సంతోష్‌నగర్ ఐఎస్ సదన్ ఎక్స్ రోడ్డులో జరిగిన విషాదకర రోడ్డు ప్రమాదంలో మూడేళ్ల బాలుడు ఇజాన్ ఉద్దీన్ మృతి చెందాడు. దీంతో ఆ కుటుంబంలో విషాద వాతావరణం నెలకొంది. నిన్న మొహియుద్దీన్ తన కుటుంబ సభ్యులతో కలిసి సంతోష్‌నగర్ ఎక్స్ రోడ్‌లోని స్వీకార్ హోటల్ నుంచి పార్సెల్ తీసుకునేందుకు వెళ్లారు. అదే సమయంలో రాత్రి సుమారు 11 గంటల సమయంలో ఇజాన్ ఉద్దీన్‌  రోడ్డు దాటుతుండగా వేగంగా వచ్చిన ఓ కారు చిన్నారి ఇజాన్ ఉద్దీన్‌ను ఢీకొట్టింది. ఈ ప్రమాదంలో చిన్నారికి తీవ్ర గాయాలయ్యాయి. ప్రమాదాన్ని గమనించిన స్థానికులు వెంటనే స్పందించి చిన్నారిని స్థానిక షాలిని ఆస్పత్రికి తరలించారు. 

అనంతరం ఓవైసీ ఆస్పత్రికి తరలించగా, వైద్యులు పరీక్షించిన తర్వాత బాలుడు అప్పటికే మృతి చెందినట్లు నిర్ధారించారు. ప్రమాదం అనంతరం డ్రైవర్ కారుతో సహా అక్కడి నుంచి పరారయ్యాడు. సమాచారం అందుకున్న వెంటనే I.S. సదన్ పోలీసులు క్లూస్ టీమ్‌తో కలిసి ఘటనాస్థలికి చేరుకుని దర్యాప్తు ప్రారంభించారు. ఈ రోడ్డు ప్రమాదానికి సంబంధించిన దృశ్యాలు అక్కడ ఉన్న సీసీటీవీ కెమెరాలో రికార్డు అయ్యాయి. వాటిని ఆధారంగా చేసుకుని పోలీసులు దర్యాప్తు ముమ్మరం చేశారు. సమాచారం అందుకున్న వెంటనే మజ్లిస్ అధ్యక్షుడు బారిస్టర్ అసదుద్దీన్ ఒవైసీ, ఫ్లోర్ లీడర్ అక్బరుద్దీన్ ఒవైసీల ఆదేశాల మేరకు యాకుత్‌పురా మజ్లిస్ ఎమ్మెల్యే జాఫర్ హుస్సేన్ మెరాజ్ సంఘటనా స్థలానికి చేరుకుని పోలీసు అధికారులతో మాట్లాడారు. 

ప్రమాదానికి కారణమైన కారు నంబర్‌ను పోలీసులు గుర్తించారు. కారు, డ్రైవర్ ఆచూకీని గుర్తించి చట్ట ప్రకారం చర్యలు తీసుకుంటామని పోలీసులు తెలిపారు. చిన్నారి మృతి చెందడంతో తల్లిదండ్రుల రోదన చూసి స్థానికులు సైతం కంటతడి పెట్టుకున్నారు. వాహనదారులు వాహనాలను నడిపేటప్పుడు అప్రమత్తంగా ఉండాలని, అలాగే  ప్రతి తల్లిదండ్రులు వారి పిల్లలపై ఎల్లప్పుడూ నిఘా ఉంచాలని ప్రజలకు విజ్ఞప్తి చేశారు.ఈ ఘటనకు సంబంధించి ఇంకా పూర్తి వివరాలు తెలియాల్సి ఉంది.

[ Three-year-old boy dies after being hit by car in Santoshnagar, Santoshnagar IS Sadan X Road, 
Izhan Uddin, Owaisi Hospital, Majlis MLA Jafar Hussain Meraj, Crime news, CM Revanth reddy, CP Sajjnar, DGP C.V. Anand ]