ప్రపంచంలోనే అత్యుత్తమ పారిశ్రామిక విధానాన్ని తమ ప్రభుత్వం రెడీ చేసిందని తెలంగాణ ముఖ్యమంత్రి కేసీఆర్ ప్రకటించారు. మహబూబ్ నగర్ జిల్లా పర్యటనలో వున్న కేసీఆర్ అడ్డాకులలోని కోజెంట్ పరిశ్రమని సందర్శించారు. అక్కడ అదనపు ప్లాంటును ప్రారంభించారు. ఈ సందర్భంగా ఆయన తమ ప్రభుత్వం రూపొందించిన ప్రపంచంలోనే అత్యుత్తమ పారిశ్రామిక విధానం గురించి చెప్పారు. తమ ప్రభుత్వ పారిశ్రామిక విధానాన్ని ప్రపంచంలోని పెట్టుబడిదారులందరూ ప్రశంసిస్తారని కేసీఆర్ చెప్పారు. తమ విధానం ఏక గవాక్ష విధానం అని, అది చాలా పారదర్శకంగా వుంటుందని ఆయన తెలిపారు. పెట్టుబడిదారులు నేరుగా తన కార్యాలయానికి రావొచ్చని, పరిశ్రమలకు సంబంధించిన అన్ని అనుమతులనూ ముఖ్యమంత్రి కార్యాలయం నుంచి ఒకేసారి పొందవచ్చని అన్నారు. పరిశ్రమలకు ఇచ్చే అనుమతులను తాను వ్యక్తిగతంగా పర్యవేక్షిస్తానని సీఎం కేసీఆర్ తెలిపారు.