రాయల్ బాటిళ్లలో లోకల్ మద్యం నింపి, “ప్రీమియం లిక్కర్” పేరుతో సాఫ్ట్‌వేర్ ఉద్యోగులను టార్గెట్ చేసిన ఓ వినూత్న లిక్కర్ దందాను ఎక్సైజ్ అధికారులు బట్టబయలు చేశారు. రంగారెడ్డి జిల్లాలో ఖరీదైన బ్రాండ్ల పేరుతో చీప్ లిక్కర్ విక్రయిస్తున్న ముఠాను ఎన్ఫోర్స్‌మెంట్ సీఐ సుభాష్ చంద్ర, ఎస్సై అఖిల్ బృందం అరెస్ట్ చేసింది. దాడుల్లో రూ.3 లక్షలకు పైగా విలువ చేసే మిక్సింగ్ మద్యం, ఖరీదైన బ్రాండ్ సీసాలు, క్యాపులు స్వాధీనం చేసుకున్నారు.

ఈ ముఠా వ్యవహారశైలి చూస్తే ఆశ్చర్యం కలగక మానదు. పెద్దల లిక్కర్ పార్టీల్లో ఖాళీ అయ్యే ఖరీదైన మద్యం సీసాలను సేకరించి, వాటిలో చీప్ లిక్కర్‌కు కొద్దిగా నీరు కలిపి మళ్లీ సీల్ చేసేవారు. ఆ తర్వాత వాటిని “లగ్జరీ ఎడిషన్” పేరుతో మార్కెట్‌లో విక్రయించేవారు.

ఇక వీరి ప్రధాన టార్గెట్ సాఫ్ట్‌వేర్ ఉద్యోగులే. జీతాలు ఎక్కువ… సమయం తక్కువ… చెక్ చేసుకునే ఓపిక ఉండదనే అంచనాతో వారినే లక్ష్యంగా చేసుకుని ఈ నయా దందాకు తెరలేపారు. ధరలు కూడా వినడానికి బంపర్ ఆఫర్లలా ఉండేవి. రూ.25 వేల విలువ చేసే రాయల్ సెల్యూట్‌ను కేవలం రూ.8 వేలకే, రూ.9 వేల శివాస్ రీగల్‌ను రూ.4 వేలకే, రూ.7 వేల గ్లెన్‌ఫిడిచ్‌ను రూ.3 వేలకే విక్రయిస్తూ కస్టమర్లను ఆకర్షించారు. తక్కువ ధరకు ఖరీదైన మద్యం దొరుకుతోందని భావించిన కస్టమర్లు మోసపోగా, ముఠా మాత్రం భారీ లాభాలు గడించింది.

కొండాపూర్ పరిసరాల్లోని గుట్టల బేగంపేటలో అద్దె గదిని తీసుకుని రహస్యంగా ఈ “మినీ ఫ్యాక్టరీ” నిర్వహించారు. ఒడిశాకు చెందిన లాలు ప్రసాద్ బిస్వాల్, రాజేశ్వర్ మెహర్ లిక్కర్ ఈవెంట్లలో పనిచేస్తూ ఖాళీ బాటిళ్లు సేకరించేవారు. కరీంనగర్‌కు చెందిన సాఫ్ట్‌వేర్ ఉద్యోగి శరత్ చంద్ర మార్కెటింగ్ బాధ్యతలు చూసేవాడు. ముగ్గురు కలిసి లాభాలు పంచుకుంటూ ఈ అక్రమ వ్యాపారాన్ని నడిపారు.

అయితే ఎక్సైజ్ అధికారుల ఎంట్రీతో ఈ “లిక్కర్ స్టార్టప్” ఒక్కసారిగా కుప్పకూలింది. లాలు ప్రసాద్ బిస్వాల్, శరత్ చంద్రలను అరెస్ట్ చేసి కొండాపూర్ ఎక్సైజ్ స్టేషన్‌కు తరలించగా, రాజేశ్వర్ మెహర్‌పై కేసు నమోదు చేశారు. ఖరీదైన మద్యం తక్కువ ధరలకు ఇస్తామంటూ చెప్పే వారిని నమ్మవద్దని ఎక్సైజ్ శాఖ హెచ్చరిస్తోంది. “చీప్ ధరకు రాయల్ మద్యం” అనిపిస్తే అది ఆఫర్ కాదు… ఆపద కావొచ్చని అధికారులు సూచిస్తున్నారు. మొత్తానికి… రాయల్ బాటిళ్లలో లోకల్ మద్యం పోసి రాజుల్లా సంపాదించాలని చూసిన ఈ ముఠా… చివరకు పోలీస్ స్టేషన్‌కే రాయల్ ఎంట్రీ ఇచ్చింది.