కొన్ని దేశాల్లో అమలులో వున్న కారుణ్య మరణం విధానాన్ని భారతదేశంలో కూడా అమలు చేసే అంశాన్ని సుప్రీంకోర్టు పరిశీలిస్తోంది. తీవ్రమైన అనారోగ్యాన్ని ఎదుర్కొంటున్నవారు ఆ బాధను అనుభవించకుండా ప్రశాంతంగా కన్నుమూసే అవకాశాన్ని కారుణ్య మరణం కల్పిస్తుంది. అయితే కారుణ్య మరణం మీద అనేక విమర్శలు కూడా వున్నాయి. ఒక వ్యక్తి తన అనారోగ్యాన్ని భరించలేక స్వచ్ఛంద మరణాన్ని కోరుకుంటే దానిని అమలు చేయడానికి ప్రత్యేక చట్టాన్ని చేయాల్సి వుంది. దీని మీద స్పందించాలని దేశంలోని రాష్ట్రాలు, కేంద్రపాలిత ప్రాంతాలకు బుధవారం సుప్రీంకోర్టు నోటీసులు జారీ చేసింది. చీఫ్ జస్టిస్ ఆర్‌ఎం లోధా నేతృత్వంలోని ఐదుగురు సభ్యుల రాజ్యాంగ ధర్మాసనం ఈ అంశాన్ని పరిశీలిస్తోంది. కారుణ్య మరణాన్ని చట్టబద్ధం చేయాలని, మరణించే హక్కును ప్రాథమిక హక్కుల్లో చేర్చాలని కోరుతూ ‘కామన్ కాజ్’ ఎన్జీఓ వేసిన వ్యాజ్యంపై విచారణ సందర్భంగా సుప్రీం కోర్టు స్పందించింది.