ఎన్నో భారీ అంచనాల మధ్య జూలై 31న పాన్‌ ఇండియా మూవీగా విడుదలైన ‘కింగ్డమ్‌’ మొదటి రోజు డివైడ్‌ టాక్‌తో మొదలైంది. అయితే సినిమాపై ఎంతో ఆసక్తితో ఉన్న ఆడియన్స్‌ థియేటర్లకు తరలి వచ్చినట్టు కలెక్షన్స్‌ చూస్తే అర్థమవుతుంది. మొదటి రోజు ప్రపంచవ్యాప్తంగా రూ.39 కోట్లు కలెక్ట్‌ చేసి విజయ్‌ దేవరకొండ సినిమాల్లో ఫస్ట్‌డే హయ్యస్ట్‌ గ్రాసర్‌గా నిలిచింది. ఈ కలెక్షన్‌ ట్రెండ్‌ని బట్టి వీకెండ్‌లోపు బ్రేక్‌ ఈవెన్‌గా చెప్పుకుంటున్న 110 కోట్ల గ్రాస్‌ను క్రాస్‌ చేసే అవకాశం కనిపిస్తోంది. ఇప్పటికే రౌడీస్టార్‌ ఫ్యాన్స్‌ తమ హీరోకి చాలా కాలం తర్వాత సూపర్‌హిట్‌ వచ్చిందని చాలా హ్యాపీగా ఉన్నారు. తమ ఆనందాన్ని సోషల్‌ మీడియా ద్వారా పంచుకుంటున్నారు.

ఇదిలా ఉంటే.. విజయ్‌ దేవరకొండ లవ్‌ పార్టనర్‌గా అందరూ చెప్పుకుంటున్న రష్మిక మందన్న సోషల్‌ మీడియాలో ఈ సినిమాపై స్పందిస్తూ ‘మనం కొట్టినం’ అంటూ పోస్ట్‌ చేయడం, దానికి విజయ్‌ దేవరకొండ రిప్లై ఇవ్వడం సినిమా రిలీజ్‌ రోజు ప్రత్యేక ఆకర్షణగా నిలిచింది. వీరిద్దరి పోస్ట్‌లు బాగా వైరల్‌ అవుతున్నాయి. హీరోగా ప్రత్యేక ఇమేజ్‌ను సొంతం చేసుకున్న విజయ్‌ దేవరకొండ ఒక సూపర్‌హిట్‌ కొట్టి చాలా కాలమైంది. అతన్ని వరస ఫ్లాప్‌లు వెంటాడుతున్న నేపథ్యంలో ఎట్టి పరిస్థితుల్లో ‘కింగ్డమ్‌’తో బ్లాక్‌బస్టర్‌ కొట్టి మళ్లీ ఫామ్‌లోకి రావాలని ఎంతో కాన్ఫిడెన్స్‌తో ఈ చిత్రం చేశారు విజయ్‌.

ఈ సినిమా ట్రైలర్‌ రిలీజ్‌ అయిన తర్వాత సినిమాకి మంచి హైప్‌ వచ్చింది. దాంతో అడ్వాన్స్‌ బుకింగ్స్‌ కూడా భారీగానే జరిగాయి. బుకింగ్స్‌ ఓపెన్‌ అయిన కొన్ని గంటల్లోనే లక్ష టికెట్స్‌ సేల్‌ జరిగినట్టు నిర్మాణ సంస్థ తెలిపింది. అలాగే యు.ఎస్‌.లో వేసిన ప్రీమియర్స్‌కి కూడా మంచి రెస్పాన్స్‌ వచ్చింది. దీంతో మొదటి రోజు కలెక్షన్స్‌ ప్రపంచవ్యాప్తంగా 39 కోట్లకు చేరింది. కలెక్షన్ల పరంగా ఇదే దూకుడు కొనసాగితే వీకెండ్‌లోపు 110 కోట్ల టార్గెట్‌ను ఈజీగానే రీచ్‌ అయ్యే అవకాశం కనిపిస్తోంది.