సామాన్యులకు తక్కువధరకే నిత్యావసర వస్తువులు అందించేందుకు ఏర్పాటుచేయ తలపెట్టిన రేషన్ సూపర్ బజార్ల పథకం అటకెక్కినట్లు తెలిసింది. ఈ పథకం కింద ప్రతి గ్రామం, పట్టణం, నగరాల్లో ఎంపిక చేసిన రేషన్ షాపులను చిన్న చిన్న సూపర్ బజార్లుగా మారుస్తారు. ఇక్కడ నిత్యావసర వస్తువులు తక్కువ రేటుకే విక్రయిస్తారు. తెల్లరేషన్ కార్డుతో పాటు గులాబీరేషన్ కార్డు ఉన్నవారికి కూడా ఇక్కడ అన్ని వస్తువులు లభ్యమవుతాయి. సామాన్యులకు ఎంతగానో ఈ సూపర్ బజార్లు ఉపయోగపడతాయని అనుకుంటున్న తరుణంలో ప్రభుత్వం ఈ పథకాన్ని బుట్టదాఖలా చేసినట్లు తెలిసింది. వ్యాపార వర్గాలనుంచి ఒత్తిడి మేరకే ప్రభుత్వం ఈ వినూత్న పథకాన్ని అటకెక్కించినట్లు ఆరోపణలు వస్తున్నాయి.