తమిళనాడు నూతన ముఖ్యమంత్రిగా ప్రమాణ స్వీకారం చేసిన ‘దళపతి’ విజయ్‌కు ప్రముఖ హీరోయిన్ త్రిష శుభాకాంక్షలు తెలిపారు. ప్రమాణ స్వీకార కార్యక్రమానికి హాజరైన త్రిష మీడియాతో మాట్లాడుతూ.. “ఇవాళ నేను చాలా సంతోషంగా ఉన్నాను. నా మద్దతు ఎప్పటికీ విజయ్‌కే ఉంటుంది” అని వ్యాఖ్యానించారు. విజయ్ ప్రమాణ స్వీకార వేడుకలో త్రిష ప్రత్యేక ఆకర్షణగా నిలిచారు. ఆమె కార్యక్రమానికి తన తల్లితో కలిసి ముందుగానే హాజరయ్యారు. సంప్రదాయ చీరకట్టులో వచ్చిన త్రిషను చూసి అభిమానులు, పార్టీ కార్యకర్తలు హర్షం వ్యక్తం చేశారు. అక్కడికి వచ్చిన విజయ్ తల్లిదండ్రులను ఆమె ఆప్యాయంగా పలకరించగా, విజయ్ తల్లి త్రిషను హత్తుకొని ఆత్మీయంగా స్వాగతించారు. అనంతరం తొలి వరుసలో విజయ్ కుటుంబ సభ్యులతో కలిసి త్రిష కూర్చున్నారు.

విజయ్ ముఖ్యమంత్రిగా ప్రమాణ స్వీకారం చేస్తున్న సమయంలో త్రిష ఆనందం స్పష్టంగా కనిపించింది. తన సినీ ప్రయాణంలో ఎన్నో విజయవంతమైన చిత్రాల్లో జోడీగా నటించిన విజయ్ ఇప్పుడు ప్రజా నాయకుడిగా అత్యున్నత పదవిని చేపట్టడం పట్ల ఆమె హర్షం వ్యక్తం చేశారు. సోషల్ మీడియాలో కూడా స్పందించిన త్రిష.. “విజయ్ రాజకీయ ప్రస్థానంలో సాధించిన ఈ విజయంతో నేను ఎంతో ఆనందంగా ఉన్నాను. ఆయన నాయకత్వంలో తమిళనాడు మరింత అభివృద్ధి చెందాలని కోరుకుంటున్నాను” అని పేర్కొన్నారు.

ఇక విజయ్ – త్రిష జోడీ తమిళ ప్రేక్షకులకు ఎప్పటినుంచో ప్రత్యేకమైనది. ‘గిల్లీ’, ‘తిరుపాచి’, ‘కురువి’ వంటి బ్లాక్‌బస్టర్ చిత్రాలతో పాటు ఇటీవల వచ్చిన ‘లియో’ సినిమాలో కూడా వీరిద్దరూ కలిసి నటించారు. విజయ్ సినిమాలకు స్వస్తి చెప్పి పూర్తిస్థాయి రాజకీయాల్లోకి రావడాన్ని త్రిష మొదటి నుంచే స్వాగతిస్తూ వస్తున్నారు. విజయ్ ముఖ్యమంత్రిగా బాధ్యతలు చేపట్టడంపై కోలీవుడ్ నుంచి టాలీవుడ్ వరకు పలువురు సినీ ప్రముఖులు శుభాకాంక్షలు తెలుపుతున్నారు.