TeluguOne Services
Copyright © 2000 - , TeluguOne Sahityam - All rights reserved.
అభినవ రాక్షసుడు
శ్రీమతి శారద అశోకవర్ధన్
పారపళ్ళు లేవు కోర మీసాల్లేవు
వీరుడసలే కాదు పరమ భీరువు
నోరువిప్పి మాట్లాడలేడు
తీరుగా ఏపనీ చెయ్యలేడు
చెప్పేది ఒకటయితే చేసేది వేరొకటి
చెప్పి చేసేది ఇంకొకటి .
కటువుగా మాట్లాడడు కఠిణంగా అగుపడడు
సుతిమెత్తని తీగెలా మెలికలు తిరిగిపోతాడు
పాదరసంలా దేనికీ అంటక నడిచిపోతాడు
బండరాయికన్నా బలమైన గుండె కలవాడు
బల్లకింద నుంచే బహుకార్యాలు సాధించగలవాడు
కత్తితో అవసరం లేనివాడు కలంతోనే పొడిచి చంపగలిగేవాడు
గాయం కనబడకుండా గట్టి జాగ్రత్తలు తీసుకునేవాడు
ఖాయంగా నానాగడ్డీ కరిచైనా తన స్థానాన్ని నిలుపుకునేవాడు
కక్షబూనితే కాళ్ళబూట్లనే రధచక్రాలుగా వాడికసి తీర్చుకునేవాడు
కిక్కురు మనకుండా నిలుచున్నచోటే నీతులు చెబుతూనే
గోతులు తీసేవాడు
ఎవడయ్యావాడు ఎవడు వాడు?
వాడె ఆధునిక రాక్షసుడు
నేటి మానవుడు.
వాడిని పసిగట్టడం కష్టం వాడి నీడంటేనే భయం
అంతకన్నా
పారపళ్ళూ కోరమీసాలూ వున్న ఆకాలపు
రాక్షసుడే నయం! ఇది ముమ్మాటికీ నిజం!