ఏపీ సీఎం జగన్ ప్రతిష్టాత్మకంగా ప్రారంభించిన స్పందన కార్యక్రమం లో  మాట్లాడుతూ అధికారులు అప్రమత్తంగా ఉండి సమస్యలను పరిష్కరించాలని సూచించటం జరిగింది. ఫిర్యాదుల విషయంలో అలసత్వం ప్రదర్శిస్తే సహించేది లేదని కూడా అయన చాలా సార్లు హెచ్చరించారు. అయితే తాజాగా ఒక అధికారి విధి నిర్వహణ లో ఉదాసీనంగా వ్యవహరించినందుకు అతని పై వేటు పడింది. జూన్ నెలలో విజయవాడలో నిర్వహించిన స్పందన కార్యక్రమంలో రేషన్ షాప్ ను డీలర్ కాకుండా బినామీ నిర్వహిస్తున్నాడని దానిపై చర్యలు తీసుకోవాలని పౌరసరఫరాల శాఖ అధికారి ఉదయ భాస్కర్‌ కు ఒక ఫిర్యాదు అందింది. అయితే ఆ ఫిర్యాదుపై ఉదయ భాస్కర్ ఎటువంటి చర్య తీసుకోకుండా ఉదాసీనంగా వ్యవహరించారు. తాజాగా ఈ విషయం ముఖ్యమంత్రి దృష్టికి వెళ్లింది. ఈరోజు ఉదయం స్పందన కార్యక్రమంపై సీఎం జగన్ నిర్వహించిన వీడియో కాన్ఫరెన్స్ లో ఈ విషయం ముఖ్యమంత్రి దృష్టికి వెళ్లింది. దీంతో వైయస్ జగన్ ఆ అధికారిపై ఆగ్రహం వ్యక్తం చేశారు. విధి నిర్వహణ లో ఉదాసీనంగా వ్యవహరించిన ఉదయభాస్కర్ ను సస్పెండ్ చేస్తూ కృష్ణా జిల్లా జాయింట్ కలెక్టర్ మాధవీలత ఉత్తర్వులు జారీ చేశారు.