తెలంగాణ రాజకీయాల్లో   ప్రముఖ విద్యా సంస్థల అధినేత, మాజీ మంత్రి చామకూర మల్లారెడ్డి కోడలు, మల్లారెడ్డి హాస్పిటల్స్ అండ్ ఇన్‌స్టిట్యూషన్స్   బాధ్యురాలు డాక్టర్ ప్రీతిరెడ్డి   వ్యాఖ్యలు హాట్ టాపిక్ గా మారాయి. సుచిత్ర నుంచి కొంపల్లి వరకు ఉన్న ప్రధాన రహదారిలోని ఫ్లైఓవర్ పిల్లర్లు సహా  పలు ప్రాంతాల్లో డాక్టర్ ప్రీతిరెడ్డి జన్మదిన వేడుకల సందర్భంగా ఏర్పాటు చేసిన  పోస్టర్లు, ఫ్లెక్సీలను   గుర్తుతెలియని వ్యక్తులు చించివేయడం,   ఫొటోలకు నలుపు రంగు పూయడం తీవ్ర కలకలం రేపిన సంగతి తెలిసిందే. తన ఫ్లెక్సీలు, పోస్టర్లు చించివేయడం, నల్లరంగు పూయడంపై   ప్రీతిరెడ్డి ప్రత్యర్థులకు గట్టి కౌంటర్ ఇస్తూ చేసిన కామెంట్లు వైరల్ గా మారాయి. 

 తన జన్మదిన వేడుక అన్నది  ఏ  రాజకీయ పార్టీకి సంబంధించిన కార్యక్రమం కాదని క్లారిటీ ఇచ్చిన ప్రీతీరెడ్డి...  ఆ పోస్టర్లు, ఫ్లెక్సీలు కేవలం తన శ్రేయోభిలాషులు, అభిమానులు, కాలేజీ సిబ్బంది,   ఆసుపత్రి స్టాఫ్ తమ అభిమానంతో స్వచ్ఛందంగా ఏర్పాటు చేసినవన్నారు.  పుట్టినరోజు వేడుకలను కూడా రాజకీయం చేస్తూ తమ ఫ్లెక్సీలను చింపేయడం, వికృత చేష్టలకు పాల్పడడం వారి సంకుచిత మనస్తత్వానికి నిదర్శనమని మండిపడ్డారు.

ఎవరెన్ని కుట్రలు చేసినా, ఎంతలా అణగదొక్కాలని చూసినా తన ఆత్మస్థైర్యాన్ని దెబ్బతీయలేరని ప్రీతిరెడ్డి స్పష్టం చేశారు.   ఫ్లెక్సీలు చింపేయగలరు, కానీ తన మనోబలాన్ని మాత్రం  తన నుంచి దూరం చేయలేరన్నారు.  కేవలం ప్రచారం కోసమో,  రాజకీయ లబ్ధి కోసం కాకుండా, ప్రజాక్షేత్రంలో తమ కుటుంబం చేస్తున్న సేవా కార్యక్రమాలు, విద్యా రంగంలో సాధిస్తున్న అభివృద్ధిని చూసి ఓర్వలేకే కొందరు ఇటువంటి దుశ్చర్యలకు పాల్పడుతున్నారని   విమర్శలు గుప్పించారు.   

[Preethi Reddy, Malla Reddy daughter in law, Preethi Reddy flexis issue, Kompally, Suchitra, Telangana Nwes, Telugu One]