లక్కుండిలో లంకె బిందెలు...నిధి కోసం ప్రభుత్వ వేట

కర్ణాటకలోని గడగ్ జిల్లాలో ఉన్న చారిత్రాత్మక లక్కుండి గ్రామంలో ఇంటి నిర్మాణ సమయంలో ఇటీవల లంకె బిందె బయటపడిన విషయం తెలిసిందే. 634 గ్రాముల బరువున్న ఆ తామరపు బిందెలో 466 గ్రామలు బంగారు గాజులు, కడియాలు, గొలుసు, ఉంగరాలు బయటపడ్డాయి. దాంతో ఆ ప్రాంతంలో నిధి కోసం పూర్తిస్థాయిలో తవ్వకాలు చేపట్టాలని కర్ణాటక ప్రభుత్వం ఆదేశించింది. శుక్రవారం (16-1-26) నుంచి లక్కుండిలో నిధి కోసం వేట మొదలుపెట్టారు. 

అక్కడి కోటే వీరభద్రేశ్వర స్వామి ఆలయ ప్రాంగణంలో నిధుల కోసం పుర్తిస్థాయి తవ్వకాలు చేపట్టినట్లు అధికారులు వెల్లడించారు. అందుకోసం పెద్ద మొత్తంలో జేసీబీలు, ట్రాక్కులు, ట్రాక్టర్‌లను తరలించారు. ఈ ప్రాజెక్టును పర్యాటక శాఖ, పురావస్తు శాఖ, లక్కుండి హెరిటేజ్ డెవలప్‌మెంట్ అథారిటీ, జిల్లా యంత్రాంగం సంయుక్తంగా చేపడుతున్నాయి. 

పురాతన కాలంలో లక్కుండిలో బంగారు నాణాలు ముద్రించినట్లు అధారాలున్నాయని పురావస్తు శాఖ అధికారులు చెప్తున్నారు. ఈ ప్రాంతం 14వ శతాబ్దంలో ప్రధాన నగరంలో ఉండేదని చారిత్రక ఆధారులున్నాయి. భుగర్భంలో ఇప్పటికీ అపారమైన సంపద దాడి ఉండొచ్చని, వాటిని గుర్తించడానికే తవ్వకాలు చేపడుతున్నట్లు అధికారులు పేర్కొన్నారు. ప్రస్తుతం లక్కుండిలో లభ్యమైన ఆభరణాలు 400 ఏళ్ల నాటివి అయ్యుండొచ్చని తెలిపారు.