అమెరికా రక్షణ రంగ చరిత్రలోనే అత్యంత శక్తిమంతమైన,  యుద్ధ విమానంగా పేరుగాంచిన బీ 52 స్ట్రాటోఫోర్ట్రెస్ బాంబర్ విమానం  కుప్పకూలింది. కాలిఫోర్నియాలోని ప్రసిద్ధ ఎడ్వర్డ్స్ ఎయిర్ ఫోర్స్ బేస్‌లో జరిగిన ఈ  ప్రమాదం  అమెరికా వైమానిక దళాన్ని,  అంతర్జాతీయ రక్షణ వర్గాలను తీవ్ర దిగ్భ్రాంతికి గురిచేసింది.  ఈ ప్రమాదంలో విమానంలో ఉన్న ఎనిమిది మంది రక్షణ సిబ్బంది  దుర్మరణం పాలయ్యారు. ఎయిర్‌బేస్ రన్‌వేపైనే ఈ భారీ యుద్ధ విమానం కుప్పకూలింది. 

 సాధారణ టెస్ట్ మిషన్‌లో భాగంగా ఈ భారీ బాంబర్ విమానం రన్‌వే నుంచి గాల్లోకి టేకాఫ్ అయింది. అయితే..  టేకాఫ్  నిముషాల వ్యవధిలోనే సాంకేతిక లోపం తలెత్తడంతో రన్‌వే సమీపంలోనే అత్యంత వేగంగా భూమిని ఢీకొట్టింది. విమానం కూలిన వెంటనే భారీ ఎత్తున మంటలు చెలరేగాయి.  పేలుడు ధాటికి ఆ ప్రాంతమంతా  దట్టమైన, నల్లటి పొగ అలుముకుంది.  సమాచారం అందుకున్న వైమానిక దళ రెస్క్యూ బృందాలు, అగ్నిమాపక సిబ్బంది ఘటనా స్థలానికి చేరుకుని సహాయక చర్యలు ప్రారంభిం చినప్పటికీ లాభం లేకపోయింది.

412వ టెస్ట్ వింగ్ డిప్యూటీ కమాండర్ కల్నల్ జేమ్స్ హేస్ ఈ ఘోర ప్రమాదాన్ని  ధ్రువీకరించారు. విమానం  ప్రమాదానికి గురైందని, లోపల ఉన్న వారిలో ఎవరూ ప్రాణాలతో బయటపడే అవకాశం లేదనీ పేర్కొన్నారు.  మరణించిన ఆ ఎనిమిది మందిని  గొప్ప అమెరికన్లు గా అభివర్ణిస్తూ వారికి నివాళులర్పించారు. మృతుల్లో అమెరికా సైనిక సిబ్బందితో పాటు, రక్షణ రంగానికి చెందిన   సాంకేతిక నిపుణులు, ప్రభుత్వ, ప్రైవేట్ కాంట్రాక్టర్లు ఉన్నారు.  

అసలు ఈ ప్రమాదం ఎలా జరిగిందంటే..  అమెరికా ఎయిర్ ఫోర్స్ అత్యంత ప్రతిష్ఠాత్మకంగా చేపట్టిన  రాడార్ మోడరనైజేషన్ ప్రోగ్రామ్ లో భాగంగా ఈ విమానం ప్రయోగాత్మక ప్రయాణం చేస్తోంది.  యుద్ధ విమానాల్లో అత్యంత కీలకమైన  యాక్టివ్ ఎలక్ట్రానికల్లీ స్కాన్డ్ అర్రే ఏఈఎస్ఏ   అనే సరికొత్త అత్యాధునిక రాడార్ వ్యవస్థ పనితీరును పరిశీలిస్తుండగా ఈ ప్రమాదం జరిగింది. ఈ అత్యున్నత సాంకేతిక రాడార్ టెస్టింగ్ సమయంలోనే విమానం నియంత్రణ కోల్పోయి ఉంటుందని  భావిస్తున్నారు.

ఈ ప్రమాదానికి గల ఖచ్చితమైన కారణాలను అన్వేషించడానికి అమెరికా రక్షణ శాఖ ఉన్నత స్థాయి దర్యాప్తుకు ఆదేశించింది. . అణు ఆయుధాలతో పాటు సంప్రదాయ ఆయుధాలను భారీ మొత్తంలో మోసుకెళ్లగల సామర్థ్యం ఉన్న  బీ 52 యుద్ధ విమానాలు దశాబ్దాలుగా అమెరికా వైమానిక శక్తికి వెన్నెముకగా నిలిచాయి.