బెల్ షేప్ నుండి యాపిల్ షేప్ వరకు.. శరీర ఆకృతికి సరైన చీరను ఎలా ఎంచుకోవాలో తెలుసా! చీర కట్టు మహిళలను ఎంతో హుందాగా చూపిస్తాయి.  ముఖ్యంగా భారతీయుల చీరకట్టు విదేశీయులను సైతం మెప్పిస్తుంది. మిగతా డ్రస్సుల లాగా చీరలను పెద్దగా ఎంచుకోవాల్సిన అవసరం లేదని,  ఏ చీర అయినా బాగుంటుందని అనుకుంటారు. కానీ శరీర ఆకృతికి తగ్గట్టు కూడా చీర ఎంచుకోవడం ముఖ్యమని అంటున్నారు ఫ్యాషన్ నిపుణులు. కొందరు ఆన్‌లైన్‌లో చూసి  అందమైన చీరలు కొంటూ ఉంటారు.  కానీ కొన్నిసార్లు అది మోడల్ ధరించిన దానిలా  కనిపించదు. ఆ చీర మనకు బాగా కనిపించడం లేదని చాలా మంది అనుకుంటారు. కానీ  చీర ఫ్యాబ్రిక్,   దానిని ధరించే విధానం. కట్టుకునే శైలి బాగా కనిపించేలా చేస్తాయట.  శరీరం A లైన్ లో,  BELL షేప్ లో.. APPLE షేప్ లో.. ఇలా చాలా రకాల షేప్ లలో ఉంటుంది. శరీర ఆకృతికి తగినట్టు చీర ఫ్యాబ్రిక్,  చీర కట్టుకునే విధానం ఉండాలని చెబుతారు, దీన్ని ఎలా ఎంచుకోవాలో తెలుసుకుంటే.. బెల్ షేప్.. శరీరాకృతి గంట ఆకారంలో ఉంటే, అంటే  భుజాలు, తుంటి దాదాపు సమానంగా ఉండి, నడుము స్పష్టంగా కనిపిస్తే, షిఫాన్, జార్జెట్, క్రేప్ మరియు తేలికపాటి శాటిన్ వంటి వదులుగా ఉండే వస్త్రాలు బాగా సరిపోతాయి. ఈ వస్త్రాలు మీ శరీరం యొక్క సహజ వంపులను అందంగా కనిపించేలా చేస్తాయి. పియర్ షేప్.. పియర్ ఆకారపు శరీరానికి పైభాగం సాపేక్షంగా పొట్టిగా, తుంటి వెడల్పుగా ఉంటుంది. జార్జెట్, షిఫాన్ మరియు మృదువైన మైసూర్ సిల్క్ వంటి చీరలను ఇాలాంటి షేప్ ఉన్నవారు ఎంచుకోవాలి.  మందపాటి పల్లు, జరీ వర్క్ లేదా ప్రస్ఫుటమైన ప్రింట్లు పైభాగానికి మరింత బాలెన్స్డ్  రూపాన్ని ఇవ్వడానికి సహాయపడతాయి. ఆపిల్ షేప్.. ఆపిల్ ఆకారపు శరీరం ఉన్న మహిళలకు నడుము భాగం , వక్షోజాలు నిండుగా ఉంటాయి. మృదువైన టస్సర్ సిల్క్, తేలికైన కంజీవరం మరియు క్రేప్ వస్త్రాలు వారికి మంచి ఎంపికలు. పల్లును తెరిచి ఉంచడం వల్ల శరీరాకృతి పొడవుగా , మరింత సమతుల్యంగా కనిపిస్తుంది. అథ్లెటిక్ షేప్..  నడుము, ఛాతీ , తుంటి వెడల్పు సుమారుగా సమానంగా ఉంటే దాన్ని అథ్లెటిక్ షేప్ లేదా రెక్టాంగిల్ షేప్ అని అంటారు.  ఇలాంటివారు ఆర్గాంజా, టిష్యూ సిల్క్, లినెన్ , బనారసి బ్రోకేడ్ వంటి చీరలను ధరించవచ్చు. ఈ వస్త్రాలు అదనపు వాల్యూమ్‌ను సృష్టించి, వంపులు ఉన్నట్లుగా కనిపించేలా చేస్తాయి. V-షేప్.. తలక్రిందుల త్రిభుజాకార శరీర ఆకృతికి వెడల్పాటి భుజాలు , సాపేక్షంగా సన్నని తుంటి ఉంటాయి. బనారసి సిల్క్, రా సిల్క్ , స్ట్రక్చర్డ్ కంజీవరం చీరలు ఈ శరీర ఆకృతికి ఖచ్చితంగా సరిపోతాయి. స్ట్రెయిట్ పల్లు స్టైల్ నడుము కింది భాగాన్ని సమతుల్యం చేయడానికి సహాయపడుతుంది. ఇది ముఖ్యం.. చీర అందం కేవలం దాని డిజైన్‌లోనే కాదు, అది  శరీరాకృతికి ఎంత చక్కగా సరిపోతుందనే దానిలో కూడా ఉంటుంది. సరైన వస్త్రాన్ని, కట్టుకునే శైలిని ఎంచుకోవడం ద్వారా,  ఏ చీరలోనైనా ఆకర్షణీయంగా, ఆత్మవిశ్వాసంతో కనిపించవచ్చు.                                    *రూపశ్రీ

వర్షం నీరు జుట్టుకు హాని చేస్తుందా.. అసలు నిజాలు ఇవీ! వేసవిలో ఎండలు బాగా ఇబ్బంది పెట్టిన తర్వాత వచ్చే వర్షాకాలం చాలా ఊరట ఇస్తుంది. చాలామంది వర్షంలో తడవడాన్ని ఇష్టపడతారు కూడా. కానీ అమ్మాయిలు వర్షానికి భయపడతారు. చాలామంది వర్షంలో  తడిస్తే హెయిర్ ఫాల్ అవుతుందని, డాండ్రఫ్ వస్తుందని అనుకుంటారు. ఈ కారణాలతోనే వర్షం అంటే ఇష్టం ఉన్నా వర్షంలో తడవడానికి భయపడతారు. పైగా వర్షంలో తడిస్తే వెంటనే ఇంటికి వచ్చి మళ్లీ తలస్నానం చేయాలని కూడా అంటుంటారు. కానీ ఇవన్నీ నిజమేనా? వర్షం గురించి ఉన్న అపోహలు, వాస్తవాలు ఏమిటో తెలుసుకుంటే.. వర్షంలో తడిస్తే జుట్టు రాలుతుందా? వర్షపు నీరు మాత్రమే జుట్టు రాలడానికి ప్రత్యక్ష కారణం కాదని అంటున్నారు నిపుణులు.  ఒత్తిడి, పోషకాహార లోపాలు, హార్మోన్ల మార్పులు, జన్యుపరమైన కారణాలు , కొన్ని ఆరోగ్య సమస్యలు కూడా జుట్టు రాలడానికి కారణం కావచ్చు. తల చర్మం ఎక్కువసేపు తడిగా ఉన్నా లేదా తల చర్మాన్ని శుభ్రంగా ఉంచుకోకపోయినా జుట్టు రాలే సమస్య పెరుగుతుందట. తొలకరి జల్లులు ఎక్కువ నష్టం కలిగిస్తాయా? వేసవి కాలం కారణంగా చాలా కాలం తర్వాత పడే వర్షాలను తొలకరి జల్లులు అంటారు. చాలాకాలం పొడి వాతావరణం తర్వాత కురిసే తొలినాళ్ల వర్షాలు వాతావరణంలోని దుమ్ము, కాలుష్య కారకాలను కిందకు తీసుకుని వచ్చే అవకాశం ఉంటుంది.  అలాంటి తొలి వర్షంలో ఎక్కువ సేపు తడవకుండా ఉండటం హెయిర్ కేర్ విషయంలో ఒక మంచి జాగ్రత్త. అయితే, ప్రతీ తొలి వర్షం ఒకేలా ఉండదు.  స్థానిక కాలుష్యం, వాతావరణ పరిస్థితులపై కూడా ఆధారపడి ఉంటుంది. వర్షంలో తడిచిన తర్వాత జుట్టు కడుక్కోవడం అవసరమా?  కలుషితమైన గాలిలో పడిన వర్షం లో తడిస్తే.. జుట్టును తేలికపాటి షాంపూతో లేదా  శుభ్రమైన నీటితో కడుక్కోవడం చాలామంచిది.  ఇది దుమ్ము, ధూళి , ఇతర కణాలను తొలగించడానికి సహాయపడుతుంది. ఎక్కువగా షాంపూ చేయడం , లేదా పదే పదే తలకు షాంపూ  చేసుకోవడం  కూడా జుట్టును పొడిబారేలా చేస్తుంది. వర్షపు నీరు జుట్టును పొడిగా మారుస్తుందా? వర్షపు నీరు జుట్టును పొడిగా మార్చడం అందరి విషయంలో జరగదు.  జుట్టు ఇప్పటికే  పొడిగా ఉన్నా,  జుట్టుకు ఎలాంటి ప్రోడక్ట్ వాడుతున్నారనే విషయం మీద, వర్షం తర్వాత హెయిర్ ను ఏ విధంగా కేర్ తీసుకుంటారు అనే దాని మీద ఆధారపడి ఉంటుంది. అవసరమైతే తేలికపాటి కండీషనర్ లేదా సీరమ్ ఉపయోగించవచ్చు. తడి జుట్టుకు మళ్లీ షాంపూ చేయవచ్చా? తడి జుట్టును ఎక్కువసేపు కట్టి ఉంచడం వల్ల తల చర్మంలో తేమ నిలిచి ఉంటుంది. దీనివల్ల దురద, దుర్వాసన లేదా ఫంగల్ ఇన్ఫెక్షన్ వచ్చే ప్రమాదం పెరగవచ్చు.  ముందుగా జుట్టును పూర్తిగా ఆరబెట్టుకోవడం మంచిది. వర్షంలో తడిశాక హెయిర్ కేర్ ఎలా ఉండాలి? వర్షంలో తడిశాక  ఇంటికి చేరుకున్న వెంటనే  జుట్టును శుభ్రమైన నీటితో కడుక్కోవాలి.  టవల్‌తో మెల్లగా అద్దాలి, అంతే తప్ప , గట్టిగా రుద్దకూడదు.  హెయిర్ డ్రైయర్ ఉపయోగిస్తే ఉష్ణోగ్రతను తక్కువగా ఉంచాలి. తడి జుట్టును బలంగా దువ్వకూడదు.  తల చర్మాన్ని ఎక్కువ సేపు తడిగా ఉంచకూడదు.  అవసరమైతే  వారానికి ఒకసారి డీప్ కండిషనింగ్ చేయాలి. వీళ్లకు జాగ్రత్త తప్పనిసరి.. తల చర్మం జిడ్డుగా ఉండేవారు,  ఇప్పటికే చుండ్రు ఉన్నవారు,  తల చర్మం సున్నితంగా ఉన్నవారు. తరచుగా ఫంగల్ ఇన్ఫెక్షన్లకు గురయ్యే వ్యక్తులు, జుట్టుకకు ఎక్కువ రసాయన ఉత్పత్తులు వాడేవారు వర్షంలో తడిసిన తరువాత జుట్టు విషయంలో చాలా జాగ్రత్తలు తీసుకోవాలి.                                   *రూపశ్రీ.

చిన్నవయసులోనే ఆడపిల్లలకు మెచ్యురిటీ.. దీని పర్యవసానాలు ఏంటి తెలుసా! ప్రతి ఆడపిల్ల ఒక వయసుకు వచ్చాక  ఋతుచక్రంలోకి అడుగు పెట్టడం సహజం.  ఆడపిల్లలలో  ఒకసారి ఋతుచక్రం మొదలైతే  మెనోపాజ్ దశకు చేరేవరకు ప్రతి నెలా నెలసరిని ఎదుర్కుంటుంది. కొన్నేళ్ళ కిందటితో పోలిస్తే నేటికాలంలో ఆడపిల్లలు చాలా చిన్న వయసులో మెచ్యురిటీ అవుతున్నారు.  గతంలో 14, 15 ఏళ్ల వయసులో మెచ్యురిటీ అయ్యేవారు.. కానీ నేటికాలంలో చాలామంది ఆడపిల్లలు 10 ఏళ్లకే మెచ్యురిటీ అవుతున్నారు.  చిన్న వయసులో మెచ్యురిటీ కావడం పెద్దగా సమస్య ఏముంటుందిలే అని తల్లిదండ్రులు కూడా అనుకుంటారు. పైగా ఇది ప్రకృతి సిద్దమైన చర్య కావడం వల్ల దీని గురించి ఎక్కువగా ఆలోచించరు కూడా. కానీ చిన్న వయసులోనే మెచ్యురిటీ అవ్వడం వల్ల ఆడపిల్లలలో ఎదురయ్యే సమస్యలు కొన్ని ఉన్నాయి. అలాగే పిల్లలు చిన్న వయసులోనే మెచ్యురిటీ కాకుండా.. ఒక నిర్ణీత వయసు వచ్చాక మెచ్యురిటీ కావడానికి ఎలాంటి జాగ్రత్తలు తీసుకోవాలి? తెలుసుకుంటే.. చిన్న వయసులో మెచ్యురిటీ ఇందుకే.. చిన్న వయసులోనే పిల్లలు మెచ్యురిటీ కావడానికి చాలా కారణాలు ఉన్నాయి.  అధిక బరువు పిల్లలను చాలా ప్రభావితం చేస్తుంది. అలాగే ఎక్కువ స్ట్రెస్ కూడా పిల్లలు చిన్న వయసులో మెచ్యురిటీ కావడానికి కారణం అవుతుంది.   మార్కులు, ర్యాంకుల వంటివి పిల్లలను ఒత్తిడికి గురి చేస్తాయి. ఇది ఆడపిల్లలలో చిన్నతనంలో మెచ్యురిటీ కావడానికి కారణం అవుతుంది. అలాగే నేటికాలంలో జంక్ ఫుడ్ కూడా చాలా దారుణంగా తింటుంటారు. పిల్లలు జంక్ ఫుడ్ తినడాన్నే ఎక్కువ ఇష్టపడతారు. ఈ కారణంగా కూడా పిల్లలు చిన్నతనంలో మెచ్యురిటీ కావడానికి కారణం అవుతుంది. ఇవన్నీ కలిసి  పిల్లలు చిన్న వయసులో మెచ్యురిటీ కావడానికి దారి తీస్తాయి. చిన్న వయసులో మెచ్యురిటీ అయితే ఎదురయ్యే సమస్యలు.. పిల్లలు చిన్న వయసులో మెచ్యురిటీ అవ్వడం వల్ల పిల్లల ఎదుగుదలలో సమస్యలు ఏర్పడతాయి.  ప్రతి నెలా పీరియడ్స్ రావడం వల్ల  పిల్లలలో ఎముకల ఎదుగుదల నెమ్మదించి, క్రమంగా తగ్గిపోతుంది. దీని వల్ల ఆడపిల్లలు ఎత్తు పెరగరు.  తల్లిదండ్రులు బాగా ఎత్తు ఉన్న వారైనా సరే.. ఈ కారణాల వల్ల ఆడపిల్లల ఎత్తు పెరగరు. పీరియడ్స్ కారణంగా పిల్లలలో శారీరక, మానసిక మార్పులు చోటు చేసుకుంటాయి.  వీటి కారణంగా పిల్లలు చాలా ఒత్తిడికి గురవుతారు. వారు  తమ బాల్యాన్ని,  తమ చదువును కూడా శ్రద్దగా అనుభూతి చెందలేరు. చిన్నతనంలో మెచ్యురిటీ కాకుండా ఉండటానికి  జాగ్రత్తలు.. ఆడపిల్లలు ఉన్న తల్లిదండ్రులు తమ పిల్లల విషయంలో చాలా జాగ్రత్తగా ఉండాలి. హార్మోన్స్ ను డిస్టర్బ్ చేసే కెమికల్స్ పట్ల జాగ్రత్తగా ఉండాలి. ముఖ్యంగా ప్లాస్టిక్ బాటిల్స్,  కంటైనర్స్, కాస్మెటిక్ ప్రోడక్ట్స్, క్రీములు, ,పౌడర్లు,  నెయిల్ పాలిష్ వంటివి ఆడపిల్లలకు ఒక వయసు వరకు దూరంగా ఉంచడం మంచిది. అలాగే పెస్టిసైడ్స్ ను ఉపయోగించి పండించిన ఆహారాలు కూడా పిల్లల హార్మోన్స్ ను చాలా డిస్టర్బ్ చేస్తాయ్. పిల్లలకు మంచి ఆహారం ఇవ్వాలి. రోజులో కనీసం 8 గంటలు నిద్ర ఉండేలా చూడాలి. రోజూ కాసేపు వ్యాయామం చేయగలిగేలా పిల్లలను ప్రోత్సహించాలి. టీవీ,  కంప్యూటర్,  స్మార్ట్ ఫోన్ వంటి వాటికి ఎక్కువ సమయం వెచ్చించకుండా పిల్లలకు టైమ్ సెట్ చేయాలి. ఇవన్నీ ఫాలో అయితే పిల్లలు చాలా చిన్న వయసులో మెచ్యురిటీ కావడాన్ని నివారించవచ్చు.                               *రూపశ్రీ.

ప్రెగ్నెన్సీ వచ్చిన మొదట్లో బొప్పాయి, పైనాపిల్ తింటే అబార్షన్ ఎందుకు అవుతుందో తెలుసా! గర్భం దాల్చడం అనేది వివాహం అయిన ప్రతి మహిళ కల.  తల్లిని కావాలని, మాతృత్వాన్ని ఆస్వాదించాలని మహిళలు ఎన్నో కలలు కంటారు. గర్బం దాల్చిన తర్వాత కూడా చాలా జాగ్రత్తలు తీసుకుంటారు. మహిళలు గర్బం దాల్చిన తర్వాత కొన్ని ఆహారాలు తినకూడదని చెబుతుంటారు. వాటిలో బొప్పాయి,  పైనాపిల్ కూడా ఉంటాయి. మరీ ముఖ్యంగా గర్బం దాల్చిన మొదటి నెలల్లో పైనాపిల్, బొప్పాయి తినకూడదని, ఒకవేళ అవి తింటే అబార్షన్ లు అవుతాయని చెబుతారు.  ఇలా ఎందుకు జరుగుతుందనే విషయం చాలా మందికి తెలియదు. దీని గురించి వివరంగా తెలుుకుంటే.. బొప్పాయి ఇలా ఉంటే తినకూడదు.. పచ్చిగా లేదా సగం పండిన బొప్పాయి తినడం మంచిది కాదు. పచ్చి బొప్పాయిలో లేటెక్స్ , పాపైన్ వంటి సమ్మేళనాలు అధిక మొత్తంలో ఉంటాయి. కొన్ని పరిశోధనలు , ప్రయోగశాల అధ్యయనాలు ఈ సమ్మేళనాలు గర్భాశయాన్ని ఉత్తేజపరుస్తాయని ఫలితాలు ఇచ్చాయి.  ఈ కారణంగా  గర్భధారణ సమయంలో పచ్చి బొప్పాయి, లేదా సగం పండిన బొప్పాయి ప్రమాదకరమైనవిగా పరిగణించబడతాయి. ఈ సమ్మేళనాలు గర్భాశయ సంకోచాలను పెంచుతాయని చెబుతారు, అందువల్ల, గర్భం దాల్చిన తొలినాళ్లలో పచ్చి బొప్పాయిని తినకుండా ఉండమని సలహా ఇస్తారు. ఈ కారణంగానే పచ్చి లేదా ఆకుపచ్చ బొప్పాయిని గర్భిణీ స్త్రీలకు సురక్షితం కాదని చెబుతారు. పండిన బొప్పాయి.. పూర్తిగా పండిన బొప్పాయి భిన్నంగా ఉంటుంది. పండిన బొప్పాయిలో పాలు (లేటెక్స్) గణనీయంగా తగ్గి ఉంటాయి , ఇందులో విటమిన్ సి, ఫోలేట్, ఫైబర్, ఇతర పోషకాలు కూడా ఉంటాయి. అందువల్ల, గర్భిణీ స్త్రీలు పండిన బొప్పాయిని మితంగా తీసుకోవడం ప్రమాదకరం కాదని కొంతమంది నిపుణులు చెబుతారు. అయితే వీటి గురించి పరిశోధకులు ఎలాంటి సమాచారం ఇవ్వలేదు  అందుకే పండిన బొప్పాయి అయినా చాలా మితంగా తీసుకోవడం మంచిదని చెబుతారు. పైనాపిల్.. పైనాపిల్ తింటే గర్భస్రావం అవుతుందనే మాటలు  తరచుగా చెబుతుంటారు. పైనాపిల్‌లో ఉండే బ్రోమెలైన్ అనే ఎంజైమ్ దీనికి కారణం. ఇది గర్భాశయ ముఖద్వారాన్ని మృదువుగా చేసి, గర్భాశయంపై ప్రభావం చూపుతుందని చెబుతారు. అయితే, మితమైన మోతాదులో పైనాపిల్ తినడం వల్ల గర్భస్రావం జరుగుతుందనడానికి బలమైన శాస్త్రీయ ఆధారాలు లేవు. దీనిని అధిక మోతాదులో తీసుకున్నప్పుడు లేదా శరీరం ఇప్పటికే సెన్సిటివ్ గా ఉన్నప్పుడు  సమస్యలు తలెత్తుతాయని చెబుతారు. అందుకే గర్భధారణ తొలినాళ్లలో బొప్పాయి, పైనాపిల్‌లను తినకూడదని, వీటి విషయంలో నిర్లక్ష్యంగా ఉండకూడదని చెబుతారు.  ముఖ్యంగా మహిళలకు గర్బం విషయంలో ప్రమాదాలు ఉన్నా,   గతంలో గర్భస్రావం జరిగి ఉన్నా, రక్తస్రావ సమస్యలు ఉన్నా ఆహారం విషయంలో ప్రత్యేక జాగ్రత్తలు పాటించమని డాక్టర్ సలహా ఇస్తారు. ముఖ్యంగా పండ్లు తినే ముందు వైద్యుల సలహా తీసుకోమని చెబుతున్నారు.                           *రూపశ్రీ.

కేవలం వ్యాయామం మాత్రమే కాదు.. ఈ అలవాట్లు కూడా ఫాలో అయితేనే పొట్ట కొవ్వు తగ్గుతుంది! ఎక్కువ సేపు కూర్చోవడం, వేయించిన ఆహారం ఎక్కువగా తినడం పొట్టకొవ్వు సమస్య వస్తుంది.  నేటి కాలంలో   పొట్ట కొవ్వు సమస్య చాలా సాధారణ సమస్యగా మారింది. ఆడవారికి అయినా, మగవారికి అయినా, కనీసం ఇంకా పెళ్లి కాని అమ్మాయిలు, అబ్బాయిలు కూడా ఈ సమస్యతో ఇబ్బంది పడుతున్నారు.  పొట్ట కొవ్వు సమస్య తగ్గించుకోవడం కోసం, ఫ్లాట్ గా ఉన్న పొట్ట కోసం చాలామంది జిమ్‌లో గంటల తరబడి చెమటోడుస్తారు, కానీ పొట్టకొవ్వు కరగడానికి కేవలం వ్యాయామం మాత్రమే సరిపోదు. పొట్ట కొవ్వును తగ్గించుకోవడానికి కొన్ని జీవనశైలి మార్పులు చేసుకోవాలి.  పొట్ట కొవ్వును తగ్గించడంలో బాగా సహాయపడే కొన్ని చిన్న మార్పులు, అలవాట్ల గురించి తెలుసుకుంటే.. ఆహారం.. సమతుల్యమైన , తేలికపాటి ఆహారం తీసుకోవాలి. పొట్ట కొవ్వును తగ్గించుకోవడానికి, ముందుగా  ఆహారంపై దృష్టి పెట్టాలి. వేయించిన , ప్రాసెస్ చేసిన ఆహారాలకు దూరంగా ఉండాలి. ఓట్స్, పెరుగు, గుడ్లు లేదా సలాడ్ వంటి తేలికపాటి, ప్రోటీన్ అధికంగా ఉండే అల్పాహారంతో  రోజును ప్రారంభించాలి. కొద్దికొద్దిగా భోజనం చేయడం వల్ల  జీవక్రియ సక్రమంగా జరిగి, కడుపు భారంగా అనిపించదు. స్వీట్స్, రిఫైండ్ పండి పదార్థాలు.. చక్కెర , శుద్ధి చేసిన పిండిపదార్థాలను తగ్గించాలి. స్వీట్లు, జంక్ ఫుడ్,  బ్రెడ్, కేకులు, కుకీలు, శీతల పానీయాలు వంటి శుద్ధి చేసిన పిండిపదార్థాలు పొట్ట కొవ్వు పెరగడానికి కారణం అవుతాయి.  వీటిని పరిమితం చేసి, బ్రౌన్ రైస్, క్వినోవా, ఓట్‌మీల్, తాజా పండ్లు వంటి ఆరోగ్యకరమైన ప్రత్యామ్నాయాలను ఎంచుకోవాలి. ప్రోటీన్.. ప్రోటీన్‌పై దృష్టి పెట్టాలి. ప్రోటీన్ కండరాలను కాపాడుకోవడానికి , ఆకలిని నియంత్రించడానికి సహాయపడుతుంది.  ఆహారంలో గుడ్లు, పప్పులు, పన్నీర్, చికెన్ లేదా జున్నును చేర్చుకోవాలి. ఇది పొట్ట కొవ్వును తగ్గించడమే కాకుండా ,  ఎక్కువసేపు కడుపు నిండుగా ఉంచుతుంది. నీరు.. శరీరంలో నీటి శాతం పెరగడం జీవక్రియను మెరుగుపరుస్తుంది , ఆకలిని నియంత్రించడంలో సహాయపడుతుంది. కాబట్టి, రోజంతా 2-3 లీటర్ల నీటిని త్రాగాలి. భోజనానికి 20-30 నిమిషాల ముందు నీరు త్రాగడం కూడా సహాయపడుతుంది. ఫైబర్.. ఫైబర్ జీర్ణక్రియను మెరుగుపరుస్తుంది , పొట్ట కొవ్వును తగ్గించడంలో సహాయపడుతుంది.  ఆహారంలో ఆకు కూరలు, పండ్లు, ఓట్స్ , తృణధాన్యాలు వంటి ఫైబర్ అధికంగా ఉండే ఆహారాలను చేర్చుకోవాలి. నిద్ర..  నిద్రలేమి పొట్ట చుట్టూ కొవ్వును పెంచుతుంది. నిద్ర సరిపోనప్పుడు, శరీరంలో ఒత్తిడి హార్మోన్లు పెరిగి, బరువు పెరగడానికి దారితీస్తాయి. ప్రతిరోజూ 7-8 గంటల నిద్రపోవడం చాలా ముఖ్యం. ఒత్తిడి.. అధిక ఒత్తిడి పొట్ట చుట్టూ కొవ్వు పేరుకుపోవడానికి దోహదపడుతుంది. ధ్యానం, దీర్ఘ శ్వాస, లేదా పచ్చని ప్రదేశాలలో సమయం గడపడం వంటివి ఒత్తిడిని తగ్గించుకోవడానికి సులభమైన మార్గాలు. శారీరక శ్రమ.. క్రంచెస్ లేదా కార్డియో చేయలేకపోయినా, లైట్ గా శారీరక శ్రమ చేయడం పొట్ట కొవ్వును తగ్గించడంలో సహాయపడుతుంది. రోజుకు 20-30 నిమిషాలు చురుకుగా నడవడం, మెట్లు ఎక్కడం, ఇంటి పనులు చేసుకోవడం లేదా కొన్ని స్ట్రెచింగ్ వ్యాయామాలు చేయడం కూడా కొవ్వును తగ్గించడంలో సహాయపడతాయి.                              *రూపశ్రీ.

పసిపిల్లల విసుగు పుట్టించే ప్రవర్తనతో విసిగిపోతున్నారా..ఈ షాకింగ్ నిజాలు తెలుసా! పిల్లలను పెంచడం ఎంత ఛాలెంజెస్ తో  కూడుకున్నదో, అంతే అందమైనది కూడా. ముఖ్యంగా ఇంట్లో పసిపిల్లలు, అంటే 1 నుండి 3 సంవత్సరాల వయస్సు గల పిల్లలు ఉన్నప్పుడు, వారి కొన్ని అలవాట్ల వల్ల తల్లిదండ్రులు తరచుగా ఇబ్బంది పడుతుంటారు. ప్రతిదానికీ 'వద్దు' అని చెప్పడం, చిన్న విషయాలకే ఏడవడం లేదా కోపగించుకోవడం, ఆహారాన్ని పారేయడం వంటి పనులు చేస్తుంటారు. తమ పిల్లలు ఇలా ఎందుకు చేస్తున్నారని తల్లిదండ్రులను ఆలోచించేలా చేస్తాయి. కానీ చిన్న పిల్లల వైద్య  నిపుణులు ఈ ప్రవర్తన చాలా వరకు సాధారణమైనవేనని, ఇవి పిల్లల ఎదుగుదలలో ఒక సహజమైన భాగమని అంటున్నారు. దీని గురించి మరింత వివరంగా తెలుసుకుంటే.. పిల్లలు అన్నింటికి వద్దని చెబుతుంటే.. పిల్లలు ప్రతిదానికీ 'కాదు' అని చెబితే, అది మొండితనం  లేదా పెద్దల మాట వినడం లేదని అనుకోవడం కాదని చిన్న పిల్లల వైద్యులు చెబుతున్నారు.  నిజానికి అది  పిల్లలు తమకంటూ ఒక స్వతంత్ర గుర్తింపును ఏర్పరచుకోవడం నేర్చుకుంటున్నారనడానికి ఒక సంకేతమట. ఈ వయస్సులో, పిల్లలు తమకు తమ సొంత ఇష్టాలు, అభిప్రాయాలు ఉండవచ్చని అర్థం చేసుకోవడం ప్రారంభిస్తారట. 'కాదు' అని చెప్పడమనేది వారు తమ నిర్ణయాలను వ్యక్తపరిచే ఒక మార్గంగా మారుతుందట. ఆహారాన్ని పారవేసే అలవాటు.. భోజనం చేసేటప్పుడు పిల్లలు ఆహారాన్ని విసిరేయడం చాలా మంది తల్లిదండ్రులకు ఒక పెద్ద ఆందోళన కలిగించే విషయం. ఈ అలవాటు వల్ల కచ్చితంగా  పిల్లల చుట్టూ ఉన్న ప్రాంతం అంతా చిందరవందర అవుతుంది, అయితే  ఇది పిల్లలు నేర్చుకునే దశ..   పిల్లలు ఈ విధంగా కారణం-ఫలితాన్ని అర్థం చేసుకోవడానికి ప్రయత్నిస్తారని పిల్లల వైద్యులు చెబుతున్నారు. కొన్ని సార్లు పిల్లలు ఇలా చేయడం  వారి కడుపు నిండిపోయిందని, ఇంకా తినడానికి ఇష్టపడటం లేదని సూచించే ఒక సంకేతం కావచ్చని అంటున్నారు. ఏడుపు, కోపం.. పిల్లలు చిన్న చిన్న విషయాలకే గట్టిగా ఏడవడం లేదా కోపగించుకోవడం సర్వసాధారణంగా జరుగుతుంది. కొన్నిసార్లు, వారికి ఇష్టమైనది ఏదైనా దొరక్కపోయినా లేదా ఒక చిన్న మార్పు జరిగినా వారి మూడ్ పాడవుతుంది. ఈ వయస్సులో పిల్లల మెదడులో భావోద్వేగాలను నియంత్రించే భాగం పూర్తిగా అభివృద్ధి చెందదని చిన్న పిల్లల వైద్యులు వివరిస్తున్నారు. అందువల్ల, పెద్దలకు చిన్నవిగా అనిపించే విషయాలు పిల్లలకు చాలా ముఖ్యమైనవిగా ఉండవచ్చట. చాలామంది పసిపిల్లలు ఒకే కథను పదే పదే వినాలని, ఒకే పాటను వినాలని, లేదా ప్రతిరోజూ ఒకే దినచర్యను అనుసరించాలని కోరుకుంటారు. తల్లిదండ్రులకు ఈ అలవాటు విసుగుగా అనిపించవచ్చు, కానీ పునరావృతం పిల్లలకు భద్రతా భావాన్ని ఇస్తుందని నిపుణులు చెబుతున్నారు. సుపరిచితమైన విషయాలు వారికి సౌకర్యవంతంగా అనిపించేలా చేసి, అభ్యసన ప్రక్రియను బలపరుస్తాయి. బొమ్మలు షేర్ చేసుకోవడం.. ఈ వయస్సు పిల్లలలో బొమ్మలు లేదా వస్తువులను పంచుకోవడానికి అస్సలు  ఒప్పుకోరు.  గొడవ చేయడం  కూడా సర్వసాధారణం. పసిపిల్లలు సహజంగానే స్వార్థపరులుగా ఉంటారని, పంచుకోవడం గురించిన నిజమైన అవగాహన సాధారణంగా మూడు నుండి నాలుగు సంవత్సరాల వయస్సులో అభివృద్ధి చెందుతుందిని, అందువల్ల పిల్లవాడు తన బొమ్మలు, వస్తువులు  పంచుకోవడానికి ఇష్టపడకపోతే, దానిని తప్పు ప్రవర్తనగా కాకుండా వారి వయస్సుకు తగినదిగా పరిగణించాలని పిల్లల వైద్యులు చెబుతున్నారు. కాబట్టి  ఎవరైనా సరే.. పిల్లల ప్రవర్తన పైన చెప్పుకున్న విధంగా ఉంటే.. తమ పిల్లలు దురుసు ప్రవర్తనతో ఉన్నారని, వారు తప్పు చేస్తున్నారని అనుకోకుండా.. పిల్లల కోణం నుండి ఆలోచించి, అది వారి అభివృద్దికి మంచిదే అని అర్థం చేసుకోవాలి.                             *రూపశ్రీ.

ఆడపిల్లలకు మొదటిసారి బ్రా కొనేముందు ప్రతి తల్లి ఇవి గుర్తుంచుకోండి! బ్రా అనేది మహిళల వస్త్రధారణలో ఒక భాగం.  ఒక వయసుకు వచ్చాక చిన్న పిల్లల నుండి పెద్దల వరకు బ్రా ధరించడం జరుగుతుంది. సాధారణంగా నేటికాలంలో ఆడపిల్లలు చిన్న వయసులోనే మెచ్యూర్ అవ్వడం,  శారీరకంగా వారు అభివృద్ది చెందడం జరుగుతోంది.  ఆడపిల్లలకు వక్షోజాలు పెరగడం మొదలయ్యాక వారికి ఎలాంటి ఇబ్బందులు ఉండకూడదని తల్లులు పిల్లలకు బ్రా వేసుకోమని సూచిస్తుంటారు. అందుకోసం బ్రా కొనుగోలు కూడా చేస్తుంటారు. అయితే పిల్లల కోసం బ్రా కొనుగోలు చేసేముందు చాలామంది తల్లులు తప్పులు చేస్తుంటారు. మరికొందరు అవగాహన లేకుండా కొంటూ ఉంటారు. మొదటి సారి బ్రా కొనుగోలు చేసేముందు ఎలాంటి జాగ్రత్తలు తీసుకోవాలి?  ఏ విషయాలు పరిగణలోకి తీసుకోవాలి?  ఆడపిల్లలు ఉన్న ప్రతి  తల్లి తెలుసుకోవాల్సిన విషయాలు కొన్ని ఉన్నాయి. అవేంటో తెలుసుకుంటే.. మొదటి తప్పు.. శరీరం ఎదుగుతున్నప్పుడు చాలామంది తల్లులు తమ పాపకు బ్రా వేస్తే మంచిదని అనుకుంటారు. అయితే మొదటి సారి ఎంచుకునే బ్రా చాలా వరకు తప్పుగా ఉన్నదే ఎంచుకోవడం జరుగుతుంది.  చాలా టైట్ గా ఉన్నదో లేదా చాలా లూజ్ గా ఉన్నదో.. ప్యాబ్రిక్ పరంగా చూస్తే సౌకర్యవంతంగా లేనిదో.. ఇలా చాలా రకాలుగా మిస్టేక్స్ జరుగుతాయి. సరైన వయసు.. చాలా వరకు చిన్న పిల్లలకు బ్రా వేసే వయసు 8 నుండి 12 సంవత్సరాల మద్య ప్రారంభం అవుతుంది. అయితే కొందరికి శారీరకంగా ఎదుగుదల ఉండి 8 ఏళ్లకే వక్షోజాలు పెరిగినట్టు కనిపిస్తుంది, మరికొందరికి 12 ఏళ్లు వచ్చినా ఎదుగుదల ఉండదు.  కానీ వయసు వచ్చింది కదా అని అవసరం లేకపోయినా బ్రా వేయడం తప్పు.. సరైన ఎంపిక లేకపోతే ఏం జరుగుతుంది? ఆడపిల్లలకు బ్రా వేయడం మంచిదే.. కానీ ఎంచుకునే బ్రా సరిగా లేకపోతే మాత్రం చాలా ఇబ్బంది ఉంటుంది. పిల్లలది ఎదిగే వయసు కావడంతో కాలంతో పాటు వక్షోజాల పరిమాణం కూడా పెరుగుతూ ఉంటుంది. మధ్యతరగతి కుటుంబాలలో చాలామంది మహిళలు పిల్లలు పెద్దగా అవుతారు కదా అని లూజ్ గా, పొడవుగా ఉన్న  దుస్తులు కొంటారు. కానీ బ్రా మాత్రం అలా లూజ్ గా ఉన్నవి కొనకూడదు.  లూజ్ గా ఉన్ బ్రా ధరించడం వల్ల ఎలాంటి ప్రయోజనం ఉండదు. బాగా టైట్ గా ఉన్న బ్రా ధరించడం వల్ల పిల్లలకు చాలా అసౌకర్యంగా ఉంటుంది.  పెరిగే వయసు కాబట్టి వక్షోజాల పెరుగుదలకు ఆటంకం కలగడం,  వక్షోజాల్లో నొప్పి వంటివి ఎదురవుతాయి. బ్రా రకం.. పిల్లల కోసం ఎంచుకునే బ్రా రకం కూడా చాలా ముఖ్యం.పెద్దవాళ్లు ఎంచుకున్నట్టు బ్రాను ఎంపిక చేయకూడదు.  బనియన్ టైప్ లో ఉన్న బ్రా లేదా స్పోర్ట్స్ బ్రా లాంటివి పిల్లలకు బాగుంటాయి. ప్యాబ్రిక్.. పిల్లల కోసం ఎంచుకునే బ్రా ఫ్యాబ్రిక్ కూడా చాలా ముఖ్యం.  క్లాత్ బాగా స్మూత్ గా ఉండాలి,  స్కూల్ యూనిఫార్మ్ లేదా డ్రస్ మీద అసలు కనిపించనట్టు ఉండాలి,  పెద్దవాళ్ల లాగా రఫ్ గా ఉన్నవి ఎంచుకోకూడదు.  మరీ ముఖ్యంగా పెద్దవాళ్లు వేసుకున్నట్టు కప్ బ్రా లు పిల్లల కోసం అస్సలు ఎంపిక చేయకూడదు. వక్షోజాల నిపుల్స్ కు ఎటువంటి అసౌకర్యం లేకుండా ఉండేలాగా బ్రా ఎంపిక ఉండాలి. బలవంతం వద్దు.. వయసు పెరుగుతోంది కాబట్టి బ్రా ఖచ్చితంగా వేసుకోవాలి అని పిల్లలను బలవంతం చేయకూడదు. దాని బదులుగా పిల్లలకు బ్రా వేుకోవడం ఎంత ముఖ్యం, అది ఎంత సౌకర్యంగా ఉంటుంది అనే విషయం అర్థమయ్యేలా చెప్పాలి. పిల్లలు స్కూల్ కు వెళ్లడం రావడం మాత్రమే కాకుండా, ఆటలు ఆడేటప్పుడు, పరిగెత్తేటప్పుడు.. ఇలా వారికి బ్రా ఉండటం వల్ల ఎలాంటి సౌకర్యం ఉంటుందో అర్థమయ్యేలా చెప్పాలి. బ్రా వేసుకోవడానికి పిల్లలను మానసికంగా సిద్దం చేసిన తర్వాతే  బ్రా కొనుగోలు చేయడం,  పిల్లలకు వేయడం చేయాలి. ఇలా చేస్తే ఎంతో సున్నితమైన విషయాన్ని కూడా పిల్లలు చాలా బాగా అర్థం చేసుకుంటారు.                                     *రూపశ్రీ.