హైదరాబాద్: రాష్ట్రంలో మినరల్ వాటర్ పేరుతో మంచినీటి వ్యాపారం చేస్తున్న ప్లాంట్ యజమానులు ప్రజల ప్రాణాలతో చెలగాటమాడుతున్నారు. ప్యాకింగ్ చేసి విక్రయించే నీటికి తప్పనిసరిగా ఐఎస్ ఐ  సర్టిఫికెట్ ఉండాలి. కాని ఇటువంటి సర్టిఫికెట్లు లేకుండానే రాష్ట్రవ్యాప్తంగా వందలాది మినరల్ వాటర్ ప్లాంట్లు పుట్టుకొచ్చాయి. ఈ ప్లాంట్లు అపరిశుభ్రమైన నీటిని విక్రయించి ప్రజల ప్రాణాలకు ముప్పుతెస్తున్నాయి. ఇటీవల ఒక మినరల్ వాటర్ ప్లాంట్ సరఫరా చేసిన వాటర్ క్యాన్ లో చచ్చిన  ఎలకపిల్ల కనిపించింది. నిత్యం ఎక్కడో ఒకచోట ఇటువంటి ఫిర్యాదులు వస్తూనే ఉన్నాయి.

రాష్ట్రంలో ఐఎస్ ఐ సర్టిఫికెట్లతో కేవలం 300 ప్లాంట్లు మాత్రమే నడుస్తుండగా ఐఎస్ ఐ సర్టిఫికెట్లు, ఐఎస్ ఓ సర్టిఫికెట్లు లేకుండా 5000 వాటర్ ప్లాంట్లు పనిచేస్తున్నాయి. వేసవిలో వీటి సంఖ్య మరింత పెరిగే ప్రమాదం ఉంది. ఈ అనధికార ప్లాంట్ల మధ్య పోటీ ఏర్పడి కొన్నిచోట్ల 20 లీటర్ల నీటిని మూడు లేదా నాలుగు రూపాయలకు కూడా విక్రయిస్తున్నారు. ఈ నీటివల్ల అనేక ఇబ్బందులు తలెత్తే ప్రమాదం ఉంది. ప్రభుత్వ నిబంధనల ప్రకారం ప్రతి మినరల్ వాటర్ ప్లాంట్ మంచినీరు లభ్యమయ్యే సొంత బోరును తవ్వించుకోవాలి.

ఈ బోరులు తవ్వడానికి ప్రభుత్వ అనుమతి తప్పని సరి. ఈ ప్లాంట్లు తప్పనిసరిగా ఐఎస్ఐ సర్టిఫికెట్లు పొందాలి ప్రతి ప్లాంట్ లో రోజుకు నాలుగుసార్లు నీటిని పరీక్షించడానికి ప్రత్యేక ల్యాబ్ ఉండాలి. నిత్యం పరీక్షించే నీటి వివరాలను రికార్డుల్లో నమోదుచేయాలి. ఐఎస్ఐ గుర్తింపు రావాలంటే ప్లాంట్ల నిర్వాహకులు 35 రకాల సర్టిఫికెట్లు, డాక్యుమెంట్లు సమర్పించాల్సి ఉంటుంది. అయితే ఈ గోలంతా పట్టని చిన్నచిన్న ప్లాంట్ల యజమానులు అవేమీ లేకుండానే శుద్దిచేయని నీటినే బహిరంగంగా విక్రయిన్చేస్తున్నారు. మినరల్ వాటర్ అనే పేరుకు బదులుగా సుద్దిచేసిన త్రాగునీరు అనే పదాన్ని ఉపయోగించి లూజుగా మంచినీళ్ళను విక్రయిస్తూ రాష్ట్రవ్యాప్తంగా కోట్లాది రూపాయలు ఆర్జిస్తున్నారు. మన రాష్ట్రంలో ఉన్నన్ని ప్లాంట్లు దేశంలో ఎక్కడా లేవని ఒక అధికారి వ్యాఖ్యానించడం విశేషం. ఈ ప్లాంట్లు వాడుతున్న ప్లాస్టిక్ క్యాన్లు, ప్యాకెట్లు కూడా ఫుడ్ గ్రేడ్ మెటీరియల్ కాదని, ఇటువంటి మెటీరియల్ ను వాడటం వల్ల రక్తహీనత, నరాలు, శ్వాసకోశ, జీర్ణాశయ సంబంధిత వ్యాధులు రావచ్చని ఆయన హెచ్చరిస్తున్నారు.