భీమవరం ఎమ్మెల్యే గ్రంధీ శ్రీనివాస్.. తీవ్ర అసంతృప్తితో రగిలిపోతున్నారా? అంటే అవుననే అంటున్నారు ఆయన వర్గం. గత ఎన్నికల్లో జనసేన పార్టీ అధ్యక్షుడు పవన్ కల్యాణ్‌పై ఆయన ఘన విజయం సాధించి  అందరి దృష్టిని ఆకర్షించారు. అయితే ఈ భీమవరం ఎమ్మెల్యే గారికి ప్రస్తుతం ప్యాన్ పార్టీలో కష్ట కాలం నడుస్తోందనే ఓ టాక్   నియోజకవర్గంలోనే   హల్‌చల్ చేస్తోంది. ఈ భీమవరం ఎమ్మెల్యే గారికి తాడేపల్లి ఫ్యాలెస్‌లో సీఎం వైయస్ జగన్ అపాయింట్‌మెంటే దొరకడమే లేదంట.

ఆ క్రమంలో సీఎం అపాయింట్‌మెంట్ కోసం రీజినల్ పార్టీ కో ఆర్డినేటర్, రాజంపేట ఎంపీ పి. మిథున్ రెడ్డి చుట్టు ఆయన ఎన్ని ప్రదక్షణాలు చేసినా.. చేస్తున్నా ఫలితం మాత్రం కనిపించడం లేదట. దీంతో ఈ భీమవరం బుల్లోడి పరిస్థితి అంత అగమ్య గోచరంగా తయారైందని సమాచారం. దాంతో ఆయన గారి వర్గం ఇప్పటికే తీవ్ర నిరాశలోకి జారిపోయిందట.  

అయితే 2019 ఎన్నికల్లో పవన్ కల్యాణ్‌పై గ్రంథీ శ్రీనివాస్ గెలిచినప్పుడు... ఫ్యాన్ పార్టీ అగ్రనేతలంతా ఆయనకు గట్టి వెయిటేజి ఇచ్చారట. ఒకానొక దశలో జగన్  తొలి కేబినెట్‌లో ఈ భీమవరం ఎమ్మెల్యేకు బర్త్ కూడా గ్యారెంటీ అనే టాక్ కూడా   నడిచిందట. కానీ అది ఎందుకో జరగలేదు. 

కానీ జగన్ అధికారంలోకి వచ్చిన తొలినాళ్లలో ఈ గ్రంధీ శ్రీనివాస్‌తో ప్రెస్‌మీట్ పెట్టించి మరీ పవన్ కల్యాణ్‌పై విమర్శనాస్త్రాలు చేయించే వారనే ఓ టాక్ కూడా గట్టిగానే నడించింది. ఆ తర్వత గ్రంధీ శ్రీనివాస్‌ను పార్టీ నేతలు పక్కన పెట్టి.. ఆయన స్థానంలో మాజీ మంత్రులు కొడాలి నాని, పేర్ని నాని, కన్నబాబు, వెల్లంపల్లి తదితరులతో ప్రెస్ మీట్లు పెట్టించి చంద్రబాబు, లోకేశ్, పవన్ కళ్యాణ్‌పై విమర్శలు చేయించడం మొదలు పెట్టారు.  అందుకు కారణం వారిలో భీమవరం ఎమ్మెల్యేకు వాగ్ధాటి లేకపోవడమే కారణమని అప్పట్లో ఓ రేంజ్ లో చర్చ జరిగింది. సరే అదంతా పక్కన పెట్టినా పవన్ కల్యాణ్ పై విజయం సాధించినా తొలి, మలి కేబినెట్ లలో కూడా జగన్ గ్రంథికి స్థానం కల్పించడకోవడంతో గ్రంథిలో, ఆయన వర్గీయులలో అసంతృప్తి జ్వాలలు భగ్గుమంటున్నాయని నియోజకవర్గంలో బాగా ప్రచారంలో ఉంది. అయితే జెయింట్ కిల్లర్స్ ను జగన్ పట్టించుకోరని పార్టీలో ఓ టాక్ జోరుగా నడుస్తోంది. ఇందుకు ఉదాహరణగా గాజువాకలో పవన్ కల్యాణ్ పై విజయం సాధించిన తిప్పల నాగిరెడ్డి, మంగళగిరిలో తెలుగుదేశం జాతీయ ప్రధాన కార్యదర్శి, నారా చంద్రబాబునాయుడి కుమారుడు లోకేష్ పై విజయం సాధించిన ఆళ్ల రామకృష్ణారెడ్డిలకు సైతం జగన్ తన కేబినెట్ లో స్థానం కల్పించకపోవడాన్ని వారు ఉదాహరణగా చూపుతున్నారు. అయితే దీనిపై పార్టీలోనే ఒకింత అసంతృప్తి వ్యక్తం అవుతోంది.  జెయింట్ కిల్లర్స్ కు కేబినెట్ లో స్థానం కల్పించి ఉంటే జనంలోకి ఒక పాజిటివ్ సందేశం వెళ్లి  ఉండేదని పరిశీలకులు అంటున్నారు. ఆ అవకాశాన్ని జనం కోల్పోవడమే కాకుండా.. ప్రత్యర్థి పార్టీల్లోని పెద్ద తలకాయలపై విజయం సాధించిన వారికి జగన్ పార్టీలో గుర్తింపు లేకుండా చేస్తారనీ, ప్రత్యర్థి పార్టీలోని ప్రముఖుల ఓటమిని సైతం తన ఖాతాలో వేసుకోవాలన్న ఉద్దేశమే అందుకు కారణమనీ వారు విశ్లేషిస్తున్నారు. 

అదే ఇప్పుడు పార్టీలో పెద్ద ఎత్తున అసంతృప్తి జ్వాలలు, అసమ్మతి సెగలు ఎగిసి పడటానికి కారణమని వారు వివరిస్తున్నారు. మాజీ మంత్రుల మౌనం, ఆశావహుల ధిక్కారం, ఆదేశించినా గడప గడపకూ కదలని నేతల వైనం వైసీపీలో జగన్ మాట గతంలోలా చెల్లుబాటు కావడం లేదనడానికి నిదర్శనాలుగా చెబుతున్నారు.