దీప నమ్మకమే నిజమైంది. మోనితను ఆమె భర్త కార్తీక్ హత్య చెయ్యలేదన్నాడనేది నూటికి నూరుపాళ్ళు వాస్తవం. అసలు, హత్య జరగనే లేదు. మోనిత మరణించలేదు. దీపపై కోపంతో హత్యకు గురైనట్టు నాటకం ఆడిన మోనిత, కార్తీక్‌ను కటకటాల వెనక్కి పంపింది. ఇవాళ్టి (ఆగస్టు 17) 'కార్తీక దీపం' ఎపిసోడ్ లో మోనితను దర్శకుడు తెరపైకి తీసుకొచ్చాడు. ప్రేక్షకులకు పెద్ద ట్విస్ట్ ఇచ్చాడు. అసలు, నేటి ఎపిసోడ్ హైలైట్స్ ఏంటంటే...

తన భర్తకు బాలేదని జైలులో కార్తీక్ దగ్గర రత్నసీత మందుల చీటీ రాయించుకుని వెళ్లిన సంగతి తెలిసిందే. దానిని తీసుకువెళ్లి ఓ చిన్న ఇంటికి వెళుతుంది. చూస్తే... అందులో మోనిత ఉంటుంది. ఆ ఇంటి గోడలపై 'నా కార్తీక్... నా కార్తీక్' అని రాసి ఉంటుంది. చిన్న మంచం... కుండలో నీళ్లు... ఎర్రంచు నల్లచీరలో మోనిత! మేడమ్ అంటూ రత్నసీత డోర్ తియ్యగానే.... 'వచ్చావా! నా కార్తీక్ ఫోటో తెచ్చావా?' అంటూ కళ్లు పెద్దవి చేసుకుని చూస్తుంది. ఫోనులో కార్తీక్ ఫొటోలను, మందుల చీటిపై కార్తీక్ హ్యాండ్ రైటింగ్ ను ముద్దులు పెట్టుకుంటుంది.

'నిన్ను వదులుకోను కార్తీక్. నీకు శిక్ష పడాలని కాదు, దీపకు బుద్ధి చెప్పాలని నా ప్రయత్నం. ఆ దీపను వదిలిపెట్టను' అని మోనిత అనడంతో కావాలని హత్యనాటకం ఆడిందని స్పష్టమైంది. తర్వాత రత్నసీతకు కొంత డబ్బులు ఇచ్చి 'నువ్వు నా మనిషి అని తెలియకుండా జాగ్రత్తపడు' అని చెబుతుంది.

అంతకు ముందు... దీపను అంజి కలుస్తాడు. హత్యానేరం తనపై వేసుకుంటానని అంటాడు. అందుకు దీప అంగీకరించదు. తర్వాత మోనితకు శత్రువులు ఎవరైనా ఉన్నారా? అని దీపను అంజి అడుగుతాడు. తనను చంపడానికి డ్రైవర్ దుర్గను తన అత్తారింట్లో చేర్పించగా, చివరకు మోనితకు శత్రువుగా మారి తనను కాపాడాడని దీప చెబుతుంది. అతడి గురించి ఆరా తీస్తానని అంజి అంటాడు.