కేసీఆర్, అధికార పార్టీకి షాక్ ఇస్తూ ఆ పార్టీ మాజీ ఎమ్మెల్యే సోమారపు సత్యనారాయణ పార్టీకి రాజీనామా చేశారు. త్వరలోనే ఆయన బీజేపీలో చేరే అవకాశం ఉందనే ప్రచారం సాగుతోంది. గత ఏడాది డిసెంబర్ 7వ తేదీన జరిగిన ఎన్నికల్లో గోదావరిఖని నుండి సోమారపు సత్యనారాయణ టీఆర్ఎస్ అభ్యర్ధిగా పోటీ చేసి ఓటమి పాలయ్యాడు.ఈ స్థానంలో ఇండిపెండెంట్ అభ్యర్థి చందర్ విజయం సాధించాడు. ఆ తర్వాత చందర్  టీఆర్ఎస్‌లో చేరారు. 

ఆయన చేరిన నాటి నుండే పార్టీలో తనకు తగిన గౌరవం లేదని సోమారపు సత్యనారాయణ ఆరోపిస్తున్నారు. ఇక విషయం ముదిరి పాకాన పడడంతో ఈరోజు గోదావరిఖనిలో మీడియా సమావేశం ఏర్పాటు చేసిన సోమారపు సత్యనారాయణ టీఆర్ఎస్‌ కు రాజీనామా చేస్తున్నట్టుగా ప్రకటించారు. పార్టీలో కలిసి పనిచేయడం సాధ్యం కావడం లేదన్నారు.  ఈ సందర్భంగా ఆయన పార్టీపై పలు తీవ్ర వ్యాఖ్యలు చేశారు. టీఆర్‌ఎస్‌లో అరాచకం పెరిగిపోయిందని తనపై, అనుచరులపై పోలీసులతో దౌర్జన్యం చేయిస్తున్నారని విమర్శించారు. 

పార్టీ సభ్యత్వం పుస్తకాలు ఇవ్వకుండా అవమానించారని ఆయన ఆవేదన వ్యక్తం చేశారు. అడగకుండానే ఆర్టీసీ చైర్మన్‌ పదవిని కేసీఆర్‌ ఇచ్చారని పార్టీ అధిష్టానంతో ఇబ్బంది లేదని కానీ కొందరి వల్లే టీఆర్‌ఎస్‌లో ఇమడలేకపోతున్నానని ప్రకటించారు. గతంలో కూడా ఈయన రామగుండం మేయర్ గా కొంకటి లక్ష్మీనారాయణ పార్టీ వ్యతిరేక కార్యకలాపాలకు పాల్పడుతున్నందున చర్యలు తీసుకోవాలని పార్టీ అధిష్టానం దృష్టికి తీసుకెళ్లినా ప్రయోజనం లేకుండా పోయిందని రాజకీయాల నుండి తప్పుకొంటున్నట్టు ప్రకటించారు. ఆ తర్వాత అధిష్టానం బుజ్జగింపులతో మళ్ళీ మామూలు అయ్యారు.