రోహిణీ కార్తె వెళ్లిపోయింది. వర్షాలు దండిగా కురవాల్సిన మృగశిర కార్తె కూడా వెళ్లిపోయింది. అయినా చినుకు జాడ లేదు సరికదా.. ఎండలు మండిపోతున్నాయి. జనం ఉక్కపోతతో అల్లాడిపోతున్నారు. ఇక భూములు నెర్రలు వారుతున్నాయి. జూన్ నెల ముగిసిపోయేలా ఉన్నా తొలకరి పలకరించకపోవడంతో అన్నదాతలు ఆందోళన పడుతున్నారు.  ఉష్ణోగ్రతలు రోజురోజుకూ భారీగా పెరుగుతున్నాయి. ఈ   ఎండల దెబ్బకు ప్రజలు ఇళ్ల నుంచి బయటకు రావడానికే భయపడుతున్నారు. ఇలాంటి క్లిష్ట పరిస్థితుల్లో వరుణ దేవుడిని ప్రసన్నం చేసుకుని, మేఘాలు కరుణించేలా చేయడానికి ఆంధ్రప్రదేశ్‌ కోససీమలోని ఓ గ్రామంలో గ్రామస్థులంతా కలిసి వరుణుడిని ప్రసన్నం చేసుకోవడానికి కప్పలకు పెళ్లి చేశారు. 

కోనసీమ జిల్లా కొత్తపేట మండలం వాడపాలెం గ్రామంలో,  వర్షాలు సమృద్ధిగా కురిసి, పాడిపంటలతో తమ ప్రాంతం సుభిక్షంగా ఉండాలని ఆకాంక్షిస్తూ గ్రామస్తులంతా ఏకతాటిపైకి వచ్చారు.  ఎండలు తీవ్రంగా ఉండి వర్షాలు పడనప్పుడు కప్పలకు శాస్త్రోక్తంగా వివాహం జరిపిస్తే వరుణ దేవుడు తప్పకుండా కరుణిస్తాడని ఇక్కడి ప్రజల విశ్వాసం. ఆ నమ్మకంతోనే వాడపాలెం గ్రామంలోని వంతెన సెంటర్ వద్ద  కప్పల పెళ్లి ' కార్యక్రమాన్ని అంగరంగ వైభవంగా నిర్వహించారు. ఈ వేడుకకు సంబంధించిన ప్రతి ఘట్టాన్ని గ్రామ పెద్దలు ఎంతో నియమనిష్టలతో జరిపించారు.

 హిందూ సాంప్రదాయ పద్ధతిలో  వధూవరుల వివాహం ఎలా జరుగుతుందో.. అచ్చం అలాగే..  అలాగే అన్ని ఆచారాలను పాటించారు.   రెండు ఆరోగ్యకరమైన కప్పలను పట్టుకొచ్చి, వాటిని పెళ్లి కొడుకు, పెళ్లి కూతురుగా భావిస్తూ.. . ఆ కప్పల జంటకు పసుపు, కుంకుమలు రాసి, రంగురంగుల పూల మాలలతో ఎంతో అందంగా ముస్తాబు చేశారు. పురోహితులు ముహూర్త బలాన్ని నిర్ణయించి, మంగళ వాయిద్యాల నడుమ శాస్త్రోక్తంగా ఆ కప్పల జంటకు వివాహ వేడుకను పూర్తి చేశారు.

వివాహం ముగిసిన తరువాత.. ఆ  కప్పల జంటను ఒక ప్రత్యేక పల్లకిలో ఉంచి, డప్పులు, బ్యాండ్ మేళం, భాజాభజంత్రీలతో   గ్రామ వీధుల్లో ఊరేగించారు. ఈ ఊరేగింపులో గ్రామ యువకులు ఎంతో ఉత్సాహంగా డప్పు దరువులకు అనుగుణంగా నృత్యాలు చేస్తూ పాల్గొన్నారు. ప్రకృతి మాత కరుణించి, తమ పొలాలకు జీవం పోసేలా త్వరలోనే భారీ వర్షాలు కురవాలని గ్రామస్తులంతా ఈ సందర్భంగా వరుణ దేవుడికి ప్రత్యేక పూజలు నిర్వహించారు. కప్పల పెళ్లి వేడుకను కళ్లారా చూసేందుకు చుట్టుపక్కల గ్రామాల నుంచి వందలాది మంది ప్రజలు    తరలివచ్చారు. సాంప్రదాయాలు, నమ్మకాల కలబోతగా సాగిన ఈ వేడుక ఇప్పుడు సోషల్ మీడియాలోనూ తెగ ట్రెండ్ అవుతోంది.