జూనియర్ ఎన్టీఆర్ తండ్రయ్యాడు: జాతకచక్రం ఇదిగో..!
యువ కథానాయకుడు జూనియర్ ఎన్టీఆర్, టాలీవుడ్ స్టార్ జూనియర్ ఎన్టీఆర్, లక్ష్మీ ప్రణతి దంపతులకు మంగళవారం ఉదయం 11 గంటలకు పండంటి మగపిల్లాడు పుట్టాడు. హైదరాబాద్లోని రెయిన్ బో హాస్పిటల్లో జూనియర్ ఎన్టీఆర్కి పుత్రోదయం అయింది. జూనియర్ ఎన్టీఆర్ కొడుకు జాతక చక్రాన్ని పరిశీలించిన జ్యోతిషులు తండ్రికి తగ్గ కొడుకు పుట్టాడని, నందమూరి వారి నూతన వారసుడు వంశం పేరును నిలబెట్టేవాడు, వంశ ప్రతిష్టను ముందుకు తీసుకెళ్ళేవాడు అవుతాడని చెబుతున్నారు. జ్యోతిషుల అభిప్రాయం ప్రకారం... నందమూరి బుజ్జోడు రోహిణీ నక్షత్రంలో, కన్యాలగ్నం, వృషభరాశిలో, చంద్రమహాదశలో పుట్టాడు. ఈ ముహూర్తంలో పుట్టినవాళ్ళు చాలా అందంగా వుంటారు. మంగళవారం నాడు పుట్టాడు కాబట్టి నందమూరి వంశానికి అలంకారమైన ఆవేశంతోపాటు మంచి ఆశయాలు కూడా కలిగి వుంటాడు. దూకుడును ప్రదర్శించే మంచి శక్తివంతుడు అవుతాడు. ఏదైనా అనుకుంటే సాధించే పట్టుదల కలిగినవాడు అవుతాడు. అలాగే రోహిణీ నక్షత్రంలో పుట్టాడు కాబట్టి ధర్మచింతన వుంటుంది. మంచి లౌక్యం కలిగి వుంటాడు. ఎలాంటి పరిస్థితులు ఎదురైనా నెగ్గుకొచ్చే చాతుర్యం కలిగి వుంటాడు. ఏ రంగంలో అయినా తన ఆధిక్యత నిలుపుకుంటాడు. ఈ జాతకుడికి సాహస క్రీడల పట్ల మక్కువ వుంటుంది. కళారంగంలో మంచి ప్రావీణ్యం, అభినివేశం వుంటాయి. కళారంగంలో మంచి పేరు ప్రఖ్యాతులు పొందుతారు. జూనియర్ ఎన్టీఆర్ కొడుకు జాతకం విషయంలో జ్యోతిషులు వ్యక్తం చేసిన అభిప్రాయాలు చూస్తుంటే, రాబోయే రోజుల్లో కాబోయే స్టార్ పుట్టాడని భావించవచ్చు.