వ‌చ్చేసిందోచ్‌.. క‌రోనా అన్ని వేరియంట్ల‌ను ఎదుర్కొనే టీకా!

ఆల్ఫా, డెల్టా, డెల్టా ప్లస్‌, ఒమిక్రాన్‌.. వేరియంట్ ఏదైనా.. క‌రోనా వైర‌స్‌కు చెక్ పెట్టే వ్యాక్సిన్‌ను రూపొందించారు ఇండియ‌న్ సైంటిస్టులు. ఇప్ప‌టికే పుట్టుకొచ్చిన వేరియంట్ల‌తో పాటు భ‌విష్య‌త్తులో రాబోవు ర‌కాల‌ను త‌మ టీకా స‌మ‌ర్థ‌వంతంగా అడ్డుకుంటుంద‌ని చెబుతున్నారు. ఆ వ్యాక్సిన్‌కు ‘‘అభిస్కొవాక్‌’’ అని పేరు పెట్టారు. 

‘‘అభిస్కొవాక్‌’’ టీకా అన్ని వేరియంట్లను నిలువరిస్తుందని అంటున్నారు పశ్చిమబెంగాల్‌లోని కాజీ నజ్రుల్‌ వర్సిటీ, ఒడిసా భువనేశ్వర్‌లోని ఇండియన్‌ ఇన్‌స్టిట్యూట్‌ ఆఫ్‌ సైన్స్‌ ఎడ్యుకేషన్‌ అండ్‌ రీసెర్చ్‌ (ఐఐఎస్‌ఈఆర్‌) శాస్త్రవేత్తలు. ఇమ్యునో ఇన్ఫర్మేటిక్‌ పద్ధతులను ఉపయోగించి ఈ వ్యాక్సిన్‌ను డిజైన్‌ చేసినట్లు చెబుతున్నారు. ఇది పెప్టైడ్‌ (ఎమైనో ఆమ్లాలున్న అణువు) వ్యాక్సిన్‌. 

చిమెరిక్‌ పెప్టైడ్‌ను లక్ష్యంగా చేసుకుని పనిచేసే అభిస్కొవాక్‌.. కొవిడ్‌ కుటుంబంలోని ఆరు వేరియంట్ల (హెచ్‌కొవ్‌-229ఈ, హెచ్‌కొవ్‌-హెచ్‌కేయూ1, హెచ్‌కొవ్‌- ఓసీ43, సార్స్‌-కొవ్‌, మెర్స్‌-కొవ్‌, సార్స్‌-కొవ్‌2)కు వ్యతిరేకంగా రోగ నిరోధక శక్తిని పెంపొందిస్తుందన్నారు. కంప్యూటేషనల్‌ పద్ధతులను ఉపయోగించి.. ఈ టీకాను అభివృద్ధి చేశామని, పరీక్షల అనంతరం ఉత్పత్తికి ప్రయత్నాలు చేస్తామని తెలిపారు. 

తాజా, పరిశోధన వివరాలను ప్రచురించేందుకు మాలిక్యులర్‌ లిక్విడ్స్‌ జర్నల్స్‌ అంగీకరించింది. సాధారణ పరమాణు, సంక్లిష్ట ద్రవ నిర్మాణం-పరస్పర చర్యలు, గతిశీల ప్రక్రియలు, ప్రాథమిక అంశాలకు సంబంధించిన పరిశీలనలను ఈ జర్నల్‌ ప్రచురిస్తుంటుంది. అయితే, ఈ వ్యాక్సిన్‌కు ప్ర‌భుత్వ అనుమ‌తి రావాల్సి ఉంది.