భారత రాజకీయాల్లో అత్యంత శక్తిమంతమైన, విప్లవాత్మకమైన మహిళా నాయకురాలిగా పేరుగాంచిన మమతా బెనర్జీకి స్వరాష్ట్రంలో ఊహించని షాక్ తగిలింది. పశ్చిమ బెంగాల్ వేదికగా ఇటీవల జరిగిన అసెంబ్లీ ఎన్నికల్లో ఆమె నేతృత్వంలోని తృణమూల్ కాంగ్రెస్  ఘోర పరాజయాన్ని చవిచూసింది. సొంత గడ్డపై జరిగిన ఈ  పోరులో దీదీ స్వయంగా ఓడిపోవడమే కాకుండా.. ప్రస్తుతం ఆమె పార్టీ మనుగడే ప్రశ్నార్థకంగా మారే పరిస్థితులు కనిపిస్తున్నాయి. ఎన్నికల ఫలితాల అనంతరం బెంగాల్ వ్యాప్తంగా రాజకీయ సమీకరణాలు వేగంగా మారిపోతున్నాయి. ఒకప్పుడు బెంగాల్‌లో  ఏకఛత్రాధిపత్యంగా ఏలిన టీఎంసీకి ఇప్పుడు ప్రతికూల గాలి వీస్తోంది. బీజేపీ అక్కడ పట్టు సాధించి అధికారంలోకి రావడంతో తృణమూల్ కాంగ్రెస్ శ్రేణుల్లో తీవ్ర ఆందోళన వ్యక్తమవుతోంది. రాష్ట్రంలో బీజేపీ తన మార్క్ పాలిటిక్స్‌తో ముందుకు సాగుతుండటంతో టీఎంసీ క్యాడర్ రక్షణ కోసం వెతుక్కోవాల్సిన పరిస్థితి ఏర్పడింది.

ఇటీవలి కాలంలో టీఎంసీ అగ్ర నాయకత్వాన్ని టార్గెట్ చేస్తూ జరుగుతున్న దాడులు బెంగాల్ రాజకీయాల్లో ప్రకంపనలు సృష్టిస్తున్నాయి. ముఖ్యంగా మమతా బెనర్జీ మేనల్లుడు, టీఎంసీలో అత్యంత కీలక  యువనేత అభిషేక్ బెనర్జీపై జరిగిన భౌతిక దాడి పార్టీ మద్దతుదారులను పూర్తిగా కోలుకోలేని దెబ్బ తీసింది.  టీఎంసీ  హయాంలో తెర వెనుక ఉండి మొత్తం పరిపాలనను నడిపించారనే ముద్ర ఉన్న అభిషేక్ బెనర్జీపై ఇంత బహిరంగంగా దాడి జరగడం బెంగాల్‌లో మారిన అధికార మార్పిడికి, తారుమారైన బలాబలాలకు నిదర్శనంగా నిలుస్తోంది. బీజేపీ అక్కడ ఎంత పటిష్టంగా వేళ్లూనుకుందో చెప్పడానికి ఈ ఘటన ఒక ఉదాహరణగా మారింది. ఈ పరిణామాలతో టీఎంసీ మనుగడకే పెను ముప్పు పొంచి ఉందనే సంకేతాలు స్పష్టంగా కనిపిస్తున్నాయి. ఒకప్పుడు ప్రత్యర్థులను భయపెట్టిన నాయకులే ఇప్పుడు వీధుల్లో దాడులకు గురవుతుండటం బెంగాల్ రాజకీయ ముఖచిత్రాన్ని మార్చేసింది.

ఈ ఘోర పరాభవం నుంచి కోలుకోకముందే..  తాజాగా మరో సీనియర్ టీఎంసీ ఎంపీ కల్యాణ్ బెనర్జీపై భౌతిక దాడి జరగడం బెంగాల్‌లో శాంతిభద్రతల పరిస్థితిని, తీవ్రమైన రాజకీయ కక్షసాధింపులను సూచిస్తోంది. హుగ్లీ జిల్లాలోని చండీతలా పోలీస్ స్టేషన్ సమీపంలో ఈ ఘటన చోటుచేసుకుంది. ఎన్నికల అనంతర హింసపై పోలీసులకు వినతిపత్రం సమర్పించడానికి వెళ్లిన కల్యాణ్ బెనర్జీపై  కొందరు గుర్తుతెలియని వ్యక్తులు దాడి చేశారు. దెబ్బల తీవ్రతకు ఆయన ఒక్కసారిగా రోడ్డుపైనే కుప్పకూలిపోయారు. దీనికి సంబంధించిన వీడియో సామాజిక మాధ్యమాల్లో వైరల్‌గా మారి సంచలనం సృష్టిస్తోంది. అతి తక్కువ కాలంలోనే టీఎంసీకి చెందిన ఇద్దరు టాప్ లీడర్లపై ఇలాంటి దాడులు జరగడం చూస్తుంటే..  పశ్చిమ బెంగాల్‌లో అధికారంలోకి వచ్చిన కమలం పార్టీ ఒక పక్కా వ్యూహంతో ముందుకు వెళ్తోందనే చర్చ నడుస్తోంది. దీనినే రాజకీయ విశ్లేషకులు 'మిషన్ బీజేపీ'గా అభివర్ణిస్తున్నారు.

గతంలో తృణమూల్ కాంగ్రెస్ అధికారంలో ఉన్న సమయంలో విపక్షాలపై, ముఖ్యంగా బీజేపీ నేతలపై విస్తృతంగా దాడులు జరిగాయనే ఆరోపణలు గట్టిగా ఉండేవి. నాటి హింసాత్మక రాజకీయాలు, భౌతిక దాడుల సంస్కృతిని వ్యతిరేకిస్తూనే బీజేపీ అక్కడ సుదీర్ఘ పోరాటం చేసింది. ఇప్పుడు బెంగాల్‌లో బీజేపీ ప్రభుత్వం కొలువుదీరడంతో..  ఆ వ్యూహం ఇప్పుడు టీఎంసీ వైపు తిరిగినట్లు కనిపిస్తోంది. గతంలో తాము చేసిన తప్పులకు ఇప్పుడు తృణమూల్ కాంగ్రెస్ అగ్రనాయకత్వం మూల్యం చెల్లించుకోక తప్పని పరిస్థితి ఏర్పడింది. అధికారంలో ఉన్నప్పుడు చూపించిన అహంకారం, ఇప్పుడు ప్రతిపక్షంలోకి రాగానే బలహీనతగా మారి వేధిస్తోంది. ప్రతి స్థాయిలోనూ టీఎంసీ క్యాడర్ తీవ్రమైన ఒత్తిడిని ఎదుర్కొంటోంది. మమతా బెనర్జీ లాంటి అజేయమైన నాయకురాలికి ఇది రాజకీయంగా అత్యంత క్లిష్ట సమయమని చెప్పవచ్చు. ఈ రాజకీయ సంక్షోభం నుండి ఆమె పార్టీని ఎలా గట్టెక్కిస్తారనేది ఇప్పుడు మిలియన్ డాలర్ల ప్రశ్న.