జ‌బ‌ర్ద‌స్త్ ఫేమ్ ముక్కు అవినాష్‌కు భారీ షాక్ త‌గిలింది. పెళ్లైన మొద‌టిరోజే భార్య తను న‌చ్చ‌లేద‌ని ప్రేమించిన వాడితో జంప్ అయింది. ఆగండాగండి.. ఇది రియ‌ల్ లైఫ్‌లో కాదండోయ్ స్కిట్‌లో.. వివ‌రాల్లోకి వెళితే.. బిగ్‌బాస్ సీజ‌న్ 4లో ఎంట‌ర్‌టైన‌ర్‌గా ఆక‌ట్టుకున్న అవినాష్ ఆ త‌రువాత నుంచి వ‌రుస ఆఫ‌ర్ల‌తో నిత్యం బిజీగా మారిపోయాడు. అంతే కాకుండా `స్టార్ మా`లో ఓంకార్ నిర్వ‌హిస్తున్న ప‌లు షోల‌లో ఎంట్రీ ఇచ్చి త‌న‌దైన మార్కు కామెడీతో ఆక‌ట్టుకున్నాడు.

అంతే కాకుండా `కామెడీ స్టార్స్‌`లోనూ త‌న‌దైన కామెడీ స్కిట్‌ల‌తో ఎంట‌ర్‌టైన్ చేస్తున్న విష‌యం తెలిసిందే. ఈ కామెడీ స్టార్స్ షోకు ప్ర‌ముఖ క‌మెడియ‌న్ అలీ, న‌టి శ్రీ‌దేవి న్యాయ నిర్ణేత‌లుగా వ్య‌వ‌హ‌రిస్తుండ‌గా.. హోస్ట్‌గా బుల్లితెర రాముల‌మ్మ శ్రీ‌ముఖి వ్య‌వ‌హ‌రిస్తోంది. ఆదివారం మ‌ధ్యాహ్నం 1:30 నిమిషాల‌కు ప్ర‌సారం కానున్న ఈ షోకి సంబంధించిన తాజా ప్రోమోని విడుద‌ల చేశారు. ప్ర‌స్తుతం ఇది నెట్టింట సంద‌డి చేస్తోంది.

ఇందులో ముక్కు అవినాష్ కొత్త‌గా పెళ్లైన యువ‌కుడిగా క‌నిపించ‌నున్నాడు. `పుష్ప‌క విమానం` సినిమా కాన్సెప్ట్ నేప‌థ్యంలో ముక్కు అవినాష్ చేస్తున్న ఈ స్కిట్ కు సంబంధించిన తాజా ప్రోమో ఆక‌ట్టుకుంటోంది.`ఏమండీ మీరు నాకు న‌చ్చ‌లేదు. అందుకే పెళ్లైన మ‌రుస‌టి రోజే ఇంకొక‌డితో ఎగిరిపోతున్నాను. మీతో నాకు వ‌ర్క‌వుట్ కాదు. న‌న్ను క్ష‌మించండి.. ఈ విష‌యం ఎవ‌రికైనా చెబితే స‌మాజం మీ ముఖంపై ఉమ్మేస్తుంది` అంటూ అవినాష్ లేచిపోయిన త‌న భార్య లెట‌ర్ రాయ‌డం.. ఆ విష‌యం బ‌య‌ట‌ప‌డ‌కుండా త‌న భార్య ఇంట్లోనే వున్న‌ట్టుగా అవినాష్ క‌వ‌ర్ చేయ‌డం... ఎవ‌రు ఉమ్మేసినా ప‌ర‌వాలేదు తుడుచుకుంటాన‌ని అవినాష్ అంటుంటే శ్రీ‌ముఖి ఉమ్మేయ‌డం న‌వ్వులు పూయిస్తోంది. లేచిపోయిన అవినాష్ పెళ్లాంగోల క‌థేంటో తెలుసుకోవాలంటే వ‌చ్చే సండే వ‌ర‌కు వేచి చూడాల్సిందే.