మిజోరాంలో ఈ నెల 28న అసెంబ్లీ ఎన్నికలు జరగనున్న సంగతి తెలిసిందే. మిజోరాం ఎన్నికల ప్రచారం సందర్భంగా ఓ ఘటన చోటు చేసుకుంది. ఎన్నికల ప్రచారంలో భాగంగా బీజేపీ జాతీయ అధ్యక్షుడు అమిత్ షా గురువారం సాయంత్రం పశ్చిమ తాయ్‌పూయ్‌ నియోజకవర్గంలోని త్లబంగ్ గ్రామానికి వెళ్లారు. అక్కడికి చేరుకున్న తర్వాత హెలికాప్టర్ దిగబోయిన ఆయన.. పొరపాటున ఓ మెట్టు వదిలేసి అడుగుపెట్టారు. దీంతో అమాంతం నేలపై బోర్లా పడిపోయారు. అమిత్‌షాతో పాటు హెలికాప్టర్‌లో వెళ్లిన మరో వ్యక్తి ఆయనను వెంటనే పైకి లేపారు. దీన్ని ఎవరో వీడియో తీసి సోషల్ మీడియాలో పోస్టు చేయడంతో ఈ ఘటన వెలుగులోకి వచ్చింది. ప్రస్తుతం ఇది సోషల్ మీడియాలో వైరల్‌గా మారింది.