సద్ధుల బతుకమ్మ వేడుకలను పురస్కరించుకుని హైదరాబాద్‌ నగరంలో ట్రాఫిక్‌ ఆంక్షలు విధించనున్నారు. అక్టోబర్‌ 18న ఆదివారం అమరవీరుల స్మారక స్థూపం నుంచి అప్పర్‌ ట్యాంక్‌బండ్‌పై ఉన్న బతుకమ్మ ఘాట్‌ (రోటరీ చిల్డ్రన్స్‌ పార్క్‌) వరకు ఉత్సవాలు నిర్వహించనున్నారు. ఈ నేపథ్యంలో మధ్యాహ్నం 2 గంటల నుంచి రాత్రి 11 గంటల వరకు అప్పర్‌ ట్యాంక్‌బండ్‌, నెక్లెస్‌ రోడ్‌ పరిసరాల్లో వాహనాల రద్దీ పెరిగే అవకాశం ఉందని ట్రాఫిక్‌ పోలీసులు వెల్లడించారు. పరిస్థితులకు అనుగుణంగా పలు జంక్షన్ల వద్ద సాధారణ వాహనాలను నిలిపివేయడం తోపాటు ప్రత్యామ్నాయ మార్గాల్లోకి మళ్లించనున్నారు.

పలు జంక్షన్ల వద్ద మళ్లింపులు.!

తెలుగు తల్లి జంక్షన్‌, కర్బాలా మైదాన్‌ నుంచి ట్యాంక్‌బండ్‌ వైపు సాధారణ వాహనాలకు అనుమతి ఉండదు. ఇక్బాల్‌ మినార్‌ నుంచి అప్పర్‌ ట్యాంక్‌బండ్‌ వైపు వెళ్లే వాహనాలను తెలుగు తల్లి ఫ్లైఓవర్‌, కట్టమైసమ్మ, డీబీఆర్‌ మిల్స్‌, ఇందిరా పార్క్‌, గాంధీనగర్‌, ఆర్టీసీ ఎక్స్‌ రోడ్స్‌ మీదుగా మళ్లిస్తారు.ఖైరతాబాద్‌ వి.వి. విగ్రహం నుంచి ఎన్టీఆర్‌ మార్గ్‌ వైపు వెళ్లే వాహనాలను నెక్లెస్‌ రోటరీ వద్ద ప్రసాద్స్‌ ఐమాక్స్‌, మింట్‌ కాంపౌండ్‌ మార్గాల వైపు పంపిస్తారు. నల్లగుట్ట జంక్షన్‌ నుంచి బుద్ధ భవన్‌ వైపు వాహనాలను అనుమతించకుండా రాణిగంజ్‌, నెక్లెస్‌ రోడ్‌ వైపు మళ్లిస్తారు.

లిబర్టీ నుంచి అప్పర్‌ ట్యాంక్‌బండ్‌ వైపు వెళ్లే వాహనాలను అంబేడ్కర్‌ విగ్రహం వద్ద ఇక్బాల్‌ మినార్‌ వైపు మళ్లించి, యూటర్న్‌ ద్వారా తెలుగు తల్లి జంక్షన్‌ మీదుగా ఫ్లైఓవర్‌పైకి పంపిస్తారు. సికింద్రాబాద్‌ నుంచి వచ్చే వాహనాలు కర్బాలా మైదాన్‌ వద్ద బైబిల్‌ హౌస్‌, జబ్బార్‌ కాంప్లెక్స్‌, కవాడిగూడ, గాంధీనగర్‌ టీ జంక్షన్‌, గోశాల, ధోబీఘాట్‌, స్విమ్మింగ్‌ పూల్‌, బండమైసమ్మ, ఇందిరా పార్క్‌, కట్టమైసమ్మ మీదుగా వెళ్లాల్సి ఉంటుంది.ముషీరాబాద్‌, కవాడిగూడ నుంచి చిల్డ్రన్స్‌ పార్క్‌, అప్పర్‌ ట్యాంక్‌బండ్‌ వైపు వాహనాలకు అనుమతి ఉండదు. ఈ వాహనాలను డీబీఆర్‌ మిల్స్‌, ఎంఆర్‌వో కార్యాలయం, ధోబీఘాట్‌, స్విమ్మింగ్‌ పూల్‌, బండమైసమ్మ, ఇందిరా పార్క్‌, కట్టమైసమ్మ వైపు మళ్లిస్తారు.

ఆర్టీసీ బస్సులకు ప్రత్యేక మార్గాలు.!

ట్రాఫిక్‌ ఆంక్షల నేపథ్యంలో ఆర్టీసీ బస్సుల రాకపోకల్లోనూ మార్పులు చేశారు. సికింద్రాబాద్‌ నుంచి ఎంజీబీఎస్‌ వైపు వెళ్లే అంతర్‌జిల్లా బస్సులను స్వీకార్‌-ఉపకార్‌ జంక్షన్‌ వద్ద నుంచి వైడబ్ల్యూసీఏ, సంగీత్‌, మెట్టుగూడ, తార్నాక, నల్లకుంట, ఫీవర్‌ హాస్పిటల్‌ ఎక్స్‌ రోడ్‌, బర్కత్‌పురా, టూరిస్ట్‌ హోటల్‌, నింబోలిఅడ్డా, చాదర్‌ఘాట్‌, రంగమహల్‌ మీదుగా మళ్లిస్తారు. నగర సిటీ బస్సులను కూడా కర్బాలా మైదాన్‌ నుంచి బైబిల్‌ హౌస్‌, జబ్బార్‌ కాంప్లెక్స్‌, కవాడిగూడ, గాంధీనగర్‌ టీ జంక్షన్‌, ఇందిరా పార్క్‌, కట్టమైసమ్మ మీదుగా తెలుగు తల్లి ఫ్లైఓవర్‌ వైపు పంపిస్తారు. ఈ మార్పులు మధ్యాహ్నం 2 నుంచి రాత్రి 11 గంటల వరకు అమల్లో ఉంటాయి.
ఈ ప్రాంతాల్లో రద్దీకి అవకాశం

వి.వి. విగ్రహం (ఖైరతాబాద్‌), పాత సైఫాబాద్‌ పోలీస్‌ స్టేషన్‌ పరిసరాలు, ఇక్బాల్‌ మినార్‌, తెలుగు తల్లి జంక్షన్‌, నెక్లెస్‌ రోటరీ, లిబర్టీ, రవీంద్రభారతి, అంబేడ్కర్‌ విగ్రహం, ట్యాంక్‌బండ్‌, కవాడిగూడ ఎక్స్‌ రోడ్స్‌, కట్టమైసమ్మ, కర్బాలా మైదాన్‌, రాణిగంజ్‌, నల్లగుట్ట ప్రాంతాల్లో భారీగా ట్రాఫిక్‌ రద్దీ ఏర్పడే అవకాశం ఉంది. వాహనదారులు ఈ మార్గాలకు దూరంగా ఉండి ప్రత్యామ్నాయ రహదారులను ఎంచుకోవాలని పోలీసులు సూచించారు.

వేడుకలకు వచ్చే వారికి పార్కింగ్‌ ఏర్పాట్లు.!

బతుకమ్మ వేడుకలకు హాజరయ్యే భక్తులు, ప్రజల కోసం స్నో వరల్డ్‌, ఎన్టీఆర్‌ స్టేడియం, అమరవీరుల స్మారక స్థూపం, ఎన్టీఆర్‌ ఘాట్‌, ఎన్టీఆర్‌ గార్డెన్స్‌, హెచ్‌ఎండీఏ గ్రౌండ్‌, లుంబినీ పార్క్‌ ముందు భాగం, బీఆర్‌కే భవన్‌ రోడ్డులో పార్కింగ్‌ సదుపాయాలు కల్పించారు. సందర్శకులు తమ వాహనాలను కేటాయించిన ప్రదేశాల్లోనే నిలిపి, ట్రాఫిక్‌ సిబ్బందికి సహకరించాలని అధికారులు కోరారు. ఉత్సవాలు ముగిసిన వెంటనే ట్రాఫిక్‌ ఆంక్షలను తొలగించి రహదారులపై సాధారణ రాకపోకలను పునరుద్ధరిస్తామని పోలీసులు తెలిపారు. తాజా ట్రాఫిక్‌ సమాచారం కోసం హైదరాబాద్‌ ట్రాఫిక్‌ పోలీసుల ఫేస్‌బుక్‌ పేజీ @HYDTP, ఎక్స్‌ ఖాతా @HYDTPను అనుసరించాలని సూచించారు. అత్యవసర సహాయం కోసం 9010203626 నంబర్‌ను సంప్రదించవచ్చని ట్రాఫిక్‌ జాయింట్‌ కమిషనర్‌ డి. జోయల్‌ డేవిస్‌ వెల్లడించారు.

[ Saddula Bathukamma, Bathukamma Festival 2026, Hyderabad Traffic Restrictions, Hyderabad Traffic Diversions, Bathukamma Celebrations, Hyderabad Traffic Alert, Hyderabad Traffic Police, Traffic Advisory Hyderabad, Saddula Bathukamma Traffic Updates, Hyderabad Road Closures, Alternative Routes Hyderabad, Telangana Festivals ]