Home  
Politics

పార్లమెంట్‌కి వచ్చిన ప్రియాంక కొడుకు!

  సోనియాగాంధీ కుమార్తె ప్రియాంక వాద్రా కొడుకు రైహాన్ బుధవారం తన ప్రెండ్స్.తో కలసి పార్లమెంట్‌కు వచ్చాడు. సందర్శకుల గ్యాలరీలోంచి పార్లమెంట్ కార్యకలాపాలను గమనించాడు. స్పోర్ట్స్ జాకెట్ ధరించి వచ్చిన రైహాన్ సెంట్రల్ హాల్‌ను తిలకించిన అనంతరం సోనియాగాంధీ కార్యాలయంలో కాసేపు గడిపాడు. ఈ సందర్భంగా మాట్లాడిన రైహాన్ పార్లమెంట్ చాలా బాగుందన్నాడు. ప్రియాంక గాంధీ తన పిల్లలకి రాజకీయ పాఠాలు చెబుతున్నట్టున్నారు. మొన్నామధ్య లోక్‌సభ ఎన్నికల సందర్భంగా రాయబరేలి, అమేథీ నియోజకవర్గాల్లో ప్రియాంక ప్రచారానికి వెళ్ళినప్పుడు తన కొడుకు రైహాన్, కూతురు మిరాయాలను కూడా వెంట తీసుకెళ్ళారు.

గుజరాత్ గవర్నర్‌గా ఒ.పి.కోహ్లీ ప్రమాణం

  గుజరాత్‌ రాష్ట్ర కొత్త గవర్నర్‌గా బీజేపీ నాయకుడు, రాజ్యసభ మాజీ సభ్యుడు ఒ.పి.కోహ్లీ ప్రమాణ స్వీకారం చేశారు. ఒ.పి. కోహ్లీతో గుజరాత్ హైకోర్టు చీఫ్ జస్టిస్ భాస్కర్ భట్టాచార్య ప్రమాణ స్వీకారం చేయించారు. కోహ్లీని గవర్నర్‌గా రాష్ట్రపతి ప్రణబ్ ముఖర్జీనియమించారని అంతకుముందు రాష్ట్ర ప్రభుత్వ ప్రధాన కార్యదర్శి వరిష్ సిన్హా ఉత్తర్వులను చదివి వినిపించారు. 74 సంవత్సరాల వయసున్న ఒ.పి. కోహ్లీ గుజరాత్ రాష్ట్రానికి 24వ గవర్నర్. ఇప్పటి వరకూ గుజరాత్ గవర్నర్‌గా వున్న 87 ఏళ్ళ కమలా బెనీవాల్‌ను కేంద్రం మిజోరాం గవర్నర్‌గా బదిలీ చేసి బెనీవాల్ స్థానంలో ఒ.పి. కోహ్లీని గుజరాత్ గవర్నర్‌గా నియమించింది.

10 రూపాయలు ఎర.. 7 లక్షలు చోరీ!

  మంగళవారం నాడు హైదరాబాద్‌లో మాజీ ఎంపీ డ్రైవర్‌కి పది రూపాయలు ఎరగా వేసి కారులోంచి విలువైన వస్తువులు, కొంత డబ్బు దొంగలు కొట్టేసిన విషయం తెలిసిందే. ఇప్పుడు మళ్ళీ హైదరాబాద్‌లోనే అలాంటి సంఘటనే మరొకటి జరిగింది. హైదరాబాద్‌ అమీర్‌పేటలోని సత్యం థియేటర్ ప్రాంతంలో వున్న హెచ్.డి.ఎఫ్.సి. బ్యాంకు నుంచి సత్యారాం అనే వ్యక్తి తాను పనిచేసే సంస్థ కోసం ఏడు లక్షల రూపాయలు విత్ డ్రా చేశాడు. సత్యారాంని ఫాలో అవుతున్న దొంగలు అతని ముందు ఒక పది రూపాయల నోటు విసిరారు. పరాయి పది రూపాయలను చూసిన మోజులో సత్యారాం ఆ పదిరూపాయల నోటుని అందుకోవడానికి కిందకి వంగాడు. అంతే, అతని చేతిలో ఏడు లక్షల రూపాయలతో వున్న బ్యాగ్‌ని లాక్కుని దొంగలు పరారైపోయారు. సత్యారాం లబోదిబో అంటూ స్థానిక పోలీసులకు ఫిర్యాదు చేశాడు.

రాయలసీమలో ఏపీ రెండో రాజధాని: సునీత

  ఆంధ్రప్రదేశ్‌కి చెందిన పలువురు నాయకులు ఎవరికి వారు తమ ప్రాంతంలోనే ఆంధ్రప్రదేశ్ రాజధాని ఏర్పడాలన్న ఆకాంక్షను వ్యక్తం చేస్తున్నారు. ఎవరు ఎన్ని ఆకాంక్షలు వ్యక్తం చేసినా విజయవాడ, గుంటూరు నగరాల మధ్యలోనే రాజధాని నగరం ఏర్పడే అవకాశాలు వున్నాయని స్పష్టంగా తెలుస్తోంది. ఈ విషయం తెలిసి కూడా కొంతమంది రీసెంట్‌గా రాయలసీమలో రాజధాని వుండాలని ఒకరంటే, రాజధాని ఒంగోలులోనే వుండాలని మరికొందరూ అంటూ వచ్చారు. తాజాగా పరిటాల రవి సతీమణి, రాష్ట్ర మంత్రి పరిటాల సునీత ఒక కొత్త ప్రతిపాదనను ముందుకు తెచ్చారు. రాజధాని అనేది రాష్ట్రం నడిబొడ్డునే వుండాలని ఆమె చెప్పారు. అంటే పరోక్షంగా విజయవాడ - గుంటూరు ప్రాంతమే రాజధానిగా వుండాలన్నది ఆమె అభిమతం. అయితే ఆమె మరో ఆసక్తికరమైన మాట అన్నారు. రాయలసీమలో రెండో రాజధానిని ఏర్పాటు చేస్తే బాగుంటుందని చెప్పారు. ఏదో బాగానే వున్నట్టుందే అనిపించిన ఈ ప్రతిపాదన కార్యరూపంలోకి వస్తుందో లేదో చూడాలి.

వంద బిలియన్ డాలర్లతో బ్రిక్స్ బ్యాంక్

  చైనాలోని షాంఘైలో బ్రిక్స్ డెవలప్ మెంట్ బ్యాంకు ఏర్పాటు చేయాలని భావిస్తున్నారు. వంద బిలియన్ డాలర్లతో ఈ బ్రిక్స్ బ్యాంకు ప్రారంభం కాబోతోంది. బ్యాంకు కార్యాలయాన్ని జోహన్‌బర్గ్.లో బ్యాంకు ఏర్పాటు చేయాలని దక్షిణాఫ్రికా కోరుతోంది. అయితే షాంఘై నగరంలో ఏర్పాటు చేయాలని చేయాలని చైనా పట్టుబడుతోంది. బ్యాంకు ఎక్కడ స్థాపించినప్పటికి ఆ బ్యాంకుకు మొదటి అధ్యక్షుడిగా మాత్రం భారత ప్రధానే వుంటారు. ఈ బ్యాంకుకు తొలి ఐదేళ్లు అధ్యక్షుడిగా భారత ప్రధాని వ్యవహరిస్తారు. ఈ మేరకు డిక్లరేషన్ కూడా విడుదలైంది.

మటను, సెల్‌ఫోనుల వల్లే రేప్‌లు: బీహార్

  మంత్రి సమాజంలో పెరిగిపోతున్న మానభంగాలకు కారణాలేంటో రాజకీయ నాయకులు చెబుతుంటే నవ్వాలో ఏడవాలో అర్థంకాని పరిస్థితి ఏర్పడుతోంది. అమ్యాయిలపై అత్యాచారాలు పెరిగిపోవడానికి నాన్‌వెజ్ ఫుడ్, సెల్ ఫోన్లే కారణమని బీహార్‌కి చెందిన మంత్రి అభిప్రాయపడ్డాడు. బీహార్ యువజన వ్యవహారాల శాఖ మంత్రి బినయ్ బిహారీ ఈ విషయం మీద తన అమూల్యమైన అభిప్రాయాన్ని తెలియజేస్తూ, మాంసాహారం మనిషిలోని కామ ప్రకోపాన్ని పెంచుతుందట, అలాగే సెల్ ఫోన్లలో నీలి చిత్రాలు చూడడ్డం వల్ల కూడా యువతరంలో కామ ప్రకోపం పెరుగుతోందట. ఈ రెండు కారణాల వల్లే దేశంలో రేప్‌లు ఎక్కువయ్యాయట. ఈ రెంటినీ బంద్ చేస్తే ఇక రేపులనేవే వుండవట. శాకాహారంతో శరీరం, మనస్సు నిశ్చలంగా ఉంటాయనీ ఆయన చెప్పారు. అలాగే పిల్లలకు సెల్ ఫోన్లు ఇవ్వడం అంటే, ఆత్మరక్షణ పేరుతో తుపాకీ లైసెన్స్ ఇవ్వడమేనని అన్నారు.

నేపాల్‌లో ప్రమాదం.. హైదరాబాద్ బాలుడి మృతి

  నేపాల్‌లో జరిగిన రోడ్డు ప్రమాదంలో హైదరాబాద్‌కి చెందిన బాలుడు మరణించినట్టు సమాచారం అందుతోంది. నేపాల్‌లోని పర్సా ప్రాంతంలో బుధవారం ఉదయం ఒక బస్సు, టెంపో వాహనాలు ఒకదానినొకటి ఢీకొన్నాయి. ఈ ప్రమాదంలో టెంపో డ్రైవర్ మరణించాడు. అలాగే టెంపోలో ప్రయాణిస్తున్న పద్దయ్య అనే హైదరాబాద్‌కి చెందిన వ్యక్తి కుటుంబం గాయపడింది. ఈ ప్రమాదంలో పద్దయ్య ఎనిమిదేళ్ళ కుమారుడు చనిపోయినట్టు తెలుస్తోంది.

వేద్ ప్రతాప్ పై శివసేన ఫైర్

పాకిస్తాన్ పర్యటనలో ఉగ్రవాది హఫీజ్ సయీద్‌ను జర్నలిస్ట్ వేద్ ప్రతాప్ వైదిక్ కలవడంపై శివసేన అధ్యక్షుడు ఉద్దవ్ థాక్రే మండిపడ్డారు. దేశద్రోహులతో సంబంధం కలిగిన వారు ఎవరైనా దేశంలో వుండడానికి అనర్హులని అన్నారు. ఈ అంశంలో ప్రభుత్వం తన బాధ్యతను కాదనలేదని ఆయన అన్నారు. ఇదే అంశం కాంగ్రెస్ హయాంలో జరిగి ఉంటే బీజేపీ ఎలా స్పందించేదని ఆయన ప్రశ్నించారు. వేద్‌ప్రతాప్, హఫీజ్ సయీద్‌ను కలుసుకున్న అంశం మంగళవారం పార్లమెంట్ ఉభయ సభలను కుదిపేసింది. హఫీజ్ ను వైదిక్ కలవడంపై దేశవ్యాప్తంగా నిరసనలు వెల్లువెత్తాయి.

మనీలాలో తుఫాను బీభత్సం

  ఫిలిప్పీన్స్ రాజధాని మనీలాను తుఫాను బీభత్సం అల్లకల్లోలం చేస్తోంది. ఈ తుఫానుకు ‘రమ్మసన్’ అనే పేరు పెట్టారు. ఈ తుఫాను కారణంగా తూర్పు మనీలాలో దాదాపు పదిమంది మృత్యువాత పడ్డారు. సుమారు లక్షా యాభై వేల మంది ప్రజలు ఉన్నదంతా కోల్పోయి కట్టుబట్టలతో మిగలడమే కాకుండా నిరాశ్రయులయ్యారు. భారీగా వీస్తున్న ఈదురు గాలుల వల్ల మనీలాలోని భారీ వృక్షాలు కూడా నేలకూలాయి. చెట్లు కూలిపోవడం, రోడ్లు కోసుకుని పోవడం వల్ల రవాణా వ్యవస్థ పూర్తి స్థాయిలో నిలిచిపోయింది. ఇటీవలి కాలంలో ఫిలిప్పీన్ ఇంతటి భారీ తుఫానును ఎదుర్కోలేదని ఫిలిప్పీన్ వాతావరణ శాఖ చెబుతోంది.

టీఆర్ఎస్ సర్కారు మీద కిషన్‌రెడ్డి గుస్సా!

  తెలంగాణలోని టీఆర్ఎస్ ప్రభుత్వం మీద, టీఆర్ఎస్ అధ్యక్షుడు కేసీఆర్ మీద బీజేపీ తెలంగాణ అధ్యక్షుడు కిషన్ రెడ్డి తీవ్రస్థాయిలో విరుచుకుపడ్డారు. విద్యార్థుల విషయంలో టీఆర్ఎస్ ప్రభుత్వం వ్యవహరిస్తున్న తీరు అటు సీమాంధ్రకు ప్రాంతానికి చెందిన విద్యార్థులతోపాటు తెలంగాణకు చెందిన విద్యార్థుల భవిష్యత్తు కూడా నాశనమయ్యేలా వుందన్నారు. ఫీజు రీ ఎంబర్స్.మెంట్ విషయంలో తెలంగాణ ప్రభుత్వం 1956 సంవత్సరాన్ని కటాఫ్ సంవత్సరంగా నిర్ణయించాలని భావించడానికి భారతీయ జనతాపార్టీ తీవ్రంగా వ్యతిరేకిస్తోందని ఆయన చెప్పారు. ఈ సందర్భంగా కిషన్ రెడ్డి కేసీఆర్ ప్రభుత్వం మీద సంధించిన వాగ్బాణాలు ఇలా వున్నాయి...   1. విదేశాల పౌరసత్వం ఉన్నవాళ్లు కూడా మీ పార్టీలో ఎమ్మెల్యేలు కావచ్చు గానీ, తెలంగాణలో వున్న ఇతర ప్రాంతాల విద్యార్థులకు ఫీజు రీ ఎంబర్స్మెంట్ ఉండకూడదా? ఈ విషయంలో ప్రభుత్వం వెంటనే స్పష్టత ఇవ్వాలి. విద్యార్థుల జీవితాలతో చెలగాలం ఆడితే ఊరుకోం. విద్యార్థుల స్థానికతపై ఇతర రాష్ట్రాల్లో ఏ నిబంధనలు వున్నాయో తెలంగాణలో కూడా అవే నిబంధనలు వుండాలి.   2. రైతుల రుణమాఫీ విషయంలో టీఆర్ఎస్ ప్రభుత్వం నాన్చుడు ధోరణితో వ్యవహరిస్తోంది.   3. ముఖ్యమైన విషయాలలో టీఆర్ఎస్ ప్రభుత్వం తలాతోకా లేని నిర్ణయాలు తీసుకుంటోంది.   4. కేసీఆర్‌ కుటుంబ సభ్యులకు ఇంత అహంకారంతో వ్యవహరిస్తున్నారు. తొందరగా అధికారంలోకి వచ్చామని అహంకారపూరితంగా మాట్లాడుతున్నారు. తెలంగాణలో కేసీఆర్‌ కుటుంబ మొక్కటే ఉండాలా? ఇతరులెవరూ ఉండకూడదా? కేసీఆర్ కుటుంబాన్ని ఎప్పటికైనా గద్దెదింపి మా ప్రభుత్వమే అధికారంలోకి వస్తుంది.   5. తెలంగాణ కోసం టీఆర్ఎస్ ఎంత కృషి చేసిందో బీజేపీ కూడా అంతే కృషి చేసింది. అంలాంటి మా పార్టీ కార్యాలయం మీద దాడులు చేస్తారా?

రుణాల రీషెడ్యూల్ కు రిజర్వ్ బ్యాంకు గ్రీన్ సిగ్నల్

ఆంధ్ర ప్రదేశ్, తెలంగాణలో రుణాల రీషెడ్యూల్ కు అంగీకరిస్తూ రిజర్వ్ బ్యాంకు రెండు ప్రాంతాల ప్రభుత్వాలకు లేఖలను పంపింది.మూడేళ్ళ వరకు రుణాల రీషెడ్యూల్ చేసేందుకు రిజర్వ్ బ్యాంకు తన అంగీకారాన్ని తెలిపింది. ఎంతమందికి రీషెడ్యూల్ చేస్తారో, వాటి విధివిధానాలపై ఓ నివేదిక పంపాలని ఇరు ప్రాంతాల ప్రభుత్వాలను కోరింది. రీషెడ్యూల్ చేసిన రుణాలను రైతులు మూడేళ్లలో తిరిగి చెల్లించగలరా? అని ఆర్‌బీఐ ఈ సందర్భంగా ఇరు రాష్ట్ర ప్రభుత్వాలను ప్రశ్నించింది. అయితే ఆంధ్రప్రదేశ్ లో రుణ మాఫీ ఎలా మారుతుందన్నది ఇప్పుడు చూడాల్సి ఉంటుంది. కోటయ్య కమిటీ తన అద్యయనం ప్రకారం ఎవరికి ఈ పధకం వర్తింప చేయాలన్నది కూడా సూచిస్తుంది. రిజర్వ్ బ్యాంకు లేఖపై అప్పుడే ఆంధ్రప్రదేశ్ ఆర్ధికశాఖ అధికారులు అత్యవసర సమావేశం నిర్వహిస్తున్నారు. మరోవైపు రుణమాఫీపై ఆర్బీఐ చివరిలో ఏదైనా తిరకాసు పెడితే, అప్పుడు ఆ కొత్త ప్లాన్‌ను అమలు చేసేందుకు చంద్రబాబు ప్రభుత్వం రెడీ అవుతున్నారని తెలుస్తోంది.

విజయవాడకి రాబోతున్న సచిన్!

ఆంధ్రప్రదేశ్ క్రికెట్ అభిమానులకు శుభవార్త. ప్రముఖ క్రికెటర్ సచిన్ టెండూల్కర్ విజయవాడకు రాబోతున్నారు. ఆగస్టు 1న సచిన్ విజయవాడకు వస్తారు. ప్రముఖ వ్యాపార సంస్థ విజయవాడలో ఏర్పాటు చేసిన ఒక మాల్ ప్రారంభోత్సవానికి సచిన్ టెండూల్కర్ రాబోతున్నారు. అయితే ఈ వార్త ట్విట్టర్‌లో హల్ చల్ చేస్తోంది. దీనికి సంబంధించి పీవీపీ సంస్థ ఇంతవరకు ఎలాంటి ప్రకటనా చేయలేదు.

ఆంధ్ర, తెలంగాణ మధ్య 8 చెక్‌పోస్టులు

  ఆంధ్రప్రదేశ్ - తెలంగాణ రాష్ట్రాల సరిహద్దుల్లో కొత్తగా ఎనిమిది చెక్పోస్టులు ఏర్పాటు చేస్తున్నారు. ఆంధ్రప్రదేశ్ రాష్ట్రం ఈ చెక్ పోస్టులను ఏర్పాటు చేస్తోంది. ఇప్పటికే రెండు రాష్ట్రాల మధ్య కొన్ని చెక్ పోస్టులు వున్నాయి. ఇప్పుడు ఏర్పాటు చేయబోయే ఎనిమిది చెక్‌ పోస్టులు అదనం. కొత్తగా ఏర్పాటు చేయబోయే చెక్ పోస్టులు కర్నూలు, సున్నిపెంట, మాచర్ల, దాచెపల్లి, గరికపాడు, తిరువూరు, జీడుగుమిల్లి, కొండపల్లిలో వుంటాయి. ఈ విషయాన్ని ఆంధ్రప్రదేశ్ ఆర్థిక మంత్రి యనమల రామకృష్ణుడు తెలిపారు.

58 ఎమ్మెల్సీ స్థానాలు కోరనున్నాం: యనమల

  ఆంధ్రప్రదేశ్‌ రాష్ట్రానికి 58 ఎమ్మెల్సీ స్థానాలు కేటాయించాలని కేంద్రాన్ని కోరనున్నట్టు ఆంధ్రప్రదేశ్ రాష్ట్ర ఆర్థిక శాఖ మంత్రి యనమల రామకృష్ణుడు తెలిపారు. అదేవిధంగా రాష్ట్ర విభజన చట్టంలో వున్న లోపాల గురించి కూడా కేంద్ర హోం శాఖకు ఒక లేఖ రాయబోతున్నట్టు ఆయన చెప్పారు. ఈ అంశంమీద ఇప్పటికే న్యాయ నిపుణులను సంప్రదించామని, వారి సూచన మేరకే కేంద్ర హోం శాఖకు లేఖ రాయబోతున్నామని ఆయన వెల్లడించారు. బిల్లులోని లోపాలను సవరించే బిల్లును ఈ పార్లమెంట్ సమావేశాల్లోనే పార్లమెంటులో పెట్టి ఆమోదం పొందేలా ప్రయత్నాలు చేస్తున్నామని యనమల చెప్పారు.

జానారెడ్డి ఏడుపు చూతము రారండీ!

  తెలంగాణ కాంగ్రెస్ నాయకుడు, తెలంగాణ రాష్ట్ర శాసన సభా పక్ష నేత జానారెడ్డి మనసులో మాట బయటకి చెప్పారు. బుధవారం మీడియా సమావేశం ఏర్పాటు చేసిన ఆయన ఓ ప్రశ్నకు స్పందిస్తూ కాంగ్రెస్ పార్టీకి అధికారమే లేక ఏడుస్తుంటే ఇక ఆధిపత్య పోరు ఎక్కడిదని అన్నారు. తెలంగాణ పీసీసీ అధ్యక్షుడు పొన్నాల లక్ష్మయ్యకి జానారెడ్డికి మధ్య ఆధిపత్య పోరు కొనసాగుతోందని వస్తున్న వార్తల మీద స్పందిస్తూ ఆయన ఇలా అన్నారు. పొన్నాలతో తనకు ఎలాంటి విభేదాలు లేవని, ఆధిపత్య పోరు పుకార్లు కేవలం అపోహలే అన్నారు. తామిద్దరం స్నేహపూర్వకంగా వున్నామని జానారెడ్డి వివరణ ఇచ్చారు. మాట్లాడుకుంటున్నామని చెప్పారు.

ఎరక్కపోయి వెళ్ళి ఇరుక్కుపోయిన రోజా!

  సినీ నటి, వైఎస్సార్ కాంగ్రెస్ పార్టీ చిత్తూరు జిల్లా నగరి ఎమ్మెల్యే రోజా ఎరక్కపోయి ఒక కార్యక్రమానికి వెళ్ళి ఇరుక్కుపోయింది. ఇంతకీ జరిగిందేంటంటే, నగరి మునిసిపల్ కార్యాలయంలో జరిగే ఒక కార్యక్రమానికి రోజా వెళ్ళింది. అప్పటికే అక్కడ తెలుగుదేశం, వైసీపీ మునిసిపల్ కౌన్సిలర్లు ఏదో అంశం మీద ఆందోళన కార్యక్రమం, ధర్నా నిర్వహిస్తున్నారు. ఈ సమయంలోనే అక్కడకి వెళ్ళిన రోజాని కొంతమంది కౌన్సిలర్లు నిర్బంధించారు. దాంతో రోజా ఎరక్కపోయి వచ్చి ఇరుక్కుపోయాను దేవుడా అనుకున్నారు. ఆ తర్వాత శాంతించిన కౌన్సిలర్లు రోజాని విడిచిపెట్టేశార్లెండి.

చనిపోయింది.. బతికింది.. మళ్ళీ అంతలోనే...

  ఫిలిప్పీన్స్‌లో ఒక విచిత్రకరమైన, విషాదకరమైన సంఘటన జరిగింది. విష జ్వరం కారణంగా మరణించిన మూడేళ్ళ బాలికకు అంత్యక్రియలు నిర్వహిస్తూ వుండగా, బాలిక శవాన్ని శవపేటికలో పెట్టే సమయంలో పాపలో కదలికలు కనిపించాయి. ఆశ్చర్యపోయిన అందరూ పాపని ఆస్పత్రికి తీసుకువెళ్ళడంతో బతికింది. చనిపోయిందని అనుకున్న తమ పాప బతకడంతో ఆ తల్లిందండ్రులు ఎంతో సంతోషించారు. చుట్టుపక్కల ప్రాంతాల జనం కూడా చనిపోయి బతికిన పాపని చూడటానికి తండోపతండాలుగా వచ్చారు. అయితే కూతురు తిరిగి బతికిన ఆనందం ఆ తల్లిదండ్రులకు రెండు రోజులు కూడా మిగల్లేదు. ఆ పాప మళ్ళీ కోమాలోకి వెళ్ళి మరణించింది. గతంలో మాదిరిగా తమ పాప తిరిగి లేస్తుందేమోనని ఎదురుచూసిన తల్లిదండ్రులకు నిరాశే ఎదురైంది. దాంతో తల్లిదండ్రులు కన్నీరు మున్నీరవుతూ ఆ పాపకి అంత్యక్రియలు నిర్వహించారు.

కిరణ్ పై రాజయ్యకు ఎందుకు అంత కోపం?

  తెలంగాణ ఉప ముఖ్యమంత్రి డాక్టర్ రాజయ్య మాజీ సీఎం కిరణ్ కుమార్ రెడ్డి ఫోటో చూడగానే ఆవేశంగా వూగిపోయిన తీరుపై రాజకీయవర్గాలలో ఆసక్తికరమైన చర్చలు నడుస్తున్నాయి. అసలేం జరిగిందంటే, తెలంగాణ ఉప ముఖ్యమంత్రి డాక్టర్ రాజయ్య మహబూబ్ నగర్ జిల్లాలోని నాగర్ కర్నూల్ ప్రభుత్వ ఆస్పత్రిలో అధికారిక కార్యక్రమంలో పాల్గొనడానికి వెళ్ళారు. అక్కడ ఆయనకి ఆస్పత్రి గోడ మీద మాజీ ముఖ్యమంత్రి కిరణ్ కుమార్ రెడ్డి ఫొటో కనిపించింది. దానిని గోడ మీద నుంచి లాగి పరపరా చింపేశారు. అసలు ఉప ముఖ్యమంత్రి హోదాలో ఉన్న వ్యక్తి ఒక ఫోటోని తానే చించాల్సిన అవసరం ఏముంది? ఇక్కడే అసలు విషయం వుందట..! గతంలో కాంగ్రెస్ పార్టీలో రాజయ్య వున్నప్పుడు వై.ఎస్.రాజశేఖరరెడ్డి సన్నిహితుడిగా, జగన్ వర్గంలో వుండేవారు. ఆతరువాత జరిగిన పరిణామాల వల్ల ఆయన టీఆర్ఎస్ పార్టీ చేరారు. ఆ కాలంలో ముఖ్యమంత్రిగా వున్న కిరణ్ కుమార్ రెడ్డి ఆయనపై కొంత ఇబ్బంది పెట్టారని అంటున్నారు.  ఇప్పుడు రాజయ్య అధికారంలో వున్నారు కాబట్టి కిరణ్ పైన బదులు తీర్చుకోవడానికి అవకాశం కోసం ఎదురుచూస్తున్న ఆయనకి నిన్న తెలంగాణ ఆస్పత్రి గోడ మీద కిరణ్  ఫొటో చూసేసరికి కోపం కట్టలు తెంచుకుంది. దీంతో ఆగ్రహంతో ఊగిపోతూ కిరణ్ కుమార్ రెడ్డి ఫొటోని గోడ మీద నుంచి లాగి పరపరా చింపేశారు. అప్పటిగానీ ఆయన ఆవేశం తగ్గలేదు.

మాట తప్పను-రుణమాఫీ చేస్తా: చంద్రబాబు

  తాను ఎట్టి పరిస్థితుల్లోనూ మాట తప్పే వ్యక్తిని కానని, రైతుల రుణాలను తప్పకుండా మాఫీ చేస్తానని ఆంధ్రప్రదేశ్ ముఖ్యమంత్రి నారా చంద్రబాబు నాయుడు అన్నారు. రైతు రుణ మాఫీ విషయంలో తాను బుధవారం కూడా రిజర్వ్ బ్యాంక్ గవర్నర్‌తో మాట్లాడానని, రుణ మాఫీ విషయంలో ఏవైనా సమస్యలుంటే ముందుగా రుణాలను రీ షెడ్యూలు చేయాలని అభ్యర్థించానని చంద్రబాబు చెప్పారు. ఈ విషయంలో కొద్ది రోజుల్లో స్పష్టత వచ్చే అవకాశం వుందని ఆయన తెలిపారు.