పార్లమెంట్ ప్రత్యేక సమావేశాలు ఆగస్టు 16వ తేదీ నుంచి 18వ తేదీ వరకు, మొత్తం 3 రోజుల పాటు పార్లమెంట్‌ను ప్రత్యేకంగా సమావేశపరచాలని కేంద్ర ప్రభుత్వం భావిస్తోంది. ప్రస్తుతం కొనసాగుతున్న పార్లమెంట్ వర్షాకాల సమావేశాలు ఆగస్టు 13వ తేదీతో ముగియనున్నాయి. సాధారణ సమావేశాలు ముగిసిన కేవలం 3 రోజుల్లోనే, మళ్లీ ప్రజాప్రతినిధులు హస్తినలోని చట్టసభల ప్రాంగణంలో అత్య అత్యవసరంగా సమావేశం కావడం విశేషంగా మారింది.

ఈ 3 రోజుల ప్రత్యేక సమావేశాల్లో ప్రధానంగా 2 అత్యంత ప్రాధాన్యత కలిగిన బిల్లులపై లోతైన చర్చలు జరిపి, ఉభయ సభల ఆమోదం పొందాలని కేంద్రం ప్రణాళికలు రచిస్తోంది. ఇందులో మొదటిది దేశ రాజకీయ ముఖచిత్రాన్ని, లోక్‌సభ స్థానాల నిర్మాణాన్ని ప్రతిబింబించే డీలిమిటేషన్ బిల్లు కాగా, రెండోది సుదీర్ఘకాలంగా పెండింగ్‌లో ఉన్న చారిత్రాత్మక మహిళా రిజర్వేషన్ బిల్లు. 

నియోజకవర్గాల పునర్విభజనకు సంబంధించిన డీలిమిటేషన్ ప్రక్రియ భవిష్యత్ ఎన్నికల సరళిపై ప్రభావం చూపనుంది. మరోవైపు చట్టసభల్లో మహిళలకు తగిన ప్రాతినిధ్యం కల్పించాలనే ఉద్దేశంతో ప్రవేశపెడుతున్న మహిళా బిల్లు కూడా అత్యంత కీలకమైంది. ఈ రెండు ప్రధాన బిల్లులను ఒకే వేదికపై ఉభయ సభల ముందుకు తీసుకువచ్చి, దేశ రాజకీయాల్లో సరికొత్త అధ్యాయానికి తెరలేపాలని అధికార పక్షం వ్యూహాత్మకంగా అడుగులు వేస్తోంది.

అయితే ఈ 2 కీలక బిల్లులను పార్లమెంట్‌లో పాస్ చేయించుకోవడం కేంద్ర ప్రభుత్వానికి అంత తేలికైన విషయమేమీ కాదు. ఇవి సాధారణ చట్టాలు కావని, రాజ్యాంగ సవరణతో కూడుకున్న బిల్లులని నిపుణులు స్పష్టం చేస్తున్నారు. భారత రాజ్యాంగ నిబంధనల ప్రకారం రాజ్యాంగ సవరణ బిల్లులు నెరవేరాలంటే లోక్‌సభ  రాజ్యసభ రెండింటిలోనూ ఖచ్చితంగా మూడింట రెండు వంతుల (2/3rd) మెజారిటీ లభించాల్సి ఉంటుంది. 

ప్రస్తుత పార్లమెంటరీ సంఖ్యాబలం దృష్ట్యా, ఈ 2/3 వంతు బలాన్ని అందుకోవడానికి ప్రతిపక్షాల మద్దతు ఎంతో కీలకంగా మారింది. అందువల్లనే, బిల్లుల ఆమోదానికి అవసరమైన మద్దతును సమీకరించుకోవడానికి మోదీ ప్రభుత్వం ఇప్పటికే వివిధ రాజకీయ పక్షాలతో ముమ్మరంగా సంప్రదింపులు ప్రారంభించింది. ఈ రాజకీయ వ్యూహంలో భాగంగానే కేంద్ర పార్లమెంటరీ వ్యవహారాల శాఖ మంత్రి కిరణ్ రిజిజు బుధవారం ఉదయం స్వయంగా లోక్‌సభ ప్రతిపక్ష నేత రాహుల్ గాంధీని పార్లమెంట్ ప్రాంగణంలో కలుసుకున్నారు. 

ఆగస్టు 16 నుంచి 18 వరకు జరగనున్న 3 రోజుల ప్రత్యేక సమావేశాల్లో ప్రవేశపెట్టబోయే డీలిమిటేషన్ బిల్లు  మహిళా రిజర్వేషన్ బిల్లులకు సంబంధించిన వివరాలను ఆయన రాహుల్ గాంధీకి నిశితంగా వివరించారు. దేశ ప్రయోజనాల దృష్ట్యా ఈ బిల్లులకు కాంగ్రెస్ పార్టీ పూర్తి స్థాయి మద్దతు తెలపాలని రిజిజు కోరారు. కాంగ్రెస్‌తో పాటు సమాజ్‌వాదీ పార్టీ నేతలను, ఇతర ప్రతిపక్ష నాయకులను కూడా కేంద్ర మంత్రులు కలిసి చర్చలు జరపనున్నారు. ప్రతిపక్షాల నుంచి మూడింట రెండు వంతుల మెజారిటీ సాధించి, ఈ చారిత్రక బిల్లులను కేంద్రం నెరవేరుస్తుందో లేదో వేచి చూడాలి.

 Delimitation Bill, Parliament Special Session, Women Reservation Bill, Kiren Rijiju, Rahul Gandhi, Modi Govt