పాన్ ఇండియా స్టార్ ప్రభాస్ అభిమానులు ఎంతో ఆసక్తిగా ఎదురుచూస్తున్న సినిమాల్లో ‘స్పిరిట్’ ఒకటి. ‘అర్జున్ రెడ్డి’, ‘యానిమల్’ చిత్రాలతో ప్రత్యేక గుర్తింపు తెచ్చుకున్న దర్శకుడు సందీప్ రెడ్డి వంగా ఈ సినిమాను తెరకెక్కిస్తున్నారు. ప్రభాస్‌ను పవర్‌ఫుల్ పోలీస్ ఆఫీసర్ పాత్రలో చూపించబోతుండటంతో ఈ ప్రాజెక్టుపై భారీ అంచనాలు ఉన్నాయి. అయితే తాజాగా ఈ సినిమా విడుదల తేదీలో మార్పు చోటుచేసుకుంది. మొదట 2027 మార్చి 5న విడుదల చేయాలని నిర్ణయించగా.. ఇప్పుడు అదే ఏడాది అక్టోబర్ 29న ప్రపంచవ్యాప్తంగా థియేటర్లలోకి తీసుకురానున్నట్లు దర్శకుడు సందీప్ రెడ్డి వంగా ప్రకటించారు.
ఈ సందర్భంగా ప్రభాస్ కొత్త లుక్‌తో కూడిన పోస్టర్‌ను కూడా సందీప్ రెడ్డి వంగా విడుదల చేశారు. సోషల్ మీడియాలో ఈ పోస్టర్‌ను పంచుకుంటూ.. 2027 దీపావళికి ‘స్పిరిట్’ ప్రపంచవ్యాప్తంగా విడుదల కానున్నట్లు వెల్లడించారు. దీంతో ప్రభాస్ అభిమానుల్లో సినిమాపై ఆసక్తి మరింత పెరిగింది. అయితే విడుదల తేదీని మార్చడానికి గల కారణాలను చిత్రబృందం అధికారికంగా వెల్లడించలేదు.
ఇదిలా ఉంటే.. ‘స్పిరిట్’ కొత్త విడుదల తేదీతో మరో భారీ సినిమాతో పోటీ పడే పరిస్థితి ఏర్పడింది. నితేశ్ తివారీ దర్శకత్వంలో రణ్‌బీర్ కపూర్ ప్రధాన పాత్రలో తెరకెక్కుతున్న ‘రామాయణం పార్ట్ 2’ కూడా 2027 దీపావళి సందర్భంగా విడుదల కానున్నట్లు ప్రకటించారు. దీంతో ఈ రెండు భారీ చిత్రాలు ఒకే పండుగ సీజన్‌లో ప్రేక్షకుల ముందుకు వచ్చే అవకాశముంది. అయితే రెండింటి మధ్య నేరుగా ఒకే రోజున పోటీ ఉంటుందా లేదా అన్నది భవిష్యత్తులో స్పష్టత రావాల్సి ఉంది.
ప్రభాస్ సరసన త్రిప్తి డిమ్రి నటిస్తున్న ‘స్పిరిట్’లో వివేక్ ఒబెరాయ్, ప్రకాశ్ రాజ్ తదితరులు కీలక పాత్రలు పోషిస్తున్నారు. సందీప్ రెడ్డి వంగా మార్క్ యాక్షన్, ప్రభాస్ కొత్త అవతారం ఈ సినిమాకు ప్రధాన ఆకర్షణలుగా నిలవనున్నాయి. మరోవైపు ‘రామాయణం పార్ట్ 2’పై కూడా భారీ అంచనాలు ఉన్నాయి. మరి 2027 దీపావళి బాక్సాఫీస్ బరిలో ఈ రెండు చిత్రాల్లో ఏది పైచేయి సాధిస్తుందో చూడాలి.
[Prabhas Spirit Movie, Spirit Release Date, Prabhas Spirit New Release Date, Sandeep Reddy Vanga, Spirit Movie Postponed, Spirit Movie 2027, Prabhas Upcoming Movies, Ramayana Part 2, Spirit vs Ramayana 2]
