తెలంగాణ రాష్ట్ర ప్రభుత్వ ఉద్యోగులు, పెన్షనర్ల దశాబ్దాల కల నెరవేరింది. ఉద్యోగుల ఆరోగ్య భద్రతకు అత్యంత ప్రాధాన్యతనిస్తూ కాంగ్రెస్ ప్రభుత్వం సరికొత్త ‘న్యూ ఎంప్లాయ్స్ హెల్త్ స్కీమ్‌ను అధికారికంగా ప్రారంభించింది. సచివాలయంలో జరిగిన ఒక ఉన్నత స్థాయి కార్యక్రమంలో ఉప ముఖ్యమంత్రి భట్టి విక్రమార్క, వైద్య ఆరోగ్య శాఖ మంత్రి దామోదర రాజనర్సింహ కలిసి ఈ చారిత్రాత్మక పథకానికి శ్రీకారం చుట్టారు. ఈ సందర్భంగా సరికొత్త ఎన్‌ఈహెచ్ఎస్ పోర్టల్, డిజిటల్ హెల్త్ కార్డులతో పాటు సరికొత్త ఎంప్లాయ్ హెల్త్ కేర్ ట్రస్ట్  డీడ్‌ను వారు ఆవిష్కరించారు. 

దీనివల్ల దాదాపు 17.88 లక్షల మంది ఉద్యోగులు, పెన్షనర్లు మరియు వారి కుటుంబ సభ్యులకు పూర్తి నగదు రహిత (క్యాష్‌లెస్) ఆరోగ్య రక్షణ లభించనుంది.  ఈ పథకం పరిధి ఎంత విస్తృతమైనదో అర్థం చేసుకోవడానికి కొన్ని కీలక గణాంకాలను పరిశీలించాలి. రాష్ట్రవ్యాప్తంగా మొత్తం 886 కార్పొరేట్ మరియు ప్రైవేట్ ఆస్పత్రులు, అలాగే 114 ప్రభుత్వ ఆస్పత్రుల నెట్‌వర్క్ ద్వారా ఈ నగదు రహిత సేవలు అందనున్నాయి. మొత్తంగా 1,000 ఆస్పత్రులలో ఉద్యోగులు రూపాయి కూడా చేతి నుంచి ఖర్చు పెట్టకుండా సూపర్ స్పెషాలిటీ చికిత్సలు పొందవచ్చు. అపోలో, యశోద, కిమ్స్, మెడికవర్, కేర్, కామినేని వంటి అగ్రశ్రేణి కార్పొరేట్ ఆస్పత్రులు కూడా ఈ ప్యానెల్‌లో భాగస్వామ్యమయ్యాయి. 

కేవలం సాధారణ రోగాలు మాత్రమే కాకుండా దాదాపు 1,816 రకాల వైద్య మరియు శస్త్రచికిత్స ప్యాకేజీలను  ఈ పథకం ద్వారా ఉచితంగా అందించేలా డిజైన్ చేశారు.  ఈ సరికొత్త హెల్త్ స్కీమ్ పూర్తి పారదర్శకంగా సాగడానికి డిజిటల్ వ్యవస్థను రంగంలోకి దించారు. రోగి హాస్పిటల్‌లో చేరినప్పటి నుంచి ప్రీ-ఆథరైజేషన్, చికిత్స, మరియు క్లెయిమ్ సెటిల్‌మెంట్ వరకు జరిగే పూర్తి ప్రక్రియ అంతా కూడా ఆన్‌లైన్‌లోనే డిజిటల్ రూపంలో జరగనుంది. ఇదివరకు ఉన్న అనేక అడ్డంకులు, కాలయాపనలను ఈ నూతన విధానం పూర్తిగా దూరం చేయనుంది. 

ఇక వైద్య సేవల నిర్వహణను పర్యవేక్షించేందుకు రాష్ట్రంలో ప్రస్తుతం అందుబాటులో ఉన్న 12 వెల్‌నెస్ సెంటర్లతో పాటు అదనంగా మరో 24 వెల్‌నెస్ సెంటర్లను త్వరలోనే ఏర్పాటు చేయాలని నిర్ణయించారు. ప్రతి వెల్‌నెస్ సెంటర్‌ను అక్కడి ప్రభుత్వ జనరల్ ఆస్పత్రితో అనుసంధానం చేస్తారు. దీనివల్ల స్థానికంగానే నిరంతర సంరక్షణ, అవసరమైన మందులు సులభంగా అందుతాయి.  ఈ పథకం ఆర్థిక నమూనా కూడా చాలా ఆసక్తికరంగా రూపుదిద్దుకుంది. దీని నిర్వహణ కోసం ఉద్యోగుల మూల వేతనం  లేదా పెన్షనర్ల మూల పెన్షన్ నుండి ప్రతి నెలా 1.5 శాతం మొత్తాన్ని ఈహెచ్‌ఎస్  హెల్త్ ఫండ్‌కు మినహాయిస్తారు. ఉద్యోగుల నుంచి సేకరించే నిధుల మొత్తానికి సరిసమానంగా తెలంగాణ ప్రభుత్వం కూడా తన వంతు వాటాను (మ్యాచింగ్ గ్రాంట్) జోడించి ఈ ట్రస్ట్‌కు అందిస్తుంది. 

దీనివల్ల ఏటా దాదాపు ₹528 కోట్ల నిధుల పూల్ సమకూరుతుంది. ఈ మొత్తం నిధులను ప్రత్యేక అకౌంట్ హెడ్ కింద భద్రపరిచి, కేవలం ఉద్యోగుల అత్యవసర వైద్య చికిత్సల కోసమే వినియోగిస్తారు.  భార్యాభర్తలు ఇద్దరూ ప్రభుత్వ ఉద్యోగులుగా ఉన్నప్పుడు వచ్చే డబుల్ డిడక్షన్ సమస్యకు ప్రభుత్వం స్వస్తి పలికింది. ఒకే ఇంట్లో ఇద్దరు ఉద్యోగులున్నా, లేదా ఒకరు ఉద్యోగి మరొకరు పెన్షనర్‌గా ఉన్నా కూడా కేవలం ఒకరి జీతం నుంచి మాత్రమే 1.5 శాతం నిధుల కటింగ్ ఉంటుంది. 

పొరపాటున ఎవరికైనా రెండు సార్లు కట్ అయి ఉంటే, ఆ మొత్తాన్ని వెంటనే తిరిగి రీఫండ్ చేస్తామని ప్రభుత్వం ప్రకటించింది. ప్రభుత్వ ప్రధాన కార్యదర్శి నేతృత్వంలో ఏర్పడిన న్యూ ఎంప్లాయ్ హెల్త్ కేర్ ట్రస్ట్  ఈ సేవల నాణ్యతను, బిల్లుల చెల్లింపులను నిరంతరం పర్యవేక్షిస్తుంది. ఉద్యోగుల ఆరోగ్యానికి బలమైన భద్రత కల్పిస్తూ తెలంగాణ ప్రభుత్వం తీసుకున్న ఈ నిర్ణయంపై రాష్ట్రవ్యాప్తంగా హర్షాతిరేకాలు వ్యక్తమవుతున్నాయి.