ప్రధానమంత్రి నరేంద్ర మోదీపై కాంగ్రెస్ అధ్యక్షుడు రాహుల్ గాంధీ మరోసారి విమర్శలు గుప్పించారు. ప్రధాని మోదీ ఓ ‘పిరికిపంద’ అనీ.. దమ్ముంటే జాతీయ భద్రత, రాఫెల్ ఒప్పందం, ఆర్ధిక వ్యవస్థ తదితర అంశాలపై తనతో చర్చకు రావాలంటూ ఆయన సవాల్ విసిరారు. ఇవాళ ఢిల్లీలో కాంగ్రెస్ మైనారిటీ విభాగం నిర్వహించిన ఓ సమావేశంలో రాహుల్ పాల్గొని ప్రసంగించారు.

'దేశ భద్రత విషయంలో నాతో చర్చించేందుకు ప్రధాని మోదీని కనీసం 10 నిమిషాలు ఓ వేదికపై ఉంచండి. ఆయన అక్కడ ఉండలేక పారిపోతారు. డోక్లాంలోకి చైనా తమ ఆర్మీని పంపింది. కానీ, మోదీ చైనా ముందు చేతులు కట్టుకుని నిల్చున్నారు' అని విమర్శించారు. ‘ఐదేళ్ల పాటు పోరాడిన తర్వాత మోదీ సంగతేంటో నాకు అర్థమైంది. ఆయనో పిరికిపంద. ఎవరైనా ఆయన ఎదురుగా వచ్చి నిలబడితే.. ఆయన పారిపోతారు’ అని ఆయన వ్యాఖ్యానించారు. మోదీ ముఖంలో భయం స్పష్టంగా కనిపిస్తుందనీ.. దేశంలోని ప్రజలను విభజిస్తూ పరిపాలన సాగించలేనన్న సంగతి ఆయనకు బాగా అర్థమైందన్నారు. మోదీ ప్రజల్లో ఆదరణ కోల్పోయారు అని రాహుల్ పేర్కొన్నారు.

దేశంలోని వ్యవస్థలు ఏదో ఒక పార్టీకి చెందినవి కాదు.. అవి దేశానికి చెందినవి. వాటిని రక్షించడం మన బాధ్యత.. కాంగ్రెస్‌తో సహా అన్ని పార్టీల బాధ్యత ఇది అన్నారు. న్యాయ వ్యవస్థ మొదలు ఎన్నికల సంఘం వరకు దేశంలోని అన్ని వ్యవస్థలను తన చెప్పుచేతల్లో పెట్టుకునేందుకు బీజేపీ, ఆర్ఎస్ఎస్ ప్రయత్నిస్తున్నాయని ఆరోపించారు. రానున్న లోక్‌సభ ఎన్నికల్లో బీజేపీ, ఆర్‌ఎస్‌ఎస్‌ను కాంగ్రెస్‌ పార్టీ ఓడిస్తుంది అన్నారు. దేశం కన్నా తామే గొప్ప అని బీజేపీ భావిస్తోంది. తమ కంటే దేశమే గొప్ప అని మరో మూడు నెలల్లో వారికి తెలుస్తుంది’ అని వ్యాఖ్యానించారు.