తిరుపతి అసెంబ్లీ నియోజకవర్గంలో మొత్తం ఓటర్లలో పురుషులే ఎక్కువగా కనిపిస్తున్నారు. మొత్తం రెండు లక్షల 50 వేల 46మంది ఓటర్లున్నారు. వీరిలో పురుషులు లక్షా 26వేల 535 మంది ఉన్నారు. మహిళలు లక్షా 23వేల 511మంది ఉన్నారు. అంటే మూడు వేల 24 మంది పురుషులే ఎక్కువగా ఓటర్లుగా నమోదయ్యారు. 2009 ఎన్నికలతో పోలిస్తే 2,886మంది కొత్తగా ఓటుహక్కు వినియోగించుకుంటున్నారు. ఈ నియోజకవర్గంలో కాంగ్రెస్ అభ్యర్థి ఎం.వెంకటరమణ ముమ్మరంగా ప్రచారం చేస్తూ ప్రత్యర్థుల గుండెల్లో రైళ్ళు పరిగెత్తిస్తున్నారు. ఈయన తరుగాత తెలుగుదేశం పార్టీ అభ్యర్థి చదలవాడ కృష్ణమూర్తి పోటీలో నిలుస్తున్నారు. చివరిగా వైఎస్ ఆర్ కాంగ్రెస్ అభ్యర్థి భూమాన కరుణాకరరెడ్డి ఇంటింటి ప్రచారం చేశారు. సమైక్యవాదంతో వెంకటరమణ ముందంజలో ఉండటం, ఓటర్లలో పురుషులు ఎక్కువగా ఉండటం, మహిళలకు కూడా కాంగ్రెస్ ఇటీవల రుణాలు మంజూరు చేయటం కాంగ్రెస్ కు అనుకూల అంశాలు. తెలుగుదేశం పార్టీ అధినేత చంద్రబాబు సొంత జిల్లా కావటం, తెలుగుదేశం పార్టీ ఆవిర్భావం నుంచి స్పందన రావటం, మాజీ ఎమ్మెల్యేగా అనుభవం ఉండటం కూడా చదలవాడకు ఫేవర్ అని భావిస్తున్నారు. విజయమ్మ ప్రచారం, టిడిపి ఛైర్మన్ గా గతంలో పనిచేసిన అనుభవం, వైఎస్ సర్కారులో ఉన్నప్పుడు పరిచయాలు వై.కా.పా. అభ్యర్థి భూమాన కరుణాకరరెడ్డికి కలిసి వచ్చే అంశాలు.