తమిళనాడులో నటుడు విజయ్ నేతృత్వంలో టీవీకే ప్రభుత్వాన్ని కూల్చేందుకు జరిగిన కుట్రను పోలీసులు భగ్నం చేశారు. 15 మంది ఎమ్మెల్యేలను ప్రలోభపెట్టేందుకు ప్రయత్నించిన నలుగురిని అరెస్ట్ చేశారు. తమిళనాడు రాజకీయాల్లో ఒక్కసారిగా పెను భూకంపం సంభవించింది. తాజాగా జరిగిన అసెంబ్లీ ఎన్నికల్లో సూపర్ స్టార్ విజయ్ నేతృత్వంలోని తమిళగ వెట్రి కళగం (టీవీకే) ఏకంగా 108 స్థానాలను కైవసం చేసుకుని ప్రభంజనం సృష్టించిన సంగతి తెలిసిందే. దశాబ్దాలుగా సాగుతున్న డీఎంకే, ఏఐఏడీఎంకేల ఆధిపత్యానికి గండికొడుతూ విజయ్ ముఖ్యమంత్రి పీఠాన్ని అధిష్టించారు. 

అయితే, ప్రభుత్వం ఏర్పడిన కొద్ది రోజుల్లోనే సరికొత్త రాజకీయ సంక్షోభం తెరపైకి వచ్చింది. టీవీకే పార్టీకి చెందిన ఎమ్మెల్యే డాక్టర్ ఎన్. ఎలైయరాజా తనకు రూ.35 కోట్ల భారీ లంచం ఆఫర్ చేశారంటూ చెన్నై పోలీస్ కమిషనర్‌కు ఫిర్యాదు చేయడం ఇప్పుడు దేశవ్యాప్తంగా పెను సంచలనంగా మారింది. శాసనసభ స్పీకర్‌కు వ్యతిరేకంగా ప్రతిపాదించబోయే ఒక కీలక తీర్మానంలో పార్టీ లైన్‌కు భిన్నంగా, తమకు అనుకూలంగా ఓటు వేయాలని కొందరు వ్యక్తులు తనపై ఒత్తిడి తెచ్చారని, ప్రలోభాలకు గురిచేశారని ఆయన తన ఫిర్యాదులో పేర్కొనడం గమనార్హం.

ఎమ్మెల్యే ఎలైయరాజా జూన్ 29న గ్రేటర్ చెన్నై పోలీస్ కమిషనర్‌ కార్యాలయంలో అధికారికంగా లిఖితపూర్వక ఫిర్యాదును అందజేశారు. ఈ ఫిర్యాదు ఆధారంగా చెన్నైలోని డి-1 ట్రిప్లికేన్ పోలీస్ స్టేషన్‌లో కేసు నమోదైంది. రంగంలోకి దిగిన పోలీసులు అత్యంత వేగంగా దర్యాప్తు జరిపి ముగ్గురు నిందితులను అరెస్ట్ చేశారు. అరంబాక్కానికి చెందిన తిరునావుక్కరసు, తిరుచిరాపల్లికి చెందిన నరేష్, మేడవక్కానికి చెందిన త్యాగరాజన్‌లను అదుపులోకి తీసుకుని విచారిస్తున్నారు. 

ప్రాథమిక విచారణలో తిరునావుక్కరసు అనే వ్యక్తి 'ఇండియన్ పొలిటికల్ డెమోక్రటిక్ స్ట్రాటజీస్' (ఐపీడీఎస్) అనే ఒపీనియన్ పోలింగ్ సంస్థను నడుపుతున్నట్లు నటించి, ఒక ప్రధాన రాజకీయ పార్టీకి చెందిన ముఖ్య నేతల ఆదేశాల మేరకే తాను ఈ పని చేస్తున్నానని ఎమ్మెల్యేను నమ్మించే ప్రయత్నం చేసినట్లు తేలింది. రూ.35 కోట్ల భారీ మొత్తాన్ని ఆశగా చూపిస్తూ, ఒకవేళ ఈ ప్రతిపాదనను తిరస్కరిస్తే తీవ్ర పరిణామాలు ఉంటాయని, ఈ విషయాన్ని బయటపెడితే ఎమ్మెల్యే కుటుంబ సభ్యులను అంతం చేస్తామంటూ బెదిరింపులకు పాల్పడినట్లు ఎలైయరాజా వెల్లడించారు.

ఈ కేసు విచారణ ముందుకు సాగుతున్న కొద్దీ ఊహించని లింకులు బయటపడుతున్నాయి. జైలు నుంచి విడుదలై, కోయంబత్తూర్ సౌత్ ఎమ్మెల్యేగా ఉన్న డీఎంకే మాజీ మంత్రి వి. సెంథిల్ బాలాజీ సోదరుడు వి. అశోక్ కుమార్ హస్తం కూడా ఈ కుట్రలో ఉన్నట్లు పోలీసుల దర్యాప్తులో వెల్లడైంది. నిందితుడైన నరేష్‌ను అశోక్ కుమార్ చెన్నైలో స్వయంగా కలిసినట్లు ఆధారాలు లభ్యమయ్యాయి. ఈ హార్స్ ట్రేడింగ్ (ఎమ్మెల్యేల కొనుగోలు) వ్యవహారంలో తిరునావుక్కరసు పూర్తిగా సెంథిల్ బాలాజీ, అశోక్ కుమార్ ల సూచనల మేరకే పావులు కదిపినట్లు తెలుస్తోంది. 

ఈ పరిణామాలపై అధికార టీవీకే పార్టీ తీవ్రంగా స్పందించింది. అవినీతి, అక్రమ సంపాదన తమకు తెలియదని, ప్రజాస్వామ్యాన్ని అపహాస్యం చేసేలా ప్రతిపక్షాలు కుట్రలు పన్నుతున్నాయని సీఎం విజయ్ అసెంబ్లీ వేదికగా ఘాటుగా విమర్శించారు. కేవలం ఎలైయరాజా మాత్రమే కాకుండా మరికొంతమంది టీవీకే ఎమ్మెల్యేలను కూడా లొంగదీసుకునేందుకు ఫోన్ కాల్స్ వెళ్లినట్లు అనుమానాలు వ్యక్తమవుతుండటంతో, పోలీసులు కాల్ డేటాను నిశితంగా పరిశీలిస్తున్నారు. రాబోయే రోజుల్లో ఈ వ్యవహారం తమిళనాడు రాజకీయాలను ఏ మలుపు తిప్పుతుందోనని సర్వత్రా ఉత్కంఠ నెలకొంది.