ఒకవైపు ప్రపంచ వాతావరణ సంస్థ,  భారత వాతావరణ శాఖ శాస్త్రీయ అధ్యయనాల అనంతరం ఎల్ నినో  ప్రభావంతో తీవ్ర వర్షాభావ పరిస్థితులు నెలకొంటాయని చెబుతుంటే..   సికింద్రాబాద్ ఉజ్జయిని మహంకాళి బోనాల వేడుకల్లో   భవిష్యవాణి   మాత్రం  కుండపోత వర్షాలు, భారీ వరదల ముప్పు ఉందని హెచ్చరిస్తోంది. సోమవారం (ఆగస్టు 3)  సికింద్రాబాద్ మహంకాళి దేవాలయంలో జరిగిన రంగం లో మాతంగి స్వర్ణలత వినిపించిన భవిష్యవాణి  రాష్ట్రం భారీ వర్షాలు, వరదల ముప్పు ముంగిట ఉందని చెప్పింది.  

  వాతావరణ శాఖ..  పసిఫిక్ మహాసముద్రంలో ఉష్ణోగ్రతలు అసాధారణంగా పెరుగుతుండటంతో  సూపర్ ఎల్ నినో ఏర్పడిందనీ, దీని ప్రభావంతో  వర్షాకాలం  సాధారణం కంటే చాలా చాలా తక్కువ వర్షపాతం నమోదౌతుందనీ శాస్త్రీయ అధ్యయనాల ఆధారంగా చెబుతుంటే..   ఆ శాస్త్రీయంగా వేసిన అంచనాలకు భిన్నంగా  అమ్మవారి భవిష్యవాణి  ఉంది.  ఈ ఏడాది తెలంగాణ రాష్ట్రంలో  అతిభారీ వర్షాలు కురిసి, భయంకరమైన భారీ వరదలు సంభవిస్తాయని భవిష్యవాణి కుండబద్దలు కొట్టినట్లు చెప్పింది.   

భారీ ప్రాణ, ఆస్తి నష్టం తప్పదని పేర్కొంది.  వర్షాలతో పాటు ఈ ఏడాది భారీ అగ్నిప్రమాదాలు కూడా సంభవించే అవకాశాలు ఉన్నాయని, ఆస్తి నష్టంతో పాటు  ప్రాణనష్టం జరిగే ప్రమాదం ఉందని భవిష్యవాణి పేర్కొంది.  ధర్మాన్ని పాటిస్తూ భక్తితో నడుచుకుంటే ఎంతటి ఆపద వచ్చినా భక్తులను కాపాడుకుంటానని అమ్మవారు అభయమిచ్చినట్లు స్వర్ణలత  వినిపించిన భవిష్యవాణి పేర్కొంది.   6 నెలల వ్యవధిలో విగ్రహ ప్రతిష్ఠ చేయకుంటే పెనుముప్ప తప్పదని హెచ్చరించింది.  శాస్త్ర విజ్ణానం అంచనాలు నిజమై లోటు వర్షపాతంలో కరవు చ్ఛాయలు అలముకుంటాయా? అమ్మవారి భవిష్యవాణి చెప్పినట్లు కుండపోత వర్షాలు ముంచెత్తుతాయా అన్న చర్చ ఇప్పుడు తెలంగాణ సమాజాంలో జోరుగా సాగుతోంది. 

Telangana Heavy Rains Alert,  Matangi Swarnalatha Bhavishyavani, Secunderabad Mahankali Bonalu, Telangana Floods Warning, IMD Weather Forecast Telangana