తెలంగాణలో ఇప్పుడు జడ్పీటీసీ, ఎంపీటీసీ ఎన్నికలకు రంగం సిద్ధమౌతోంది. పంచాయతీ ఎన్నికలలో స్పష్టమైన ఆధిక్యత సాధించిన అధికార కాంగ్రెస్ పార్టీ  ఆ ఉత్సాహంతో మునిసిపోల్స్ కు వెళ్లింది. బుధవారం (ఫిబ్రవరి 11)  రాష్ట్రంలో 16 మునిసిపాలిటీలు, ఏడు కార్పొరేషన్లకు ఎన్నికలు జరిగాయి. ఎగ్జిట్స్ పోల్సన్నీ కాంగ్రెస్ కు అనుకూలంగా వచ్చాయి. ఈ నేపథ్యంలో ఇంకెంత మాత్రం జాగు లేకుండా పరిషత్ ఎన్నికలకు రెడీ అయిపోతున్నది. విశ్వసనీయ సమాచారం ప్రకారం రాష్ట్రంలో పరిషత్ ఎన్నికలు మార్చిలో నిర్వహించే అవకాశాలు మెండుగా ఉన్నాయని తెలుస్తోంది.

విజయోత్సాహం ఒక వైపు.. ప్రస్తుత ఆర్థిక సంవత్సరంలోగా రాష్ట్రంలో పరిషత్ ఎన్నికలు నిర్వహిం చకుంటే   జిల్లా, మండల పరిషత్‌లకు కేంద్రం నుంచి రావాల్సిన దాదాపు 450 కోట్ల రూపాయల నిధులు మురిగిపోతాయన్న భయం మరోవైపు ఉండటంతో జిల్లా, మండల పరిషత్ ఎన్నికలను వీలైనంత త్వరగా నిర్వహించాలని ప్రభుత్వం భావిస్తున్నట్లు తెలుస్తోంది. అన్నీ అనుకున్నట్లు జరిగితే తెలంగాణలో జిల్లా, మండల పరిషత్ ఎన్నికలు వచ్చే నెల తొలి వారంలో జరిగే అవకాశం ఉందంటున్నారు. రాష్ట్రంలో జిల్లా, మండల పరిషత్ ఎన్నికలు రెండు విడతలలో జరుగుతాయని తెలుస్తోంది.