ఆయనతో కలిసి ఏదైనా కార్యక్రమంలో పాల్గొనే అవకాశం నాకు వచ్చి ఉంటే, వేదికపై ఆయనతో ఒక గజల్ పాడించాలని ఎంతో కోరుకునేదాన్ని. నిజంగా అలాంటి అవకాశం దక్కి ఉంటే బాగుండేది.ఆ అవకాశం దక్కకపోవడం నా జీవితాంతం ఒక తీరని కోరికగా, బాధగా మిగిలిపోతుంది. నేను కెరీర్ ప్రారంభించిన కొత్తలో నాలాంటి కొత్త గాయనీగాయకులకు తన స్వరరచనలను నేర్పించేటప్పుడు ఆయన ఎంతో సానుకూలంగా, దయగా, ప్రేమతో, ఎదుటివారి భావాలను అర్థం చేసుకునేలా వ్యవహరించేవారు. ప్రతి రికార్డింగ్ సెషన్ పూర్తయ్యాక ఆయన ఎంతో ఆప్యాయంగా “శభాష్!” అని అభినందిస్తూ చప్పట్లు కొట్టేవారు. ఆయన కుమారుడు శ్రీకాంత్ కూడా ఆ సంప్రదాయాన్ని కొనసాగిస్తున్నారు. ఆయన చెప్పిన ఎన్నో సరదా సంఘటనలను నేను ఎప్పటికీ మర్చిపోలేను. ఒక్కో సంఘటన ఎంతో ప్రత్యేకంగా, ఎంతో హాస్యభరితంగా ఉండేది. వాటిని గుర్తుచేసుకుంటే నవ్వి నవ్వి కళ్లలో నీళ్లు వచ్చేవి. కొన్నిసార్లు నేలపై కూర్చుని హార్మోనియం వాయిస్తూ ఆయన ఆ సరదా విషయాలను పంచుకునేవారు. ఆయన సంగీత దర్శకత్వంలో పాటలు పాడే అవకాశం నాకు దక్కడం నా అదృష్టంగా భావిస్తున్నాను. ఆయన ఇక లేరనే విషయాన్ని నా మనసు అంగీకరించలేకపోతోంది. బహుశా నా బాధను మాటల్లో సరిగ్గా వ్యక్తం చేయలేకపోతున్నాను" అంటూ తన బాధను వ్యక్తపరిచారు.
[singer chinmayi sripada, movies, music director deva, the traitors emotional post]
