టీమ్ఇండియా బ్యాటర్ సూర్యకుమార్ యాదవ్.. అంతర్జాతీయ క్రికెట్ లో ప్రవేశం లేటైందేమో రావడం అయితే వచ్చాడు. వచ్చీ రావడంతోనే రికార్డులను బద్దలు కొట్టేస్తున్నాడు. డివీలియర్స్ తరువాత 360 డిగ్రీల బ్యాటర్ గా గుర్తింపు తెచ్చుకున్నాడు. అనతి కాలంలోనే ఐసీసీ టీ20 ర్యాంకింగ్స్ లో అగ్ర స్థానానికి ఎగబాకాడు. అంతే కాదు ర్యాంకింగ్ లో రెండో స్థానంలో బ్యాటర్ తొలి స్థానం గురించి ఊహించడానికే అవకాశం లేనంత అంతరం ఉంచుకున్నాడు.

ఔను ఐసీసీ తాజాగా వెలువరించిన టి.20 ర్యాంకింగ్స్ లో సూర్యకుమార్ యాదవ్ 890 రేటింగ్ పాయింట్లతో అగ్రస్థానంలో ఉంటే.. రెండో స్థానంలో ఉన్న పాకిస్థాన్ బ్యాటర్ మహ్మద్ రిజ్వాన్ రేటింగ్ పాయింట్స్ 836. అంటే ఇద్దరి మధ్య ఉన్న తేడా 54 రేటింగ్ పాయింట్స్ మూడో స్థానంలో కివీస్ బ్యాటర్ డేవన్ కాన్వే 788 పాయింట్లు, నాలుగో స్థానంలో బాబర్ అజాం 778 పాయింట్లు ఉన్నారు. ఇక కింగ్ కోహ్లీ న్యూజిలాండ్ లో సిరీస్ కు దూరం అవ్వడంతో రెండు స్థానాలు దిగజారి 13వ స్థానంలో కొనసాగుతున్నాడు.

ఇక టీ20 బౌలింగ్ విభాగంలో ఒక్క భార‌త బౌల‌ర్ కూడా టాప్‌-10లో చోటు ద‌క్కించుకోలేక‌పోయాడు. సీనియ‌ర్ బౌల‌ర్ భువ‌నేశ్వ‌ర్ కుమార్ 11 స్థానంలో నిలువ‌గా న్యూజిలాండ్‌తో సిరీస్‌లో రాణించిన అర్ష‌దీప్ సింగ్ ఒక స్థానం ఎగ‌బాకి 21వ స్థానం, చాహ‌ల్ 40వ స్థానంలో కొన‌సాగుతున్నారు. 704 పాయింట్ల‌తో లంక స్పిన్న‌ర్ హస‌రంగా అగ్ర‌స్థానాన్ని కైవ‌సం చేసుకోగా అఫ్గాన్ స్పిన‌ర్ ర‌షీద్ ఖాన్‌, ఇంగ్లాండ్ స్పిన్న‌ర్ ఆదిల్ ర‌షీద్ లు వ‌రుస‌గా రెండు, మూడు స్థానాల్లో కొన‌సాగుతున్నారు.