మీ ఇంట్లో మీరు మీ కుటుంబ సభ్యులతో సరదాగా మాట్లాడుతూ వుంటారు. ఇంతలో ఒక ఫ్యామిలీ మెంబర్ అచేతనంగా పడిపోతారు. కార్డియాక్ అరెస్ట్ కావచ్చు.. అప్పుడు మీరేం చేస్తారు? మీరు ఆఫీసులో వుంటారు.. మీ కొలీగ్ ఒకరు ఉన్నట్టుండి స్పృహ కోల్పోతారు అప్పుడు మీరేం చేస్తారు? వేరే ఎవరో కాదు.. మీరే అనుకోండి.. ఉన్నట్టుండి దబ్బుమని కింద పడిపోతారు.. అప్పుడు మీ ఇంట్లోవారు గానీ, ఆఫీసులో వాళ్ళు గానీ ఏం చేయాలి? మీ ప్రాణాలు పోకుండా ఎలా కాపాడాలి? ఇలాంటి సందర్భాల్లో ప్రాణాలు పోసే సంజీవని సీపీఆర్ (Cardio pulmonary resuscitation - CPR).

కార్డియో పల్మోనరీ రీససిటేషన్‌ని షార్ట్ కట్‌లో సీపీఆర్ అని పిలుస్తారు. ఎవరైనా స్పృహ తప్పి పడిపోయినా, కార్డియాక్ అరెస్టు అయినా, ఏదైనా గొంతుకు అడ్డం పడినా, కరెంట్ షాక్‌కి గురై అచేతనంగా పడిపోయినా, నీటిలో మునిగిపోయినా, ఊపిరి అందకపోయినా, డ్రగ్స్ ఓవర్ డోస్ అయినా... ఇలాంటి సందర్భాల్లో సీపీఆర్ చేయడం వల్ల అచేతనంగా పడిపోయిన వ్యక్తులు మళ్ళీ ప్రాణాలతో బతికి బయటపడతారు. శ్వాస ఆడేలా చేయడం, ఆగిపోయిన గుండెను మళ్ళీ కొట్టుకునేలా చేయడం సీపీఆర్ ద్వారా జరిగి జీవితాలు నిలబడతాయి.

సీపీఆర్ వల్ల ప్రాణాలు నిలబడతాయని తెలిసినా చాలామంది సీపీఆర్ చేయడం నేర్చుకోరు. జనానికి సీపీఆర్ మీద అవగాహన లేకపోవడం వల్ల ప్రతి ఏటా ఎంతోమంది చనిపోతున్నారు. ఎవరైనా అచేతనంగా పడిపోతే చుట్టూ వున్నవారు హడావిడి పడిపోవడమో, అంబులెన్స్.ని పిలవటమో, ఆస్పత్రికి తరలించడమే చేస్తారు తప్ప సీపీఆర్ చేయాలన్న ఆలోచన చాలామందికి రావడం లేదు. దాని వల్ల ఎంతోమంది ప్రాణాలు కోల్పోతున్నారు. ఇలాంటి సందర్భాల్లో సీపీఆర్ అందించగలిగితే ప్రాణాలు నిలబడతాయి. అందుకే అందరికీ సీపీఆర్ మీద అవగాహన వుండాలి. సీపీఆర్ నేర్చుకోవాలి.

విజయవాడలోని అయ్యప్ప నగర్ ప్రాంతంలో సాయి అనే ఆరేళ్ళ బాలుడికి కరెంట్ షాక్ కొట్టింది. దాంతో ఆ బాలుడు స్పృహ తప్పి పడిపోయాడు. ఆ బాలుడి తల్లిదండ్రులు సాయిని తీసుకుని డాక్టర్ దగ్గరకి వెళ్తున్నారు. రోడ్డు మీద వెళ్తున్న వీళ్ళని డాక్టర్ రవళి చూశారు. వాళ్ళని ఆపారు. ఆ బాలుడికి అక్కడే సీపీఆర్ చేశారు. దాంతో సాయి ప్రాణాలు దక్కించుకున్నారు. సమయానికి అక్కడకి వచ్చి, సీపీఆర్ చేసి నిండు ప్రాణాన్ని కాపాడిన డాక్టర్ రవళికి అందరూ ధన్యవాదాలు తెలిపారు. అందుకే అందరూ సీపీఆర్ నేర్చుకోవాలి. ఆపదలో వున్నవారినిని కాపాడాలి.