ఇయర్‌బడ్స్ అనగానే మనకు గుర్తొచ్చేది జిమ్‌లో వర్కవుట్లు చేసేటప్పుడు లేదా రన్నింగ్ చేసేటప్పుడు పెట్టుకునే స్పోర్ట్స్ గాడ్జెట్స్. కానీ, మార్కెట్లోకి సరికొత్తగా అడుగుపెట్టిన 'క్లియర్ ఆర్క్ 5' (Cleer Arc 5) ఓపెన్ ఇయర్‌బడ్స్ కథే వేరు. ఇవి కేవలం ఫిట్‌నెస్ ప్రియుల కోసం మాత్రమే కాదు, రోజువారీ జీవితంలో ప్రీమియం అనుభూతిని కోరుకునే ప్రతి ఒక్కరి కోసం రూపొందించబడ్డాయి. ఈ సరికొత్త ఇయర్‌బడ్స్ మార్చి 16, 2026 న ప్రపంచ మార్కెట్లో అధికారికంగా విడుదలయ్యాయి. కేవలం నాలుగు నెలల క్రితమే వచ్చిన వీటి పాత మోడల్ ఆర్క్ 4 తర్వాత ఇంత త్వరగా క్లియర్ సంస్థ ఈ అప్‌గ్రేడెడ్ వెర్షన్‌ను తీసుకురావడం టెక్ ప్రియులను సైతం ఆశ్చర్యపరిచింది.

ఈ గాడ్జెట్ ధర విషయానికి వస్తే, ఇది ప్రీమియం విభాగంలో నిలుస్తుంది. దీని ప్రారంభ ధర 219.99 డాలర్లు (సుమారు 170 పౌండ్లు లేదా 340 ఆస్ట్రేలియన్ డాలర్లు) గా నిర్ణయించారు. ఓపెన్ ఇయర్‌బడ్స్ కేటగిరీలో అత్యంత ఖరీదైన మోడళ్లలో ఇది ఒకటిగా నిలిచింది. ఇందులో అమర్చిన అధునాతన ఫీచర్లు యూజర్లను అమితంగా ఆకట్టుకుంటాయి. ముఖ్యంగా థియేటర్ లాంటి అనుభూతిని ఇచ్చే డాల్బీ అట్మోస్ (Dolby Atmos), టిహెచ్ఎక్స్ స్పేషియల్ ఆడియో (THX Spatial Audio) సపోర్ట్ దీని ప్రత్యేకత. ప్రయాణాల్లో సినిమా చూసేటప్పుడు అద్భుతమైన సౌండ్ ఎఫెక్ట్స్ అందించడానికి ఇది ఉపయోగపడుతుంది. ఆడియో క్వాలిటీ కోసం ఎల్‌డిఎసి (LDAC), ఆప్ట్ఎక్స్ అడాప్టివ్ (aptX Adaptive) వంటి ప్రీమియం బ్లూటూత్ కోడెక్స్‌ను ఇందులో జోడించారు. బ్లూటూత్ 6.0 కనెక్టివిటీతో పనిచేసే ఈ బడ్స్‌లో 16.2 మిమీ పెద్ద డ్రైవర్లను ఉపయోగించారు.

ఫీచర్ల పరంగా క్లియర్ సంస్థ ఎక్కడా తగ్గలేదు. దీని మొబైల్ యాప్‌లో మన బాడీ పోస్చర్ (కూర్చునే విధానం) సరిగ్గా ఉందో లేదో పరీక్షించే 'పోస్చర్ టెస్ట్' ఫీచర్ ఉంది. అంతేకాకుండా, ఒకే చోట ఎక్కువ సేపు కూర్చుంటే అప్రమత్తం చేసే సెడెంటరీ రిమైండర్లు కూడా ఉన్నాయి. దీని ఛార్జింగ్ కేస్ కూడా చాలా స్మార్ట్‌గా ఉంటుంది. కేస్‌పైనే ఒక చిన్న డిస్‌ప్లే స్క్రీన్ ఉంటుంది, దీని ద్వారా ఫోన్ తీయకుండానే ఆడియో సెట్టింగ్స్ మార్చుకోవచ్చు. దీని బరువు వచ్చేసి ప్రతి బడ్ 11.5 గ్రాములు, కేస్ బరువు 145 గ్రాములుగా ఉంటుంది. ఐపిఎక్స్7 (IPX7) వాటర్ ప్రూఫ్ రేటింగ్ ఉండటం వల్ల నీటి చినుకులకు పాడవదు.

బ్యాటరీ లైఫ్ విషయంలో క్లియర్ ఆర్క్ 5 అద్భుతమైన రికార్డును కలిగి ఉంది. ఒక్కసారి ఛార్జ్ చేస్తే ఇయర్‌బడ్స్ ఏకంగా 12 గంటల పాటు నిరంతరాయంగా పనిచేస్తాయి. ఛార్జింగ్ కేస్ సహాయంతో అదనంగా మరో 48 గంటలు, అంటే మొత్తం 60 గంటల భారీ బ్యాటరీ బ్యాకప్‌ను ఇది అందిస్తుంది. లాంగ్ జర్నీలు చేసేవారికి ఇది ఒక గొప్ప వరం. అయితే, ఇన్ని అద్భుతమైన ఫీచర్లు, అద్భుతమైన బ్యాటరీ లైఫ్ మరియు ప్రీమియం డిజైన్ ఉన్నప్పటికీ, దీని సౌండ్ క్వాలిటీ మరియు గరిష్ట వాల్యూమ్ (Max Volume) మాత్రం ఆశించిన స్థాయిలో లేకపోవడం కొసమెరుపు. బాస్ మరియు ట్రెబుల్ అంత స్పష్టంగా లేకపోవడం, ధరతో పోలిస్తే సౌండ్ రేంజ్ తక్కువగా ఉండటం దీని ప్రధాన లోపాలుగా టెక్ నిపుణులు చెబుతున్నారు. అయినప్పటికీ, వినూత్నమైన డిస్‌ప్లే కేస్, హెల్త్ ఫీచర్లు, సుదీర్ఘ బ్యాటరీ లైఫ్ కోరుకునే వారికి ఇది ఒక సరికొత్త ఆప్షన్ అని చెప్పవచ్చు.