శుక్రవారం నాడు జమ్ము కాశ్మీర్‌లో 12 గంటల వ్యవధిలోనే తీవ్రవాదులు మూడు ప్రాంతాలలో దాడులు చేశారు. ఈ దాడుల్లో 11 మంది జవాన్లు, ఎనిమిది మంది తీవ్రవాదులు మరణించారు. ఈ సందర్భంగా భారత జవాన్లు అప్రమత్తమై తీవ్రవాదులను తిప్పికొట్టారు. కాశ్మీర్‌లోని యురి సెక్టార్‌లో శుక్రవారం ఉదయం ఒక సైనిక శిబిరం మీద తీవ్రవాదులు ఆత్మాహుతి దాడి చేశారు. ఈ దాడిలో ఏడుగురు ఆర్మీ జవాన్లు, ఓ అధికారితో సహా మరో ముగ్గురు పోలీసు అధికారులు మరణించారు. ఈ ఘటనతో అప్రమత్తమైన జవాన్లు ఆరుగురు తీవ్రవాదులను మట్టుబెట్టారు. శ్రీనగర్‌లోని సౌరా ప్రాంతంలో జరిగిన మరో ఘటనలో లష్కరే తోయిబాకి చెందిన ఇద్దరు ఉగ్రవాదులు హతమయ్యారు. కారులో వచ్చిన ఉగ్రవాదులు కారును ఆపకుండా వెళ్తుండటంతో జవాన్లు కాల్పులు జరిపారు. దాంతో కారులో ఉన్న ఇద్దరు ఉగ్రవాదులూ మరణించారు. అలాగే పోపియాన్ ప్రాంతంలో ఉన్న ఓ పోలీస్ స్టేషన్ మీద ఉగ్రవాదులు దాడి చేశారు. ఈ దాడిలో ఎవరికీ ప్రమాదం జరగలేదు. జమ్ము కాశ్మీర్ అసెంబ్లీ ఎన్నికలలో  ఇప్పటి వరకు రెండు దశల పోలింగ్ పూర్తయింది. త్వరలో ప్రధాని నరేంద్రమోడీ జమ్ము కాశ్మీర్‌లో ఎన్నికల ప్రచారం చేయబోతున్నారు. ఈ నేపథ్యంలో దాడులు జరిగిన నేపథ్యంలో జమ్ము కాశ్మీర్‌లో భద్రతా ఏర్పాట్లను మరింత కట్టుదిట్టం చేశారు.